ಸಮಿತಿ ವರದಿ ಆಧರಿಸಿ ಕುಲಪತಿ ನೇಮಕ ಬೇಡ: ಹೈಕೋರ್ಟ್‌ ಸೂಚನೆ 

ಬೆಂಗಳೂರು: ರಾಜ್ಯಸರ್ಕಾರದ ಶೋಧನಾ ಸಮಿತಿ ತೀರ್ಮಾನ ಆಧರಿಸಿ ಬೆಂಗಳೂರು ವಿಶ್ವವಿದ್ಯಾಲಯಕ್ಕೆ ಕುಲಪತಿಗಳನ್ನು ನೇಮಕ ಮಾಡಬಾರದು ಎಂದು ಹೈಕೋರ್ಟ್‌ ಮಧ್ಯಂತರ ಆದೇಶ ನೀಡಿದೆ. 

ಬೆಂಗಳೂರು ವಿವಿ ಕುಲಪತಿ ಹುದ್ದೆಗೆ ಅರ್ಹರ ಹೆಸರನ್ನು ಶಿಫಾರಸು ಮಾಡಲು ರಚಿಸಲಾಗಿರುವ  ಶೋಧನಾ ಸಮಿತಿ ಸದಸ್ಯರ ನೇಮಕದಲ್ಲಿ ರಾಜ್ಯ ಸರ್ಕಾರ ಸೂಕ್ತ ಮಾನದಂಡಗಳನ್ನು ಅನುಸರಿಸಿಲ್ಲ. ಅಲ್ಲದೆ ಶೋಧನಾ ಸಮಿತಿ ಸದಸ್ಯರು ಸೂಕ್ತ ಅರ್ಹತೆ ಗಳನ್ನೂ ಹೊಂದಿಲ್ಲ.

ಹೀಗಾಗಿ ಸಮಿತಿ ಸದಸ್ಯರ ತೀರ್ಮಾನ ಆಧರಿಸಿ ಕುಲಪತಿ ನೇಮಕ ಮಾಡದಂತೆ ಸರ್ಕಾರಕ್ಕೆ ನಿರ್ದೇಶಿಸುವಂತೆ ವಕೀಲ ಬಿ. ವಿ ಶ್ರೀನಿವಾಸ್‌ ಹೈಕೋರ್ಟ್‌ ಮೆಟ್ಟಿಲೇರಿದ್ದರು. ಈ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಪಿ.ಎಸ್‌ ದಿನೇಶ್‌ಕುಮಾರ್‌ ಅವರಿದ್ದ ಏಕಸದಸ್ಯ ಪೀಠ, ಶೋಧನಾ ಸಮಿತಿಯು ತನ್ನ ಶಿಫಾರಸಿನ ತೀರ್ಮಾನ ಕಾಯ್ದಿರಿಸಬೇಕು ಹಾಗೂ ಸಮಿತಿ ತೀರ್ಮಾನ ಆಧರಿಸಿ ಸರ್ಕಾರ ಕುಲಪತಿಗಳನ್ನು ನೇಮಕ ಮಾಡಬಾರದು ಎಂದು ಮಧ್ಯಂತರ ಆದೇಶ ನೀಡಿತು.

ಜೊತೆಗೆ ಪ್ರತಿವಾದಿಗಳಾಗಿರುವ ಉನ್ನತ ಶಿಕ್ಷಣ ಇಲಾಖೆ, ಶೋಧನಾ ಸಮಿತಿ ಸದಸ್ಯರಾದ ಡಾ.ಎಸ್‌.ಆರ್‌ ನಿರಂಜನ್‌ ಆರ್‌.ಸಿ ಕೌಡ್‌,  ಎಸ್‌ .ಇಂದುಮತಿಯರಿಗೆ ನೋಟೀಸ್‌ ಜಾರಿಗೊಳಿಸಿ ಆಕ್ಷೇಪಣೆ ಸಲ್ಲಿಸುವಂತೆ ತಾಕೀತು ಮಾಡಿದೆ.