ಗ್ರಾಪಂ ಎದುರು ಮನೆ ಸಿಗದ ಸಂತ್ರಸ್ತೆ ಕುಟುಂಬ ವಾಸ್ತವ್ಯ

ಬೈಲಹೊಂಗಲ: 2019ರ ಭೀಕರ ಪ್ರವಾಹದ ಸಂದರ್ಭದಲ್ಲಿ ಮನೆ ಕಳೆದುಕೊಂಡು ನಿರಾಶ್ರಿತರಾದ ಮೇಕಲಮರಡಿ ಗ್ರಾಮದ ಕುಟುಂಬವೊಂದು ಮನೆ ನಿರ್ಮಿಸಿಕೊಡುವವರೆಗೆ ಗ್ರಾಪಂ ಎದುರು ಎತ್ತು, ಚಕ್ಕಡಿಯೊಂದಿಗೆ ವಾಸ್ತವ್ಯ ಹೂಡಿದ್ದು, ಅಲ್ಲಿಯೇ ಅಡುಗೆ ಕೂಡ ಮಾಡುತ್ತಿದೆ.

ಮೇಕಲಮರಡಿ ಗ್ರಾಮದ ನಾಗವ್ವ ಬಾಲಕೃಷ್ಣ ಪೂಜೇರಿ ಕುಟುಂಬ ಮೇಕಲಮರಡಿ ಗ್ರಾಪಂ ಎದುರು ಬದುಕು ಸಾಗಿಸುತ್ತಿದೆ. 2019ರಲ್ಲಿ ಜಿಲ್ಲೆಯಲ್ಲಿ ಸುರಿದ ಭಾರೀ ಮಳೆಗೆ ಇವರ ಮನೆಸಂಪೂರ್ಣವಾಗಿ ಬಿದ್ದಿತ್ತು. ಮನೆಯಲ್ಲಿ ಯಾರೂ ಇಲ್ಲದ ವೇಳೆಯಲ್ಲಿ ಕಟ್ಟಡ ಕುಸಿದಿದ್ದರಿಂದ ಅದೃಷ್ಟವಶಾತ್‌ ಯಾವುದೇ ಪ್ರಾಣಾಪಾಯಗಳಾಗಿರಲಿಲ್ಲ. ಸಾಕಷ್ಟು ಬಾರಿ ಗ್ರಾ.ಪಂ, ತಾ.ಪಂ, ಜಿ.ಪಂ, ಜಿಲ್ಲಾ ಧಿಕಾರಿವರೆಗೆ ತಿಳಿಸಿದರೂ ಪರಿಹಾರ ಸಿಗದ ಕಾರಣ ಇದೀಗ ಗ್ರಾ.ಪಂ ಮುಂದೆ ಠಿಕಾಣಿ ಹೂಡಿದೆ.

ನಾಗವ್ವ ಪೂಜೇರಿ ಪತಿ ಅಂಗವಿಕಲನಾಗಿದ್ದು,ಮನೆ ಬಿದ್ದಾಗ ಮಗಳು ಬಾಣಂತಿಯಾಗಿದ್ದಳು. ಕೆಲಕಾಲ ಸಮುದಾಯ ಭವನದಲ್ಲಿ ಜೀವನ ಸಾಗಿಸಿದ ಕುಟುಂಬಕ್ಕೆ ಒಂದು ವರ್ಷ ಕಳೆದರೂಪರಿಹಾರ ಹಣ ಸಿಕ್ಕಿಲ್ಲ. ಮನೆ ಬಾಡಿಗೆ ಮಾಡಿದರೂಅದಕ್ಕೆ ಸರಕಾರದಿಂದ ಹಣ ನೀಡಿಲ್ಲ. ತಂದೆ, ತಾಯಿ, ತಂಗಿ, ಮಾವನೊಂದಿಗೆ ವಾಸವಿದ್ದೇನೆ. ಇದೀಗ ಪರಿಹಾರ ಸಿಗುವವರೆಗೆ ಗ್ರಾ.ಪಂ ಬಿಟ್ಟು ಕದಲುವದಿಲ್ಲ ಎಂದು ನಾಗವ್ವ ಪಟ್ಟು ಹಿಡಿದಿದ್ದಾಳೆ.

ಕಳೆದ ಬಾರಿ ಮಳೆಯಿಂದ ಮನೆ ಕಳೆದುಕೊಂಡು ನಿರ್ಗತಿಕರಾದ ಮಹಿಳೆ ಕುಟುಂಬದಲ್ಲಿ ಮಹಿಳೆ ಪತಿ ಅಂಗವಿಕಲನಿರುವುದರಿಂದ ಮಾನವೀಯತೆ ದೃಷ್ಟಿಯಿಂದ ಮನೆ ಕಟ್ಟಿಸಿಕೊಡಲು ಜಿಲ್ಲಾಧಿಕಾರಿಗಳ ಗಮನಕ್ಕೆ ವಿಷಯ ತರಲಾಗಿದೆ. – ಡಾ| ದೊಡ್ಡಪ್ಪ ಹೂಗಾರ, ತಹಶೀಲ್ದಾರ್‌, ಬೈಲಹೊಂಗಲ