ಮಕ್ಕಳಿಗೆ ಒಳಚರಂಡಿ ನೀರಿನ ಸಿಂಚನ!

ಉಡುಪಿ: ಅಂಬಲಪಾಡಿ ಶ್ರೀ ಮಹಾಕಾಳಿ ದೇವಳದ ಹಿಂಬಾಗ ರಸ್ತೆಯ ವಸತಿ ಸಂಕೀರ್ಣದ ಬಳಿ ಡ್ರೈನೇಜ್‌ ನೀರು ಹಲವು ದಿನಗಳಿಂದ ರಸ್ತೆಯ ಮೇಲೆ ಹರಿಯುತ್ತಿದೆ. 

ಸಮಸ್ಯೆಯ ಬಗ್ಗೆ ಸ್ಥಳಿಯರು ನಗರಸಭೆಗೆ ಹಲವು ಬಾರಿ ಮೌಖೀಕ ದೂರು ನೀಡಿದರೂ ಸ್ಪಂದಿಸಿಲ್ಲ. ಇನ್ನಾದರೂ ಈ ಬಗ್ಗೆ ಗಮನಹರಿಸಬೇಕೆಂದು ಸ್ಥಳಿಯರು ಆಗ್ರಹಿಸಿದ್ದಾರೆ. ಮುಖ್ಯರಸ್ತೆ ಇದಾದುದರಿಂದ ಸಾರ್ವಜನಿಕರು, ಶಾಲಾ ಮಕ್ಕಳು ಇದೇ ರಸ್ತೆಯಲ್ಲಿ ಸಂಚರಿಸುತ್ತಾರೆ. ಡ್ರೈನೇಜ್‌ ನೀರಿನ ದುರ್ವಾಸನೆಯಿಂದ ಸಾರ್ವಜನಿಕರು ಮೂಗು ಮುಚ್ಚಿಕೊಂಡು ನಡೆದಾಡಬೇಕಾದ ಪರಿಸ್ಥಿತಿ ಎದುರಾಗಿದೆ.

ವಾಹನಗಳು ಸಂಚರಿಸುವಾಗ ವಾಹನಗಳ ಚಕ್ರದಿಂದ ಶೌಚಾದಿ ಕ್ರಿಯೆಗಳ ಕೊಳಚೆ ನೀರು ಶಾಲಾ ಮಕ್ಕಳು ಧರಿಸಿದ ಸಮವಸ್ತ್ರಗಳ ಮೇಲೆ ಎರಚಿದ ಘಟನೆಗಳೂ ನಡೆದಿವೆ. ಈ ಕುರಿತು ನಗರಸಭೆ ಶೀಘ್ರವಾಗಿ ಸ್ಪಂದಿಸಿ ಡೈನೇಜ್‌ ದುರಸ್ತಿ ಕಾರ್ಯ ನಡೆಸಬೇಕೆಂದು ಸ್ಥಳೀಯರ ಪರವಾಗಿ ವಿಶು ಶೆಟ್ಟಿ ಅಂಬಲಪಾಡಿ ಆಗ್ರಹಿಸಿದ್ದಾರೆ.