ಡಾ. ರಾಜ್‌ಕುಮಾರ್‌ ಮೊಮ್ಮಗ, ಪೂರ್ಣಿಮಾ ಮತ್ತು ರಾಮಮಾರ್‌ ಪುತ್ರ ಧೀರೇನ್‌ ರಾಮ್ ಕುಮಾರ್ ಅಭಿನಯದ ಚೊಚ್ಚಲ ಸಿನಿಮಾ “ಶಿವ 143′ ಬಿಡುಗಡೆಗೆ ಸಿದ್ಧವಾಗಿದ್ದು, ಇದೇ ಆಗಸ್ಟ್‌ 26ಕ್ಕೆ ತೆರೆಗೆ ಬರುತ್ತಿದೆ. ಈ ಮೂಲಕ ವರನಟ ಡಾ. ರಾಜಕುಮಾರ್‌ ಕುಟುಂಬದ ಮೂರನೇ ತಲೆಮಾರಿನ ಮತ್ತೂಂದು ಕುಡಿ ಚಂದನವನಕ್ಕೆ ಕಾಲಿಡುತ್ತಿದೆ.
ಈಗಾಗಲೇ ರಾಜ್‌ ಕುಟುಂಬದ ಮೂರನೇ ತಲೆಮಾರಿನ ಪ್ರತಿಭೆಗಳಾದ ವಿನಯ್‌ ರಾಜಕುಮಾರ್‌, ಯುವರಾಜಕುಮಾರ್‌, ಧನ್ಯಾ ರಾಮ್ ಕುಮಾರ್ ಕಲಾವಿದರಾಗಿ ಚಿತ್ರರಂಗಕ್ಕೆ ಪರಿಚಯವಾಗಿದ್ದಾರೆ. ಈಗ ಈ ಸಾಲಿಗೆ ರಾಜ್‌ ಕುಟುಂಬದ ಧೀರೇನ್‌ ರಾಮಕುಮಾರ್‌ ಅವರ ಹೆಸರು ಸೇರ್ಪಡೆಯಾಗುತ್ತಿದೆ ಅದು “ಶಿವ 143′ ಸಿನಿಮಾದ ಮೂಲಕ.
ಹೌದು, ಔಟ್ ಆ್ಯಂಡ್‌ ಔಟ್ ಲವ್‌ ಕಂ ಆ್ಯಕ್ಷನ್‌-ಥ್ರಿಲ್ಲರ್‌ ಕಥಾಹಂದರ ಹೊಂದಿರುವ “ಶಿವ 143′ ಸಿನಿಮಾದಲ್ಲಿ ಧೀರೇನ್‌ ರಾಮಕುಮಾರ್‌ ಮಾಸ್‌ ಹೀರೋ ಲುಕ್‌ನಲ್ಲಿ ಸ್ಯಾಂಡಲ್‌ವುಡ್‌ ಸಿನಿಪ್ರಿಯರ ಮುಂದೆ ಬರಲಿದ್ದಾರೆ.
ಸಿನಿಮಾದಲ್ಲಿ ಧೀರೇನ್‌ ಅವರಿಗೆ ಮಾನ್ವಿತಾ ಕಾಮತ್ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಚರಣ್‌ ರಾಜ್‌, ಚಿಕ್ಕಣ್ಣ, ಸಾಧು ಕೋಕಿಲ, ಅವಿನಾಶ್‌ ಮುಂತಾದ ಕಲಾವಿದರ ಬೃಹತ್‌ ತಾರಾಗಣ ಸಿನಿಮಾದಲ್ಲಿದೆ.
“ಜಯಣ್ಣ ಫಿಲಂಸ್‌’ ಬ್ಯಾನರ್‌ನಲ್ಲಿ ಜಯಣ್ಣ, ಭೋಗೇಂದ್ರ ಅದ್ಧೂರಿಯಾಗಿ ನಿರ್ಮಿಸುತ್ತಿರುವ “ಶಿವ 143′ ಸಿನಿಮಾಕ್ಕೆ ಅನಿಲ್‌ ಕುಮಾರ್ ನಿರ್ದೇಶನವಿದೆ
