ಬಸ್ರೂರು ಹಲವರ ಕೆರೆಯ ಹೂಳೆತ್ತುವಿಕೆ ಮುಕ್ತಾಯ

ಬಸ್ರೂರು: ಈ ಪರಿಸರ ಏಳು ಕೆರೆ ಏಳು ಕೇರಿಗಳಿಂದ ಪ್ರಸಿದ್ಧವಾದ ನಗರ. ಪ್ರಸ್ತುತ ಇಲ್ಲಿನ ಏಳೂ ಕೆರೆಗಳ ನೀರು ಕಲುಷಿತಗೊಂಡು ಉಪಯೋಗಕ್ಕೆ ಸಹಕಾರಿಯಾಗದ ಸ್ಥಿತಿಗೆ ತಲುಪಿವೆ.

ಕೆಳಪೇಟೆಯ ದೇವಸ್ಥಾನ ಸಮೀಪದ ಹಲವರ ಕೆರೆಯನ್ನು ಕೆಲವು ದಿನಗಳ ಹಿಂದೆ ಬಿ. ನರಸಿಂಹರಾಜ ಪ್ರಭು ಮತ್ತು ಮಕ್ಕಳು ಸೇರಿ ಸುತ್ತಲೂ ಹರಡಿಕೊಂಡಿದ್ದ ಮುಳ್ಳು ಬೇಲಿಗಳನ್ನು ತೆಗೆಸಿ ಸ್ವಚ್ಛಗೊಳಿಸಿದರು.

ಆನಂತರದ ಅವಧಿಯಲ್ಲಿ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಆಡಳಿತ ಮೊಕ್ತೇಸರ ಬಿ. ಅಪ್ಪಣ್ಣ ಹೆಗ್ಡೆ ಅವರ ಸೂಚನೆಯಂತೆ ಸಾರ್ವಜನಿಕರಿಂದ ಈ ಹಲವರ ಕೆರೆಯ ಹೂಳೆತ್ತುವಿಕೆ ಆರಂಭಗೊಂಡಿತ್ತು. ಸುಮಾರು ಎರಡು ವಾರಗಳ ಕಾಲ ನಡೆದ ಶ್ರಮದಾನದ ಪರಿಣಾಮವಾಗಿ ಹೂಳೆತ್ತುವಿಕೆ ಮುಕ್ತಾಯಗೊಂಡಿದೆ.

ಪ್ರಸ್ತುತ ಹಲವರ ಕೆರೆಯಲ್ಲಿ ಅಂತರ್ಜಲ ಬರಲಾರಂಭಿಸಿದೆ. ಕೆರೆಯಲ್ಲಿ ಶುದ್ಧ ನೀರು ಇನ್ನಷ್ಟೇ ತುಂಬೇಕಾಗಿದೆ. ಈ ಕೆರೆಯ ಹೂಳೆತ್ತುವಿಕೆ ಮುಕ್ತಾಯಗೊಳ್ಳುತ್ತಿದ್ದಂತೆ ಅಲ್ಲಿಯೇ ಸಮೀಪವಿರುವ ದೇವರ ಕೆರೆಯನ್ನೂ ಇದೇ ರೀತಿ ಸ್ವಚ್ಛಗೊಳಿಸುವ ಬಗ್ಗೆ ಸಾರ್ವಜನಿಕರು ಆಸಕ್ತಿ ವಹಿಸಿದ್ದಾರೆ.