ದೇವದುರ್ಗ: ಪಟ್ಟಣದಲ್ಲಿ ಅನಾವರಣಗೊಂಡ ಡಾ| ಬಿ.ಆರ್‌. ಅಂಬೇಡ್ಕರ್‌, ಮಹರ್ಷಿ ವಾಲ್ಮೀಕಿ, ಜಗಜ್ಯೋತಿ ಬಸವಣ್ಣ ಸೇರಿ ಮಹಾನ್‌ ನಾಯಕರ ಪ್ರತಿಮೆಗಳಿಗೆ ಸಿಸಿ ಕ್ಯಾಮೆರಾ, ಸೂಕ್ತ ಬಂದೋಬಸ್ತ್ ಒದಗಿಸಲು ತಾಲೂಕು ಆಡಳಿತ ಮರೆತಂತಿದೆ.
ಕೇವಲ ಜಯಂತಿಗೆ ಮೀಸಲಾದ ಜನಾಂಗದ ಮುಖಂಡರು ಎಂಬ ಆರೋಪ ಎಲ್ಲೆಡೆ ಕೇಳಿಬರುತ್ತಿದ್ದು, ಕಿಡಿಗೇಡಿಗಳಿಂದ ಆಗಾಗ ಅಪಮಾನಕರ ಘಟನೆಗಳು ಜರುಗುತ್ತಲೇ ಇವೆ. ಮಾಜಿ ಸಿಎಂ ಸಿದ್ದರಾಮಯ್ಯ ಪಟ್ಟಣದಲ್ಲಿ ಪ್ರತಿಮೆ ಅನಾವರಣಗೊಳಿಸಿ ಐದು ವರ್ಷಗಳೇ ಕಳೆದರೂ ಇಲ್ಲಿವರೆಗೆ ಯಾವುದೇ ಭದ್ರತೆ ಇಲ್ಲದಂತಾಗಿದೆ. ಮಾನಸಿಕ ಅಸ್ವಸ್ಥನೊಬ್ಬ ಡಾ| ಬಿ.ಆರ್‌. ಅಂಬೇಡ್ಕರ್‌ ಮೂರ್ತಿಗೆ ಅಪಮಾನ ಮಾಡಿದ್ದರಿಂದ ತಡ ರಾತ್ರಿವರೆಗೆ ವೃತ್ತದಲ್ಲಿ ದಲಿತ ಸಂಘಟನೆಗಳು ರಸ್ತೆಯಲ್ಲಿ ಟೈರ್‌ಗೆ ಬೆಂಕಿ ಹಚ್ಚಿ ಹೋರಾಟ ನಡೆಸಿವೆ. ಆದರೆ ಸಂಘಟನೆ ಪದಾಧಿಕಾರಿಗಳು ಇಂಥ ಘಟನೆ ಮರುಕಳಿಸದಂತೆ ಇಲ್ಲಿ ಸಿಸಿ ಕ್ಯಾಮೆರಾ, ಭದ್ರತೆ ನಿಯೋಜಿಸಬೇಕು ಎಂಬ ಗಟ್ಟಿಧ್ವನಿ ಈಗ ಮೌನವಾಗಿದೆ.
ಭದ್ರತೆ ಇಲ್ಲ: ಡಾ| ಬಿ.ಆರ್‌. ಅಂಬೇಡ್ಕರ್‌, ಮಹರ್ಷಿ ವಾಲ್ಮೀಕಿ, ಬಸವಣ್ಣ ಸೇರಿ ಜಯಂತಿ ಆಚರಣೆಯಂದು ಪ್ರತಿಮೆಗಳು ಶೃಂಗಾರಗೊಂಡು ಸಮಾಜದ ಮುಖಂಡರು ಗುಣಗಾನ ಮಾಡುವುದು ಬಿಟ್ಟರೆ ಉಳಿದ ದಿನ ಮರೆತು ಬಿಡುತ್ತಾರೆ. ಇದರಿಂದ ಪ್ರತಿಮೆಗಳಿಗೆ ರಕ್ಷಣೆ ಇಲ್ಲದಾಗಿದೆ. ಅಲ್ಲಲ್ಲಿ ಅಹಿತಕರ ಘಟನೆಗಳು ಜರುಗಿದರೂ ಜಿಲ್ಲಾಡಳಿತ ಮತ್ತು ತಾಲೂಕು ಆಡಳಿತ ಶಾಶ್ವತ ಪರಿಹಾರ ಒದಗಿಸುವಲ್ಲಿ ಹಿಂದೇಟು ಹಾಕುವುದರಿಂದ ಇಂದಿಗೂ ಭದ್ರತೆ ವ್ಯವಸ್ಥೆ ಇಲ್ಲದಂತಾಗಿದೆ.
ಕಿಡಿಗೇಡಿಗಳಿಂದ ಯಾವುದೇ ಘಟನೆ ಜರುಗದಂತೆ ಸೂಕ್ತ ರಕ್ಷಣೆ ಒದಗಿಸುವಲ್ಲಿ ತಾಲೂಕು ಆಡಳಿತ ಸಂಪೂರ್ಣ ವಿಫಲವಾಗಿದೆ ಎನ್ನುವ ಆರೋಪ ಬಲವಾಗಿದ್ದು, ಪುರಸಭೆ ಆಡಳಿತ ಮಂಡಳಿ ಕೂಡ ಕೈಕಟ್ಟಿ ಕುಳಿತಿದೆ ಎನ್ನುವ ಮಾತುಗಳು ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿವೆ.
ವರ್ಗಾವಣೆಗೊಂಡ ಅಧಿಕಾರಿ ಫೆರೋಜ್‌ ಖಾನ್‌ ಪ್ರತಿಮೆಗಳ ಸುತ್ತ ಸಿಸಿ ಕ್ಯಾಮೆರಾ ಅಳವಡಿಸಲು ಈಗಾಗಲೇ 10 ಲಕ್ಷ ಅನುದಾನಕ್ಕೆ ಪ್ರಸ್ತಾವನೆ ಕಳಿಸಲಾಗಿದೆ ಎಂದು ಹೇಳುತ್ತಲೇ ವರ್ಗವಣೆಗೊಂಡರು ಎಂಬ ಆರೋಪ ಕೂಡ ಎಲ್ಲರಲ್ಲಿದೆ. ಎಲ್ಲ ಸಮುದಾಯದ ಮುಖಂಡರು ಸಭೆ ಕರೆದು ಒಗ್ಗಟ್ಟು ಪ್ರದರ್ಶಿಸುವ ಮೂಲಕ ಸೂಕ್ತ ವ್ಯವಸ್ಥೆ ಕಲ್ಪಿಸುವಂತೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಚುರುಕು ಮುಟ್ಟಿಸಬೇಕು ಎಂಬ ಕೂಗು ಕಮರಿ ಹೋಗಿದೆ. ಹೀಗಾಗಿ ತಾಲೂಕು ಆಡಳಿತ ಪುರಸಭೆ, ಪೊಲೀಸ್‌ ಇಲಾಖೆ ಜಾಣ ಕುರುಡು ಪ್ರದರ್ಶಿಸುತ್ತಿದೆ ಎಂದು ವಿದ್ಯಾರ್ಥಿ ಬಸವರಾಜ, ಸಂಜೀವ ಆರೋಪಿಸಿದ್ದಾರೆ.
