ಅಂಧೆಯ ಬಾಳಿಗೆ ಬೆಳಕಾಗಲು ಮುಂದಾದ ಹಿರಿಯ ಜೀವ

ಉಗಾರ ಬಿಕೆ: ಝೀ ಕನ್ನಡ ವಾಹಿನಿಯಲ್ಲಿ ಬರುತ್ತಿರುವ ಸರಿಗಮಪ ಕಾರ್ಯಕ್ರಮದ ಸ್ಪರ್ಧಿಯಾಗಿರುವ ಅಂಧ ಬಾಲಕಿ ಸಂಗೀತಾಳಿಗೆ ತಮ್ಮ ಜೀವಿತಾವಧಿಯಲ್ಲೇ ನೇತ್ರದಾನ ಮಾಡುವುದಾಗಿ ಕಾಗವಾಡ ತಾಲೂಕಿನ ಜುಗೂಳ ಗ್ರಾಮದ ಅಪ್ಪಣ್ಣಾ ನೇಮಣ್ಣ ಕುಂಬಾರ ಮುಂದೆ ಬಂದಿದ್ದಾರೆ.

ಈ ಕುರಿತು ಪತ್ರಿಕೆಯೊಂದಿಗೆ ಮಾತನಾಡಿದ ಅವರು, ಸಂಗೀತಾಳಿಗೆ ಜೀವಿತಾವಧಿಯಲ್ಲಿ ಒಂದು ಕಣ್ಣು ದಾನ ಮಾಡಲು ಮುಂದಾಗಿದ್ದೇನೆ. ಇದಕ್ಕೆ ಕುಟುಂಬ ವರ್ಗದ ಸಂಪೂರ್ಣ ಸಮ್ಮತಿ ಕೂಡ ಇದೆ. ನನ್ನ ಒಂದು ಕಣ್ಣಿನಿಂದ ಪುಟ್ಟ ಬಾಲಕಿ ಇಡೀ ಜಗತ್ತನ್ನು ನೋಡಬೇಕೆಂಬ ಆಸೆ ನನ್ನದು ಎಂದು ತಮ್ಮ ಮನದಿಚ್ಛೆಯನ್ನು ವಿವರಿಸಿದರು.

ಇಲ್ಲಿಯವರೆಗೆ ನೇತ್ರದಾನ ಮಾಡಿದ ದಾನಿಗಳ ಕಣ್ಣು ಅಂಧರಿಗೆ ಕಸಿ ಮಾಡಿ ಅಳವಡಿಸಿದ ಉದಾಹರಣೆಗಳು ನಮಗೆ ಮುಂದೆ ಕಂಡು ಬರುತ್ತಿಲ್ಲ. ಸಂಗೀತಾಳ ಸ್ಥಿತಿ ಹೀಗಾಗುವುದು ಬೇಡ. ಈ ಬಾಲಕಿ ಬೆಳೆಯಬೇಕು. ಅವಳ ಪ್ರತಿಭೆ ಆಕಾಶದೆತ್ತರಕ್ಕೆ ಬೆಳೆಯಬೇಕು. ಅದಕ್ಕೆ ಅವಳಿಗೆ ಕಣ್ಣಿನ ಅವಶ್ಯಕತೆ ಇದೆ. ಆದ್ದರಿಂದ ನೇತ್ರದಾನಕ್ಕೆ ನಿರ್ಧರಿಸಿರುವುದಾಗಿ ತಿಳಿಸಿದ್ದಾರೆ.