ಹನ್ನೆರಡು ವರ್ಷದ ಬಳಿಕ ಕ್ರಿಕೆಟ್‌ಗೆ ದಿನೇಶ್‌ ಮೊಂಗಿಯ ವಿದಾಯ

ನವದೆಹಲಿ: ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಹನ್ನೆರಡು ವರ್ಷಗಳ ನಂತರ ದಿನೇಶ್‌ ಮೊಂಗಿಯ ವಿದಾಯ ಹೇಳಿದ್ದಾರೆ.

2003ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆದಿದ್ದ ವಿಶ್ವಕಪ್‌ನಲ್ಲಿ ರನ್ನರ್‌ಅಪ್‌ ಆಗಿದ್ದ ಭಾರತ ತಂಡದ ಸದಸ್ಯರಲ್ಲಿ ಇವರೂ ಒಬ್ಬರಾಗಿದ್ದರು. ಭಾರತದ ಪರ 57 ಏಕದಿನ ಪಂದ್ಯವಾಡಿ ಒಟ್ಟಾರೆ 1230 ರನ್‌ಗಳಿಸಿದ್ದಾರೆ. 2002ರಲ್ಲಿ ಜಿಂಬಾಬ್ವೆ ವಿರುದ್ಧ ಅಜೇಯ 159 ರನ್‌ಗಳಿಸಿದ್ದು, ಕ್ರಿಕೆಟ್‌ ಜೀವನದ ಏಕೈಕ ಶತಕವಾಗಿದೆ. ದಿನೇಶ್‌ ಏಕೈಕ ಟಿ20 ಪಂದ್ಯವನ್ನೂ ಆಡಿದ್ದಾರೆ. 2007ರಲ್ಲಿ ಐಸಿಎಲ್‌ ಬಂಡಾಯ ಕ್ರಿಕೆಟ್‌ ಲೀಗ್‌ನಲ್ಲಿ ಪಾಲ್ಗೊಂಡಿದ್ದಕ್ಕೆ ದಿನೇಶ್‌ ಮೊಂಗಿಯ ಬಿಸಿಸಿಐ (ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ)ನಿಂದ ನಿಷೇಧಕ್ಕೆ ಒಳಗಾಗಿದ್ದರು.