ಸಾರಿಗೆ ಇಲಾಖೆ ದಾಖಲೆಗಳಿಗೆ ಡಿಜಿಟಲ್‌ ಸ್ಪರ್ಶ

ಬೆಂಗಳೂರು: ವಾಹನ ಚಾಲಕರು ಇನ್ಮುಂದೆ ಚಾಲನಾ ಪರವಾನಗಿ, ನೋಂದಣಿ ಪ್ರಮಾಣಪತ್ರ, ವಾಹನ ಅರ್ಹತಾ ಪತ್ರಗಳನ್ನೆಲ್ಲಾ ತೆಗೆದುಕೊಂಡು ಹೋಗಬೇಕಿಲ್ಲ. ಪೊಲೀಸರು ತಡೆದರೆ, ಮೊಬೈಲ್‌ನಲ್ಲೇ ಅಗತ್ಯ ದಾಖಲೆಗಳನ್ನು ತೋರಿಸಿ ಹೋಗಬಹುದು!

ಸಾರಿಗೆ ಇಲಾಖೆಯು ಈ ಎಲ್ಲ ದಾಖಲೆಗಳಿಗೆ ಡಿಜಿಟಲ್‌ ಸ್ಪರ್ಶ ನೀಡಲು ಮುಂದಾಗಿದೆ. ದಾಖಲೆಗಳು ಮತ್ತು ಪ್ರಮಾಣಪತ್ರಗಳನ್ನು ವಿದ್ಯುನ್ಮಾನ (ಡಿಜಿಟಲ್‌) ರೂಪದಲ್ಲಿ ಸಂಗ್ರಹಿಸಿ, ವಿತರಿಸುವ ಮತ್ತು ದೃಢೀಕರಿಸುವ “ಡಿಜಿ ಲಾಕರ್‌’ ಪರಿಚಯಿಸುತ್ತಿದೆ. 

ಈ ವ್ಯವಸ್ಥೆಯು ದಾಖಲೆ ಪತ್ರಗಳನ್ನು ಸದಾ ಕೊಂಡೊಯ್ಯುವ ಸಮಸ್ಯೆ ದೂರ ಮಾಡುವುದರ ಜತೆಗೆ ದಾಖಲೆಗಳನ್ನು ಯಾವಾಗ ಬೇಕಾದರೂ, ಎಲ್ಲಿ ಬೇಕಾದರೂ ನೋಡಬಹುದು. ಶೀಘ್ರದಲ್ಲೇ ಇದಕ್ಕೆ ಅಧಿಸೂಚನೆ ಹೊರಡಿಸಲಾಗುವುದು ಎಂದು ಸಾರಿಗೆ ಇಲಾಖೆ ಆಯುಕ್ತ ಬಿ. ದಯಾನಂದ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. 

ಈ ನಿಟ್ಟಿನಲ್ಲಿ ಚಾಲನಾ ಪರವಾನಗಿಗೆ ಸಂಬಂಧಿಸಿದ ನಿಯಮಾವಳಿಗಳಲ್ಲಿ ಮಾರ್ಪಾಡು ಮಾಡಲು ಸಾಧ್ಯವೇ ಎಂಬುದರ ಬಗ್ಗೆ “ಇ-ಆಡಳಿತ’ ಇಲಾಖೆಯೊಂದಿಗೆ ಚರ್ಚಿಸಲಾಗಿದ್ದು, ಶೀಘ್ರ ಅಧಿಸೂಚನೆ ಹೊರಡಿಸಲಾಗುವುದು. ಇದರಿಂದ ಡಿಜಿ ಲಾಕರ್‌ನಲ್ಲಿ ಸಂಗ್ರಹಿಸಿಟ್ಟ ದಾಖಲೆಗಳು ಅಧಿಕೃತವಾಗಲಿವೆ ಎಂದರು. 

ಡಿಜಿ ಲಾಕರ್‌ ಬಳಕೆ ಹೀಗೆ: ಯಾವುದೇ ವ್ಯಕ್ತಿಯು ಛಜಿಜಜಿlಟckಛಿr.ಜಟv.ಜಿnಗೆ ಹೋಗಿ ಸೈನ್‌ಅಪ್‌ ಆಗಬೇಕು. ಅಲ್ಲಿ ಡಿಜಿಟಲ್‌ ದಾಖಲೆಗಳನ್ನು ಸಂಗ್ರಹಿಸಿಟ್ಟುಕೊಂಡು, ನೋಡಬಹುದು ಮತ್ತು ಆನ್‌ಲೈನ್‌ ಮೂಲಕ ಹಂಚಿಕೊಳ್ಳಬಹುದು.

ಹೀಗೆ ಸ್ವಯಂ ಅಪ್‌ಲೋಡ್‌ ಮಾಡುವ ದಾಖಲೆಗಳಿಗೆ ಬಳಕೆದಾರರು ಡಿಜಿಟಲ್‌ ಸಹಿ (ಇ-ಸೈನ್‌) ಮಾಡಬೇಕು. ಇದು ಒಂದು ರೀತಿಯ ದೃಢೀಕರಣ ಇದ್ದಂತೆ. ಇದು ನಕಲು ಮಾಡುವುದನ್ನು ತಡೆಯುತ್ತದೆ. ಕಾಗದರಹಿತ ಆಡಳಿತ ಪರಿಕಲ್ಪನೆಯಲ್ಲಿ ಕೇಂದ್ರ ಸರ್ಕಾರ ಈ ಸೇವೆ ಜಾರಿಗೆ ತಂದಿದೆ. 

