ಡೇ-ನೈಟ್‌ ಪಂದ್ಯಕ್ಕೆ ಈಡನ್‌ ಪಿಚ್‌ ರೆಡಿ

ಕೋಲ್ಕತಾ: ಭಾರತ-ಬಾಂಗ್ಲಾದೇಶ ನಡುವಿನ ಐತಿಹಾಸಿಕ ಡೇ ನೈಟ್‌ ಟೆಸ್ಟ್‌ ಪಂದ್ಯಕ್ಕೆ ಕೋಲ್ಕತಾದ ಈಡನ್‌ ಗಾರ್ಡನ್ಸ್‌ ಅಂಗಳದ ಪಿಚ್‌ ಸರ್ವವಿಧದಲ್ಲೂ ಸಜ್ಜಾಗಿದೆ ಎಂದು ಕ್ಯುರೇಟರ್‌ ಸುಜನ್‌ ಮುಖರ್ಜಿ ಹೇಳಿದ್ದಾರೆ.

ಬುಲ್‌ ಬುಲ್‌ ಚಂಡಮಾರುತ ಹಾಗೂ ಭಾರೀ ಮಳೆಯಿಂದಾಗಿ ಪಿಚ್‌ ನಿರ್ಮಾಣಕ್ಕೆ ತೀವ್ರ ಅಡ್ಡಿಯಾ ಗಿತ್ತು. ಇದರಿಂದ ಈ ಕೆಲಸ ವಿಳಂಬವಾದೀತೆಂಬ ಭೀತಿಯೂ ಇತ್ತು. ಆದರೆ ಹವಾಮಾನ ಸಹಕ ರಿಸಿದ ಕಾರಣ ಇದು ಸಕಾಲದಲ್ಲಿ ಸಿದ್ಧಗೊಂಡಿತು ಎಂಬುದಾಗಿ ಮುಖರ್ಜಿ ಹೇಳಿದರು.

“ಹವಾಮಾನವೀಗ ಮಾಮೂಲು ಸ್ಥಿತಿಗೆ ಮರಳಿದೆ. ಇದೊಂದು ಸ್ಪರ್ಧಾತ್ಮಕ ಪಿಚ್‌ ಆಗಿದ್ದು, ನನ್ನ ಗರಿಷ್ಠ ಪ್ರಯತ್ನ ಮಾಡಿದ್ದೇನೆ. ಈ ಟೆಸ್ಟ್‌ ಪಂದ್ಯಕ್ಕೆ ಬಹಳ ಬೇಗ ಪಿಚ್‌ ನಿರ್ಮಿಸಿ, ಸ್ಥಳೀಯ ಪಂದ್ಯವೊಂದನ್ನು ಆಡಿಸುವುದು ನನ್ನ ಉದ್ದೇಶವಾಗಿತ್ತು. ಆದರೆ ಚಂಡಮಾರುತದಿಂದ ಇದು ಸಾಧ್ಯವಾಗಲಿಲ್ಲ’ ಎಂದರು.

ಎರಡು ದಿನಗಳ ಹಿಂದೆ ಗುಲಾಲಿ ಚೆಂಡುಗಳನ್ನು ತರಲಾಗಿದೆ. ಈ ಚೆಂಡುಗಳನ್ನು ಈಡನ್‌ ಪಿಚ್‌ ಮೇಲೆ ಪ್ರಯೋಗಿಸಿ ನೋಡುವುದು ಸುಜನ್‌ ಮುಖರ್ಜಿ ಅವರ ಉದ್ದೇಶವಾಗಿದೆ. ಇದಕ್ಕೆ ಉಳಿದಿರುವುದು 4 ದಿನ ಮಾತ್ರ. ಆದರೆ ಇದರಿಂದ ಅಂಥ ವ್ಯತ್ಯಾಸವೇನೂ ಸಂಭವಿಸದು, ಇದು ಮಾಮೂಲು ಟೆಸ್ಟ್‌ ಪಂದ್ಯದಂತೆ ಸಾಗಲಿದೆ ಎಂದೂ ಅವರು ಹೇಳಿದರು.