Earthquake Strikes: ತೆಲಂಗಾಣ, ಆಂಧ್ರಪ್ರದೇಶ, ಮಹಾರಾಷ್ಟ್ರದಲ್ಲಿ ಭೂಕಂಪ

ಹೈದರಾಬಾದ್‌/ನಾಗಪುರ: ಮಹಾರಾಷ್ಟ್ರ, ತೆಲಂಗಾಣ ಮತ್ತು ಆಂಧ್ರಪ್ರದೇಶದ ಹಲವು ಸ್ಥಳಗಳಲ್ಲಿ ಬುಧವಾರ ಬೆಳಗ್ಗೆ ಭೂಕಂಪ ಸಂಭವಿಸಿದೆ. ರಿಕ್ಟರ್‌ಮಾಪಕದಲ್ಲಿ ಅದರ ಪ್ರಮಾಣ 5.3 ಎಂದು ದಾಖಲಾಗಿದೆ. ಅದರ ಕೇಂದ್ರ ಬಿಂದು ತೆಲಂಗಾಣ ರಾಜಧಾನಿ ಹೈದರಾಬಾದ್‌ನಿಂದ 200 ಕಿ.ಮೀ. ದೂರದಲ್ಲಿರುವ ಮುಲುಗು ಎಂಬ ಸ್ಥಳದಲ್ಲಿತ್ತು.

ತೆಲಂಗಾಣ ಮತ್ತು ಆಂಧ್ರಪ್ರದೇಶದಲ್ಲಿ 5ಕ್ಕಿಂತ ಹೆಚ್ಚು ಭೂಕಂಪನದ ತೀವ್ರತೆ ಇರುವುದು ವಿರಳ. 1969ರಲ್ಲಿ ಭದ್ರಾಚಲಂನಲ್ಲಿ 5.7 ತೀವ್ರತೆಯ ಭೂಕಂಪ ದಾಖಲಾಗಿತ್ತು. ಅದಾದ ಬಳಿಕ ಇದೇ ಮೊದಲ ಬಾರಿಗೆ ತೆಲಂಗಾಣದಲ್ಲಿ 5.3 ಪ್ರಮಾಣದ ಭೂಕಂಪ ದಾಖಲಾಗಿದೆ. 1969ರ ಬಳಿಕ ಸಣ್ಣ ಪ್ರಮಾಣದ ಭೂಕಂಪನಗಳು ದಾಖಲಾಗಿದ್ದವು ಎಂದು ರಾಷ್ಟ್ರೀಯ ಭೂಗೋಳಿಕ ಸಂಶೋಧನ ಸಂಸ್ಥೆಯ (ಎನ್‌ಜಿಆರ್‌ಐ) ನಿವೃತ್ತ ವಿಜ್ಞಾನಿ ಪೂರ್ಣಚಂದ್ರ ರಾವ್‌ ಪ್ರತಿಕ್ರಿಯಿಸಿದ್ದಾರೆ.

ಮುಲುಗುವಿನಲ್ಲಿ ಬೆಳಗ್ಗೆ ಭೂಮಿ ಕಂಪಿಸಿದ ಅನುಭವವಾಗಿದೆ. ಈ ವೇಳೆ ಎಲ್ಲರೂ ಭಯಗೊಂಡಿದ್ದಾರೆ. ಸೀಲಿಂಗ್‌ ಫ್ಯಾನ್‌ಗಳು ಅಲ್ಲಾಡಿವೆ. ಇನ್ನು ಟೇಬಲ್‌, ಕಬೋರ್ಡ್‌ ಗಳಲ್ಲಿಡಲಾಗಿದ್ದ ವಸ್ತುಗಳು ನೆಲಕ್ಕೆ ಬಿದ್ದು ನಾಶವಾಗಿವೆ ಎಂದು ಸ್ಥಳೀಯರು ಹೇಳಿದ್ದಾರೆ. ತೆಲಂಗಾಣಕ್ಕೆ ಹೊಂದಿಕೊಂಡಿರುವ ಮಹಾರಾಷ್ಟ್ರದ ಗಡಿcರೋಲಿ, ಚಂದ್ರಾಪುರ, ನಾಗಪುರಗಳಲ್ಲಿಯೂ ಅಲ್ಪ ಪ್ರಮಾಣದಲ್ಲಿ ಭೂಮಿ ಕಂಪಿಸಿದೆ.

ದಕ್ಷಿಣ ಭಾರತದಲ್ಲೇಕೆ ಭೂಕಂಪ ಕಡಿಮೆ?
ದಕ್ಷಿಣ ಭಾರತದಲ್ಲಿರುವ ಭೂಫ‌ಲಕಗಳ ರಚನೆಯಲ್ಲಿ ಹೆಚ್ಚಿನ ಬಿರುಕುಗಳು ಇಲ್ಲದಿರುವುದರಿಂದ ಹಾಗೂ ಇದು ಸಾಕಷ್ಟು ಗಟ್ಟಿಯಾಗಿರುವುದರಿಂದ ಇಲ್ಲಿ ಭೂಕಂಪಗಳ ಪ್ರಮಾಣ ಕಡಿಮೆ ಇದೆ. ಅಲ್ಲದೆ, ದಖನ್‌ ಪ್ರಸ್ಥಭೂಮಿ ಗಟ್ಟಿಯಾದ ಕಲ್ಲುಗಳಿಂದ ರಚನೆಯಾಗಿದ್ದು, ಇವು ಭೂಮಿ ಕಂಪಿಸುವುದನ್ನು ತಡೆಯುವುದರಿಂದ ಇಲ್ಲಿ ಭೂಕಂಪನ ಸಾಧ್ಯತೆ ಕಡಿಮೆ ಎಂದು ತಜ್ಞರು ಹೇಳಿದ್ಧಾರೆ. ಒಂದು ವೇಳೆ ಇಲ್ಲಿ ಭೂಮಿ ಕಂಪಿಸಿದರೂ ಅಪಾಯಗಳ ಸಾಧ್ಯತೆಯೂ ಕಡಿಮೆ ಎಂದು ಅವರು ಹೇಳಿದ್ದಾರೆ.