ಪಡಿತರ ನಿರಾಕರಣೆ ಬೇಡ: ಕೇಂದ್ರ ಸೂಚನೆ

ಹೊಸದಿಲ್ಲಿ: ಝಾರ್ಖಂಡ್‌ನ‌ಲ್ಲಿ ಆಧಾರ್‌ ಇಲ್ಲದ್ದಕ್ಕಾಗಿ ಕುಟುಂಬವೊಂದಕ್ಕೆ ಪಡಿತರ ನಿರಾಕರಿಸಿದ್ದರಿಂದ 11 ವರ್ಷದ ಮಗು ಸಾವನ್ನಪ್ಪಿದ ಹಿನ್ನೆಲೆಯಲ್ಲಿ ಎಚ್ಚೆತ್ತ ಕೇಂದ್ರ ಸರಕಾರ, ಆಧಾರ್‌ ಸಂಖ್ಯೆಯನ್ನು ಪಡಿತರ ಚೀಟಿಗೆ  ಜೋಡಿಸಿಲ್ಲ ಅಥವಾ ಆಧಾರ್‌ ಕಾರ್ಡ್‌ ಹೊಂದಿಲ್ಲ ಎಂಬ ಕಾರಣಕ್ಕೆ ಆಹಾರ ಧಾನ್ಯ ನಿರಾಕರಿಸಬೇಡಿ ಎಂದು ರಾಜ್ಯ ಸರಕಾರಗಳಿಗೆ  ಸೂಚಿಸಿದೆ. ಆಧಾರ್‌ ಇಲ್ಲದ ಕಾರಣಕ್ಕೆ ಫ‌ಲಾನುಭವಿಗಳ ಪಟ್ಟಿಯಿಂದ ಅರ್ಹ ಕುಟುಂಬದ ಹೆಸರನ್ನು ಅಳಿಸಬಾರದು 
ಎಂದೂ ಕೇಂದ್ರ ಸರಕಾರ ಸೂಚಿಸಿದೆ. ಹೀಗೆ ಮಾಡಿದಲ್ಲಿ ಕಠಿನ ಕ್ರಮ ಎಚ್ಚರಿಕೆಯನ್ನೂ ಕೇಂದ್ರ ನೀಡಿದೆ.

ಪಡಿತರ ಚೀಟಿಗೆ ಅರ್ಹತೆ ಹೊಂದಿಲ್ಲ ಎಂಬುದು ಖಚಿತವಾದ ಅನಂತರ ಮಾತ್ರವೇ ಪಡಿತರ ಫ‌ಲಾನುಭವಿಗಳ ಪಟ್ಟಿಯಿಂದ ವ್ಯಕ್ತಿಯ ಹೆಸರನ್ನು ಅಳಿಸಬೇಕು. ಫ‌ಲಾನುಭವಿ ಅರ್ಹವಾಗಿದ್ದಲ್ಲಿ ಯಾವುದೇ ಕಾರಣಕ್ಕೂ ಪಡಿತರ ನಿರಾಕರಿಸಬಾರದು ಎಂದು ರಾಜ್ಯಗಳಿಗೆ ಸೂಚಿಸಲಾಗಿದೆ. ಪಡಿತರ ಚೀಟಿಯೊಂದಿಗೆ ಆಧಾರ್‌ ಜೋಡಿಸಲು ಡಿಸೆಂಬರ್‌ವರೆಗೆ ಅವಕಾಶ ನೀಡಲಾಗಿದ್ದು, ಆಧಾರ್‌ ಹೊಂದಿಲ್ಲದವರಿಗಾಗಿ ಈ ಗಡುವನ್ನು ಮುಂದಿನ ಮಾ. 31ರವರೆಗೆ ವಿಸ್ತರಿಸಲಾಗಿದೆ. ಈವರೆಗೆ ಶೇ.82ರಷ್ಟು ಪಡಿತರ ಚೀಟಿಗಳಿಗೆ ಆಧಾರ್‌ ಸಂಖ್ಯೆಯನ್ನು ಲಿಂಕ್‌ ಮಾಡಲಾಗಿದೆ.