ಮುಂಬಯಿನ ಪಾಲ್ಘರ್‌‌ನಲ್ಲಿ ಭಾರೀ ಸ್ಫೋಟ; ಒಂದು ಸಾವು

ಮುಂಬಯಿ: ಇಲ್ಲಿನ ಪಾಲ್ಘರ್‌ನಲ್ಲಿ ಸೋಮವಾರ ಸಂಜೆ ದೊಡ್ಡ ಅಪಘಾತ ಸಂಭವಿಸಿದೆ.

ತಾರಾಪುರ ಕೈಗಾರಿಕಾ ಪ್ರದೇಶದ ರಾಸಾಯನಿಕ ಕಾರ್ಖಾನೆಯಲ್ಲಿ ಭಾರೀ ಪ್ರಮಾಣದ ಸ್ಫೋಟ ಸಂಭವಿಸಿದೆ. ಅಪಘಾತದಲ್ಲಿ ಓರ್ವ ಸಾವನ್ನಪ್ಪಿದ್ದು, 3 ಮಂದಿ ಗಾಯಗೊಂಡಿದ್ದಾರೆ ಎಂದು ಪಾಲ್ಘರ್ ‌ ಕಲೆಕ್ಟರ್‌ ಕೈಲಾಶ್‌ ಶಿಂಧೆ ತಿಳಿಸಿದ್ದಾರೆ.

ಈ ಸ್ಫೋಟದ ಶಬ್ದ ಸಲ್ವಾರ್‌, ಪಾಠಲ್‌, ಬೋಯಿಸಾರ್‌, ತಾರಾಪುರ ಮತ್ತು ಹತ್ತಿರದ ಹಳ್ಳಿಗಳಿಗೆ‌ 10 ಕಿ.ಮೀ ದೂರದಲ್ಲಿ ಕೇಳಿಬಂದಿದೆ. ಕೆಲವು ವರದಿಗಳ ಪ್ರಕಾರ, ಈ ಸ್ಫೋಟದ ನಂತರ ಹಲವಾರು ಕಿಲೋಮೀಟರ್‌ ಪ್ರದೇಶದಲ್ಲಿ ಅನಿಲ ಸೋರಿಕೆ ಸಂಭವಿಸಿದೆ. ರಾಸಾಯನಿಕ ಕ್ರಿಯೆಯಿಂದಾಗಿ ಕೈಗಾರಿಕಾ ಪ್ರದೇಶದ ಕೆಟಿ ವಲಯದಲ್ಲಿ ಈ ಸ್ಫೋಟ ಸಂಭವಿಸಿದೆ ಎಂದು ಹೇಳಲಾಗುತ್ತಿದೆ. ಪೊಲೀಸ್‌ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ತನಿಖೆ ನಡೆಸುತ್ತಿದ್ದಾರೆ.

ಜನವರಿ ಬಳಿಕ ಎರಡನೇ ಸ್ಫೋಟ
ಜನವರಿಯಲ್ಲಿ ರಾಸಾಯನಿಕ ಕಾರ್ಖಾನೆಯಲ್ಲಿ ಸ್ಫೋಟ ಸಂಭವಿಸಿ, 7 ಮಂದಿ ಸಾವನ್ನಪ್ಪಿದ್ದರು. ಈ ವರ್ಷದ ಜನವರಿಯಲ್ಲಿ ಪಾಲ್ಘರ್‌‌ ಜಿಲ್ಲೆಯ ಕೊಲ್ವಾಡೆ ಗ್ರಾಮದಲ್ಲಿ ನಿರ್ಮಾಣ ಹಂತದಲ್ಲಿರುವ ರಾಸಾಯನಿಕ ಕಾರ್ಖಾನೆಯಲ್ಲಿ ಸ್ಫೋಟ ಸಂಭವಿಸಿತ್ತು. ಈ ದುರ್ಘ‌ಟನೆಯಲ್ಲಿ 7 ಜನರು ಸಾವನ್ನಪ್ಪಿ 4 ಜನರು ಗಾಯಗೊಂಡಿದ್ದರು. ರಾಸಾಯನಿಕ ಪರೀಕ್ಷೆಯ ಸಮಯದಲ್ಲಿ ಸ್ಫೋಟ ಸಂಭವಿಸಿತ್ತು. ಸ್ಫೋಟದ ತೀವ್ರತೆಗೆ ಕಾರ್ಖಾನೆಯ ಕಟ್ಟಡ ಕುಸಿದಿತ್ತು. ಇದರ ಪ್ರತಿಧ್ವನಿಯೂ 15 ಕಿಲೋ ಮೀಟರ್‌ ದೂರ ಕೇಳಿತ್ತು.