ಮಾಸ್ಕೋದಲ್ಲಿ ಡಿಜಿಟಲ್‌ ಪಾಸ್‌

ಮಣಿಪಾಲ: ಕೋವಿಡ್ -19 ವೈರಸ್‌ ಪೀಡಿತ ಮಾಸ್ಕೋ ಲಾಕ್‌ ಡೌನ್‌ ಕ್ರಮಗಳನ್ನು ಜಾರಿಗೊಳಿಸಿದೆ. ಆದರೆ ಜನಸಂಚಾರಕ್ಕೆ ಯಾವುದೇ ತೊಂದರೆಯಾಗದ ರೀತಿಯಲ್ಲಿ ರಷ್ಯಾ ಸರಕಾರ ಕಾರ್ಯಪ್ರವೃತವಾಗಿದೆ. ಇದಕ್ಕಾಗಿ 21 ಕಡೆಗಳಲ್ಲಿ ಡಿಜಿಟಲ್‌ ಟ್ರಾವೆಲ್‌ ಪಾಸ್‌ಗಳನ್ನು ನೀಡಲು ನಿರ್ಧರಿಸಿದೆ. ಅಗತ್ಯ ವಸ್ತುಗಳಿಗೆ ಸಂಚರಿಸುವವರಿಗೆ ಅನುಕೂಲ ಕಲ್ಪಿಸುವುದು ನಮ್ಮ ಉದ್ದೇಶ ಎಂದಿದ್ದಾರೆ ಮೇಯರ್‌ ಸೆರ್ಗೆಯ್‌ ಸೋಬಯಾನಿನ್‌. ಇವರು ರಷ್ಯಾ ಸರಕಾರದ ಕೊರೊನಾ ವೈರಸ್‌ ಕಾರ್ಯಪಡೆಯ ನೇತೃತ್ವ ವಹಿಸಿದ್ದಾರೆ.

ಡಿಜಿಟಲ್‌ ಪಾಸ್‌ ಬಳಕೆಯನ್ನು ವಿಮಾನಯಾನ, ರೈಲು ಮತ್ತು ಇಂಟರ್ಸಿಟಿ ಹಾಗೂ ಪ್ರಾದೇಶಿಕ ಬಸ್‌ ಸಾರಿಗೆ ಯಲ್ಲೂ ಮಾಡಬಹುದು. ಈಗಾಗಲೇ ಮಾಸ್ಕೋದ ಏಳು ಪ್ರದೇಶಗಳಲ್ಲಿ ಪಾಸ್‌ ವ್ಯವಸ್ಥೆ ಪರಿಚಯಿಸಲಾಗಿದೆ. ಉತ್ತರ ಕಾಕಸಸ್‌, ಸೈಬೀರಿಯಾ ಮತ್ತು ಫಾರ್‌ ಈಸ್ಟ್‌ ಸೇರಿದಂತೆ 14 ಪ್ರದೇಶಗಳಲ್ಲಿ ಮುಂದಿನ ವಾರ ಆರಂಭವಾಗಲಿದೆ. ಈ ಡಿಜಿಟಲ್‌ ಪಾಸ್‌ ತಂತ್ರಜ್ಞಾನವು ಸ್ಮಾಟೊ ಫೋನ್‌ ಆ್ಯಪ್‌ ಅನ್ನು ಆಧರಿಸಿದೆ. ಈಗಾಗಲೇ ಸುಮಾರು 10 ಲಕ್ಷ ಬಹು-ಬಳಕೆಯ ಪಾಸ್‌ಗಳನ್ನು ನೀಡಿದ್ದು, ಪ್ರತಿದಿನ ಸುಮಾರು 4 ಲಕ್ಷ ಏಕ-ಬಳಕೆಯ (ಸಿಂಗಲ್‌ ಯೂಸ್‌) ಪಾಸ್‌ಗಳನ್ನು ನೀಡಲಾಗುತ್ತಿದೆ. ಕಳೆದ ವಾರ ಮಾಸ್ಕೋದ ಮೆಟ್ರೋ ನಿಲ್ದಾಣದಲ್ಲಿ ಅನೇಕ ಪ್ರಯಾಣಿಕರು ತಮ್ಮ ಪಾಸ್‌ಗಳನ್ನು ಅಧಿಕಾರಿಗಳಿಗೆ ತೋರಿಸಲು ನಿಂತಿದ್ದರು. ಈ ವೇಳೆ ಸಾಮಾಜಿಕ ಅಂತರ ಕಾಯ್ದು ಕೊಳ್ಳದೇ ಇದ್ದದ್ದು ಟೀಕೆಗೆ ಗುರಿಯಾಗಿತ್ತು. ರಷ್ಯಾದಲ್ಲಿ ಈ ತನಕ ಸುಮಾರು 57,999 ಕೊರೊನಾ ಸೋಂಕಿತರು ಪತ್ತೆಯಾಗಿದ್ದಾರೆ.