ವಾಹನ ನೋಂದಣಿ, ಅರ್ಹತಾ ಪತ್ರ ಸೇರಿ ಮತ್ತಿತರ ದಾಖಲೆಗಳನ್ನು ಸಂಪೂರ್ಣವಾಗಿ ಆನ್‌ಲೈನ್‌ ವ್ಯವಸ್ಥೆಗೆ ಪರಿವರ್ತಿಸುವ “ವಾಹನ-4′ ವ್ಯವಸ್ಥೆಯನ್ನು ಈಗಾಗಲೇ ಪ್ರಾಯೋಗಿಕವಾಗಿ ರಾಮನಗರದಲ್ಲಿ ಜಾರಿಗೊಳಿಸಲಾಗಿದೆ. ಮುಂದಿನ ದಿನಗಳಲ್ಲಿ ಎಲ್ಲ 63 ಆರ್‌ಟಿಒಗಳಿಗೆ ವಿಸ್ತರಿಸಲಾಗುವುದು.

ಅದೇ ರೀತಿ, ಸಾರಥಿ-4 (ಚಾಲನಾ ಪರವಾನಗಿ ಸೇವೆಗೆ) ಈಗಾಗಲೇ ನಗರದ ಹತ್ತು ಆರ್‌ಟಿಒಗಳಲ್ಲಿ ಪರಿಚಯಿಸಲಾಗಿದೆ. ಉಳಿದ ಆರ್‌ಟಿಒಗಳಲ್ಲೂ ಈ ಸೇವೆ ವಿಸ್ತರಣೆ ಆಗಲಿದೆ ಎಂದು ಹೇಳಿದರು. -ಚ್ಚುವರಿ ಆಯುಕ್ತ (ಆಡಳಿತ) ನರೇಂದ್ರ ಹೋಳ್ಕರ್‌, ಜಂಟಿ ಆಯುಕ್ತ (ನಗರ) ಜ್ಞಾನೇಂದ್ರಕುಮಾರ್‌ ಇತರರು ಇದ್ದರು.

ಮತ್ತೆ ಬರಲಿದೆ ಬೈಕ್‌ ಟ್ಯಾಕ್ಸಿ?: ತಾತ್ಕಾಲಿಕವಾಗಿ ತಡೆಹಿಡಿದಿದ್ದ ಬೈಕ್‌ ಟ್ಯಾಕ್ಸಿ ಸೇವೆಗೆ ಸರ್ಕಾರ ಮರುಚಾಲನೆ ನೀಡಲು ಚಿಂತನೆ ನಡೆಸಿದೆ. ಬೈಕ್‌ ಸೇವೆಗೆ ಅನುಮತಿ ನೀಡುವ ಸಲುವಾಗಿ ಬಿಎಂಆರ್‌ಸಿ ಮತ್ತು ಬಿಎಂಟಿಸಿ ಅಧಿಕಾರಿಗಳೊಂದಿಗೆ ಸಾರಿಗೆ ಇಲಾಖೆ ಈಗಾಗಲೇ ಒಂದು ಸುತ್ತಿನ ಮಾತುಕತೆ ನಡೆಸಿದೆ.

ಇದರಲ್ಲಿ ಸಾಧಕ-ಬಾಧಕಗಳ ಬಗ್ಗೆ ಚರ್ಚೆ ನಡೆಸಲಾಗಿದೆ. ಈಗಾಗಲೇ ದೇಶದ ಜೈಪುರ, ಚಂಡಿಗಢ, ಗುರ್‌ಗಾಂವ್‌, ಗೋವಾ ಸೇರಿ ಹಲವು ಕಡೆ ಈ ಸೇವೆ ಚಾಲ್ತಿಯಲ್ಲಿದೆ. ಬೆಂಗಳೂರಿನಲ್ಲೂ ಇದನ್ನು ಯಾಕೆ ಪರಿಚಯಿಸಬಾರದು ಎಂಬ ಚಿಂತನೆ ನಡೆದಿದೆ ಎಂದು ಪ್ರಶ್ನೆಯೊಂದಕ್ಕೆ ದಯಾನಂದ ಪ್ರತಿಯಿಸಿದರು. 

ಸದ್ದುಮಾಡುವ ವಾಹನಗಳ ಸದ್ದಡಗಲಿದೆ: ಮದ್ಯಸೇವಿಸಿ ವಾಹನ ಚಾಲನೆ ಮಾಡುವವರ ವಿರುದ್ಧ ನಡೆಸುವ ಕಾರ್ಯಾಚರಣೆಯಂತೆಯೇ ಇನ್ಮುಂದೆ ವಾಹನಗಳ ಸೈಲನ್ಸರ್‌ ಮಾರ್ಪಡಿಸಿ, ಶಬ್ದಮಾಲಿನ್ಯ ಉಂಟುಮಾಡುವ ವಾಹನಗಳ ನೋಂದಣಿ ಪತ್ರ ಅಮಾನತುಗೊಳಿಸಲಾಗುವುದು.

ಅಪಘಾತ ಇಳಿಮುಖ?: ರಾಜ್ಯದಲ್ಲಿ ಕಳೆದ ಒಂದು ವರ್ಷದಲ್ಲಿ ಅಪಘಾತಗಳ ಪ್ರಮಾಣ ಶೇ.9.7 ಇಳಿಮುಖವಾಗಿದೆ. ರಾಜ್ಯದಲ್ಲಿ 2016ರಲ್ಲಿ 44,403 ಅಪಘಾತಗಳು ಸಂಭವಿಸಿ, ಅದರಲ್ಲಿ 11,133 ಮಂದಿ ಮೃತಪಟ್ಟಿದ್ದರು. 2017ರಲ್ಲಿ ಅಪಘಾತಗಳ ಸಂಖ್ಯೆ 31,658 ಆಗಿದ್ದು, 7,640 ಮಂದಿ ಮೃತಪಟ್ಟಿದ್ದಾರೆ.