ಅಮೆರಿಕದಿಂದ ಐ ಡ್ರಾಪ್ಸ್‌ಗಳನ್ನು ವಾಪಸ್‌ ಪಡೆದ ಭಾರತೀಯ ಕಂಪನಿ

ನವದೆಹಲಿ: ಅಮೆರಿಕದಲ್ಲೀಗ ಹೊಸರೀತಿಯ ಆರೋಗ್ಯ ಸಮಸ್ಯೆ ಕಾಣಿಸಿಕೊಂಡಿದೆ. ಸೂಡೊಮೊನಾಸ್‌ ಅರಿಗೊನಾಸ ಎಂಬ ಬ್ಯಾಕ್ಟೀರಿಯದಿಂದ ಕಣ್ಣಿನ ಸೋಂಕು ಉಂಟಾಗಿ ಆ ದೇಶದಲ್ಲಿ ಐವರು ಅಂಧರಾಗಿದ್ದಾರೆ. ಒಬ್ಬರು ನಿಧನರಾಗಿದ್ದಾರೆ.

ಈ ಹಿನ್ನೆಲೆಯಲ್ಲಿ ಚೆನ್ನೈ ಮೂಲದ ಕಂಪನಿ ಗ್ಲೋಬಲ್‌ ಫಾರ್ಮಾ ಹೆಲ್ತ್‌ಕೇರ್‌; ತಾನು ತಯಾರಿಸಿದ್ದ “ಎಝಿಕೇರ್‌’ ಎಂಬ ಐ ಡ್ರಾಪ್ಸ್‌ಗಳನ್ನು ಅಮೆರಿಕದಿಂದ ಪೂರ್ಣ ಪ್ರಮಾಣದಲ್ಲಿ ವಾಪಸ್‌ ತರಿಸಿಕೊಂಡಿದೆ. ಈ ಔಷಧಗಳನ್ನು ಅಮೆರಿಕದ ಸಿಡಿಸಿ (ರೋಗನಿಯತ್ರಣ ಮತ್ತು ತಡೆ ಸಂಸ್ಥೆ) ಪರೀಕ್ಷೆಗೊಳಪಡಿಸುತ್ತಿದೆ. ಮತ್ತೊಂದು ಕಡೆ ಆ ದೇಶದ ಆಹಾರ ಮತ್ತು ಔಷಧ ನಿರ್ವಹಣೆ ಸಂಸ್ಥೆ (ಎಫ್ಡಿಎ), ಗ್ಲೋಬಲ್‌ ಫಾರ್ಮಾದ ಔಷಧ ಬಳಸದಂತೆ ಆದೇಶ ನೀಡಿದೆ. ಈ ಡ್ರಾಪ್ಸ್‌ಗಳು ಬ್ಯಾಕ್ಟೀರಿಯದಿಂದ ಹಾಳಾಗುವ ಸಾಧ್ಯತೆಯಿದೆ.

ಬ್ಯಾಕ್ಟೀರಿಯ ಬಾಧಿತವಾಗಿರುವ ಡ್ರಾಪ್ಸ್‌ಗಳ ಬಳಕೆಯಿಂದ ಶಾಶ್ವತವಾಗಿ ಅಂಧತ್ವ ಬರಬಹುದು, ಸಾವಿಗೆ ಕಾರಣವಾಗಬಹುದು ಎಂದು ಹೇಳಿದೆ. ಪ್ರಸ್ತುತ ಅಮೆರಿಕದ 12 ರಾಜ್ಯಗಳಲ್ಲಿ 55 ಮಂದಿಗೆ ಸೂಡಮೊನಾಸ್‌ ಅರಿಗೊನಾಸ ಬ್ಯಾಕ್ಟೀರಿಯದಿಂದ ಸೋಂಕು ಉಂಟಾಗಿದೆ. ಈ ಬ್ಯಾಕ್ಟೀರಿಯ ರಕ್ತ, ಶ್ವಾಸಕೋಶದಲ್ಲಿ ಸೋಂಕು ಉಂಟು ಮಾಡುತ್ತದೆ, ಗಾಯಕ್ಕೂ ಕಾರಣವಾಗುತ್ತದೆ. ಇದಕ್ಕೆ ಚಿಕಿತ್ಸೆ ನೀಡಲೂ ಆಗುತ್ತಿಲ್ಲ ಎಂದು ವೈದ್ಯರು ತಿಳಿಸಿದ್ದಾರೆ.