Gautam Adani: ಯುಪಿಎ ಅವಧಿಯಲ್ಲಿ ರಾಹುಲ್‌ ಭೇಟಿಗೆ ಯತ್ನಿಸಿದ್ದರೇ ಅದಾನಿ?

ನವದೆಹಲಿ: “ಕಾಂಗ್ರೆಸ್‌ ನೇತೃತ್ವದ ಯುಪಿಎ ಸರ್ಕಾರ ಅಧಿಕಾರದಲ್ಲಿದ್ದಾಗ ಅದಾನಿ ಗ್ರೂಪ್‌ ಅಧ್ಯಕ್ಷ ಗೌತಮ್‌ ಅದಾನಿ ಅವರು ರಾಹುಲ್‌ ಗಾಂಧಿ ಅವರನ್ನು ಭೇಟಿಯಾಗಲು ಮುಂದಾಗಿದ್ದರು. ಅದಕ್ಕಾಗಿ ಅಹ್ಮದ್‌ ಪಟೇಲ್‌, ಕಮಲ್‌ನಾಥ್‌ ನೆರವು ಕೋರಿದ್ದರು. ಆದರೆ ಭೇಟಿಗೆ ಕೊನೆಗೂ ರಾಹುಲ್‌ ಒಪ್ಪಲೇ ಇಲ್ಲ.’

ಪತ್ರಕರ್ತ ರಾಜ್‌ದೀಪ್‌ ಸರ್ದೇಸಾಯಿ ಬರೆದ “2024: ದ ಇಲೆಕ್ಷನ್‌ ದ್ಯಾಟ್‌ ಸರ್‌ಪ್ರೈಸ್ಡ್ ಇಂಡಿಯಾ’ ಎಂಬ ಕೃತಿಯಲ್ಲಿ ಈ ಕುತೂಹಲಕಾರಿ ಅಂಶವನ್ನು ಉಲ್ಲೇಖಿಸಲಾಗಿದೆ. ಆರಂಭದಲ್ಲಿ ರಾಬರ್ಟ್‌ ವಾದ್ರಾ ಮೂಲಕ ಅವರನ್ನು ಸಂಪರ್ಕಿಸಲು ಯತ್ನಿಸಿದ್ದರು. ಜತೆಗೆ ಗುಜರಾತ್‌ನಲ್ಲಿರುವ ಮುಂದ್ರಾ ಬಂದರಿಗೆ ರಾಹುಲ್‌ರನ್ನು ಆಹ್ವಾನಿಸಿದ್ದರು. ಆದರೆ ಅದು ಯಶಸ್ವಿಯಾಗಲಿಲ್ಲ ಎಂದು ಪುಸ್ತಕದಲ್ಲಿ ಬರೆಯಲಾಗಿದೆ.

ಎಡಪಂಥೀಯ ಚಿಂತನೆ ಇರುವ ಕೆಲವು ಕಾಂಗ್ರೆಸ್‌ ನಾಯಕರು ತಮ್ಮ ಬಗ್ಗೆ ರಾಹುಲ್‌ ಗಾಂಧಿಯವರಲ್ಲಿ ತಪ್ಪು ಅಭಿಪ್ರಾಯ ಮೂಡಿಸಿದ್ದಾರೆ. ಹೀಗಾಗಿಯೇ ಪ್ರಧಾನಿ ಮೋದಿ ಮತ್ತು ಅದಾನಿಯವರ ಸ್ನೇಹದ ಬಗ್ಗೆ ತಪ್ಪು ಮಾಹಿತಿಯನ್ನು ಅವರು ಪ್ರಸ್ತಾಪಿಸುತ್ತಿದ್ದಾರೆ. ಈ ಬಗ್ಗೆ ಅದಾನಿಯವರಿಗೂ ಸ್ಪಷ್ಟ ಮಾಹಿತಿ ಇತ್ತು ಎಂದು ಸರ್ದೇಸಾಯಿ ಬರೆದಿದ್ದಾರೆ.