ವಿವಾದಿತ ಥಾರ್‌ 43 ಲಕ್ಷಕ್ಕೆ ಮರು ಹರಾಜು!

ತಿರುವನಂತಪುರ: ಕೇರಳದ ಗುರುವಾಯೂರು ಕೃಷ್ಣ ದೇಗುಲದ “ಥಾರ್‌’ ಕಾರನ್ನು ಸಾರ್ವಜನಿಕವಾಗಿ ಮರು ಹರಾಜು ಕೂಗಲಾಗಿದ್ದು, 43 ಲಕ್ಷ ರೂ.ಗೆ ಹರಾಜಾಗಿದೆ. ದುಬಾೖಯಲ್ಲಿ ನೆಲೆಸಿರುವ ವಿಘ್ನೇಶ್ ವಿಜಯ್‌ಕುಮಾರ್‌, ಕೇರಳದಲ್ಲಿರುವ ಪೋಷಕರಿಗಾಗಿ ಈ ಕಾರು ಖರೀದಿಸಿದ್ದಾರೆ.

ಕಳೆದ ವರ್ಷವೂ ಇದರ ಹರಾಜು ನಡೆದಿತ್ತು. ಆಗ ಅಮಲ್‌ ಮೊಹಮದ್‌ ಅಲಿ ಎಂಬವರು ಮಾತ್ರವೇ ಹರಾಜು ಕೂಗಿ, ಕೇವಲ 15.10 ಲಕ್ಷ ರೂ.ಗೆ ಖರೀದಿಸಿದ್ದರು.

ಆಗ ಹರಾಜು ಪ್ರಕ್ರಿಯೆ ಸರಿಯಾಗಿಲ್ಲ ಎನ್ನುವ ವಿವಾದವೆದ್ದು ಅದು ಕೇರಳ ಹೈಕೋರ್ಟ್‌ ವರೆಗೂ ತಲುಪಿತ್ತು. ಅನಂತರ ನ್ಯಾಯಾಲಯದ ಆದೇಶದಂತೆ ಸಾರ್ವಜನಿಕ ಹರಾಜು ನಡೆಸಲಾಗಿದೆ.

ಅದರಲ್ಲಿ ಕಾರಿನ ಮೂಲ ಬೆಲೆಯನ್ನು 15 ಲಕ್ಷ ರೂ. ಎಂದು ಘೋಷಿಸಲಾಗಿದ್ದು, ಅದಕ್ಕಿಂತ 3 ಪಟ್ಟು ಹೆಚ್ಚು ಬೆಲೆಗೆ ಕಾರು ಮಾರಾಟವಾಗಿದೆ.