ಮದ್ಯದ ಅಮಲಿನಲ್ಲಿ ಸ್ನೇಹಿತನನ್ನೇ ಕೊಂದವರ ಬಂಧನ

ಬೆಂಗಳೂರು: ಮದ್ಯದ ಅಮಲಿನಲ್ಲಿ ಕ್ಷುಲ್ಲಕ ವಿಚಾರಕ್ಕೆ ಸ್ನೇಹಿತನನ್ನೇ ಚಾಕುವಿನಿಂದ ಇರಿದು ಹತ್ಯೆಗೈದಿರುವ ಜೀವನ್‌ಬಿಮಾ ನಗರ ಠಾಣಾ ವ್ಯಾಪ್ತಿಯ ಅಂಬೇಡ್ಕರ್‌ ಕಾಲೋನಿಯಲ್ಲಿ ಭಾನುವಾರ ತಡರಾತ್ರಿ ನಡೆದಿದೆ.

ಜಿ.ಎಂ.ಪಾಳ್ಯ ನಿವಾಸಿ ಪ್ರವೀಣ್‌ ಕುಮಾರ್‌ (22) ಮೃತ ಯುವಕ. ಈ ಸಂಬಂಧ ಜಿ.ಪಾಳ್ಯದ ಚಂದ್ರಶೇಖರ್‌ (22) ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಮೃತ ಪ್ರವೀಣ್‌ ಮತ್ತು ಚಂದ್ರಶೇಖರ್‌ ಆಪ್ತ ಸ್ನೇಹಿತರಾಗಿದ್ದು, ಭಾನುವಾರ ಮತ್ತೂಬ್ಬ ಸ್ನೇಹಿತ ವಿನೋದ್‌ನ ಜನ್ಮದಿನವಾದ ಕಾರಣ ಆತನ ಮನೆಯಲ್ಲಿ ಐದು ಮಂದಿ ಸ್ನೇಹಿತರು ಪಾರ್ಟಿ ಮಾಡಿದ್ದರು. ಮದ್ಯದ ಅಮಲಿನಲ್ಲಿ ಪ್ರವೀಣ್‌ ಮತ್ತು ಚಂದ್ರಶೇಖರ್‌ ಕಿತ್ತಾಡಿಕೊಂಡಿದ್ದರು.

ಜತೆಗಿದ್ದ ಸ್ನೇಹಿತರು ಇಬ್ಬರ ನಡುವಿನ ಜಗಳ ಬಿಡಿಸಿ ಬಳಿಕ ಮಲಗಿಕೊಂಡಿದ್ದರು. ರಾತ್ರಿ 12.30ರ ಸುಮಾರಿಗೆ ಪ್ರವೀಣ್‌ ಮಲಗಿದ್ದ ವೇಳೆಯಲ್ಲಿ ಚಂದ್ರಶೇಖರ್‌ ಆತನ ಎದೆಗೆ ಚಾಕುವಿನಿಂದ ಇರಿದಿದ್ದಾನೆ. ತೀವ್ರ ರಕ್ತಸ್ರಾವವಾಗಿ ಬಿದ್ದಿದ್ದ ಪ್ರವೀಣ್‌ನನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಿದ್ದು, ಚಿಕಿತ್ಸೆ ಫ‌ಲಿಸದೆ ಮೃತಪಟ್ಟಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಸಂಬಂಧ ಜೀವನ್‌ಬಿಮಾನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.