ಶತಾಯುಷಿ ಡಾ|ಏಣಗಿ ಬಾಳಪ್ಪಗೆ ಗೌರವ ಡಾಕ್ಟರೆಟ್‌

ಬೆಳಗಾವಿ: ಕೇವಲ ಮೂರನೇ ತರಗತಿ ಕಲಿತು ನಾಡಿಗೆ ರಂಗಕಂಪು ಹರಡುವ ಮೂಲಕ ಮೂರನೇ ಗೌರವ ಡಾಕ್ಟರೇಟ್‌ ಪದವಿಗೆ ಪಾತ್ರರಾದ ಶತಾಯುಷಿ ಏಣಗಿ ಬಾಳಪ್ಪನವರ ಮನೆಯಂಗಳದಲ್ಲಿ ಗುರುವಾರ ಸಂಭ್ರಮದ
ವಾತಾವರಣ ಕಂಡು ಬಂತು. ಮೈಸೂರಿನ ಗಂಗೂಬಾಯಿ ಹಾನಗಲ್‌ ಸಂಗೀತ ಹಾಗೂ ಪ್ರದರ್ಶಕ ಕಲೆಗಳ ವಿಶ್ವವಿದ್ಯಾಲಯದಿಂದ ಬಾಳಪ್ಪರಿಗೆ ಗೌರವ ಡಾಕ್ಟರೇಟ್‌ ಪ್ರದಾನ ಸಮಾರಂಭ ಏಣಗಿ ಗ್ರಾಮದ ಅವರ ಮನೆ ಆವರಣದಲ್ಲಿ ನಡೆಯಿತು.

ವಿವಿ ಕುಲಪತಿ ಡಾ| ಸರ್ವಮಂಗಳಾ ಶಂಕರ್‌ ಅವರು 103 ವಯಸ್ಸಿನ ಡಾ| ಬಾಳಪ್ಪರಿಗೆ ಮೈಸೂರು ಪೇಟ ತೊಡಿಸಿ ಗೌರವ ಡಾಕ್ಟರೇಟ್‌ ಪ್ರದಾನ ಮಾಡಿದರು. ನಂತರ ಮಾತನಾಡಿ, ಮೈಸೂರಿನಲ್ಲಿರುವ ಗಂಗೂಬಾಯಿ ಹಾನಗಲ್‌ ಸಂಗೀತ ಹಾಗೂ ಪ್ರದರ್ಶಕ ಕಲೆಗಳ ವಿಶ್ವವಿದ್ಯಾಲಯದಲ್ಲಿ ನಾಟ್ಯಭೂಷಣ, ನಾಡೋಜ ಡಾ| ಏಣಗಿ ಬಾಳಪ್ಪರ ಅಧ್ಯಯನ ಪೀಠ ಸ್ಥಾಪನೆಗೆ ಪ್ರಯತ್ನಿಸಲಾಗುವುದು ಎಂದು ಭರವಸೆ ನೀಡಿದರು.