Shimoga: ಶಿವಮೊಗ್ಗದಲ್ಲಿ ದಟ್ಟ ಮಂಜು: ವಿಮಾನ ರದ್ದು

ಶಿವಮೊಗ್ಗ: ಮಂಜು ಕವಿದ ವಾತಾವರಣದಿಂದಾಗಿ ಗುರುವಾರ ಶಿವಮೊಗ್ಗದ ಸೋಗಾನೆ ವಿಮಾನ ನಿಲ್ದಾಣಕ್ಕೆ ಎರಡು ವಿಮಾನಗಳು ತಡವಾಗಿ ಆಗಮಿಸಿದ್ದು, ಒಂದು ಮಾರ್ಗದ ಪ್ರಯಾಣ ರದ್ದುಪಡಿಸಲಾಯಿತು.

ಮಧ್ಯಾಹ್ನದವರೆಗೂ ಮಂಜು ಕವಿದ ವಾತಾವರಣ ಇದ್ದ ಕಾರಣ ಬೆಂಗಳೂರಿನಿಂದ ಶಿವಮೊಗ್ಗಕ್ಕೆ 11.05ಕ್ಕೆ ಆಗಮಿಸಬೇಕಿದ್ದ ವಿಮಾನ ಮಧ್ಯಾಹ್ನ 1.48ಕ್ಕೆ ಆಗಮಿಸಿತು. ಹೈದರಾಬಾದ್‌ನಿಂದ ಶಿವಮೊಗ್ಗಕ್ಕೆ 10.35ಕ್ಕೆ ಬರಬೇಕಿದ್ದ ಸ್ಟಾರ್‌ ಏರ್‌ ವಿಮಾನ ಮಧ್ಯಾಹ್ನ 2 ಗಂಟೆಗೆ ಆಗಮಿಸಿತ್ತು. ಹೈದರಾಬಾದ್‌ನಿಂದ ಬಂದ ವಿಮಾನ ಮತ್ತೆ ತಿರುಪತಿಗೆ ಹೋಗಿ ವಾಪಸ್‌ ಬಂದು, ಬಳಿಕ ಗೋವಾಕ್ಕೆ ತೆರಳಬೇಕಿತ್ತು. ಆದರೆ ವಿಮಾನ ಶಿವಮೊಗ್ಗಕ್ಕೆ 3 ಗಂಟೆ ತಡವಾಗಿ ಆಗಮಿಸಿದ್ದರಿಂದ ಗೋವಾ ಸಂಚಾರವನ್ನು ರದ್ದು ಮಾಡಲಾಯಿತು.

ರನ್‌ ವೇ ಸರಿಯಾಗಿ ಗೋಚರಿಸದ ಕಾರಣ ಈಗಾಗಲೇ ಅನೇಕ ಬಾರಿ ವಿಮಾನ ಇಳಿಯಲು ತೊಂದರೆಯಾಗಿದೆ. ಚಳಿ ಹೆಚ್ಚಿದಂತೆ ಇದು ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ನೈಟ್‌ ಲ್ಯಾಂಡಿಂಗ್‌, ವಿಸಿಬಿಲಿಟಿ ಕಾಮಗಾರಿಗಳು ಮುಗಿದರೆ ಸಮಸ್ಯೆ ಪರಿಹಾರವಾದೀತು.