ದೇಶಿ ಕ್ರಿಕೆಟಿಗೂ ಡಿಆರ್‌ಎಸ್‌: ಉನಾದ್ಕತ್‌

ಬೆಂಗಳೂರು: ಕರ್ನಾಟಕ-ಸೌರಾಷ್ಟ್ರ ನಡುವಿನ ರಣಜಿ ಸೆಮಿಫೈನಲ್‌ ಪಂದ್ಯ ವಿವಾದದ ಕಾರಣದಿಂದ ಸುದ್ದಿಯಾಗಿದೆ. ಇದಕ್ಕಾಗಿ ದೇಶಿ ಕ್ರಿಕೆಟ್‌ನಲ್ಲೂ ಡಿಆರ್‌ಎಸ್‌ ಅಳವಡಿಕೆ ಸೂಕ್ತ ಎಂಬುದಾಗಿ ಸೌರಾಷ್ಟ್ರ ತಂಡದ ನಾಯಕ ಜೈದೇವ್‌ ಉನಾದ್ಕತ್‌ ಅಭಿಪ್ರಾಯಪಟ್ಟಿದ್ದಾರೆ.

“ವಿವಾದಾತ್ಮಕ ತೀರ್ಪಿನ ಬಗ್ಗೆ ಖಚಿತವಾಗಿ ಏನೂ ಹೇಳುವ ಸ್ಥಿತಿ ಇರಲಿಲ್ಲ. ಅವರು ಔಟ್‌ ಎಂದು ಭಾವಿಸಿದ್ದಾರೆ. ನಾವು ನಾಟೌಟ್‌ ಎಂದು ಹೇಳುತ್ತೇವೆ. ಕೆಲವು ತೀರ್ಪು ನಮ್ಮ ವಿರುದ್ಧವಾಗಿಯೂ ಬಂದಿದೆ. ದ್ವಿತೀಯ ಸರದಿಯಲ್ಲಿ ಅಗರ್ವಾಲ್‌ ಪರ ಬಂದ ತೀರ್ಪು ಇದಕ್ಕೊಂದು ಉದಾಹರಣೆ. ಹೀಗಾಗಿ ನಿಖರ ಹಾಗೂ ನಿಷ್ಪಕ್ಷಪಾತ ತೀರ್ಪಿಗಾಗಿ ದೇಶಿ ಕ್ರಿಕೆಟ್‌ನಲ್ಲೂ ಡಿಆರ್‌ಎಸ್‌ ಪದ್ಧತಿ ಅಳವಡಿಸುವುದು ಸೂಕ್ತ’ ಎಂದು ಉನಾದ್ಕತ್‌ ಹೇಳಿದರು.