ಧೂಮಲ್‌ ಹಿಮಾಚಲ ಬಿಜೆಪಿ ಸಿಎಂ ಅಭ್ಯರ್ಥಿ

ಸೋಲನ್‌: ಹಿಮಾಚಲ ಪ್ರದೇಶ ಚುನಾವಣೆಗಾಗಿ ಬಿಜೆಪಿ ಮುಖ್ಯಮಂತ್ರಿ ಅಭ್ಯರ್ಥಿಯನ್ನು ಪ್ರಕಟಿಸಿದ್ದು, ಮಾಜಿ ಮುಖ್ಯಮಂತ್ರಿ ಪ್ರೇಮ್‌ ಕುಮಾರ್‌ ಧೂಮಲ್‌ (73)ಹೆಸರನ್ನು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಘೋಷಿಸಿದ್ದಾರೆ. ಮಂಗಳವಾರ ಸೋಲನ್‌ ಜಿಲ್ಲೆಯ ರಾಜಗಡದಲ್ಲಿ ಆಯೋಜಿಸಲಾಗಿದ್ದ ರ್ಯಾಲಿಯಲ್ಲಿ ಅವರು ಈ ಘೋಷಣೆ ಮಾಡಿದ್ದಾರೆ.

ಡಿ.18ರಂದು ಫ‌ಲಿತಾಂಶ ಪ್ರಕಟವಾಗಲಿದ್ದು, ಈಗ ಮಾಜಿ ಸಿಎಂ ಆಗಿರುವ ಧೂಮಲ್‌, ಫ‌ಲಿತಾಂಶದ ಬಳಿಕ ಮುಖ್ಯಮಂತ್ರಿ ಸ್ಥಾನ ಅಲಂಕರಿಸಲಿದ್ದಾರೆ ಎನ್ನುವ ಮೂಲಕ ಶಾ ಅವರು ಹಿಮಾಚಲದಲ್ಲಿ ಬಿಜೆಪಿಯದ್ದೇ ಗೆಲುವು ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಈ ಹಿಂದೆ ಸಿಎಂ ಸ್ಥಾನಕ್ಕೆ ಕೇಂದ್ರ ಆರೋಗ್ಯ ಸಚಿವ ಜೆ.ಪಿ.ನಡ್ಡಾರ ಹೆಸರು ಕೇಳಿಬಂದಿತ್ತು.

ಆದರೆ ಸೋಮವಾರ ನಡೆದಿದ್ದ ಹಿಮಾಚಲ ಪ್ರದೇಶ ಬಿಜೆಪಿ ಸಭೆಯಲ್ಲಿ ಪ್ರೇಮ್‌ ಕುಮಾರ್‌ ಧೂಮಲ್‌ ಹೆಸರಿಗೆ ಹೆಚ್ಚಿನ ಒಲವು ವ್ಯಕ್ತ ವಾಯಿತು. ಜತೆಗೆ ಇತ್ತೀಚೆಗಿನ ಸಮೀಕ್ಷೆಗಳ ಪ್ರಕಾರವೂ ಮಾಜಿ ಸಿಎಂ ಹೆಸರೇ ಮೊದಲ ಸ್ಥಾನದಲ್ಲಿತ್ತು.