ಅಂಬೇವಾಡಿ-ಮೌಳಂಗಿ ರಸ್ತೆ ದುರಸ್ತಿಗೆ ಆಗ್ರಹ

ದಾಂಡೇಲಿ: ದಾಂಡೇಲಿ-ಜೋಯಿಡಾ ತಾಲೂಕಿನ ಪ್ರವಾಸೋದ್ಯಮಕ್ಕೆ ಮಹ್ವತದ ಕೊಡುಗೆ ನೀಡುತ್ತಿರುವ ಮೌಳಂಗಿ ಇಕೋ ಪಾರ್ಕಿಗೆ ಹೋಗುವ ಅಂಬೇವಾಡಿ-ಮೌಳಂಗಿ ರಸ್ತೆ ಹದಗೆಟ್ಟು ವರ್ಷ ಮೂರು ಸಂದರೂ ಊರಿನ ರಸ್ತೆ ದುರಸ್ತಿಯಾಗದಿರುವುದರ ಬಗ್ಗೆ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ.

ಸ್ಥಳೀಯ ಅಂಬೇವಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷರು ಸಹಿತ ಸ್ಥಳೀಯರು ಸೇರಿ ಶಾಸಕ ರಸ್ತೆ ದುರಸ್ತಿಗೆ ಮನವಿ ಮಾಡಿದ್ದರು. ಸ್ಥಳೀಯ ಗ್ರಾಮಸ್ಥರು ಸೇರಿ ಪ್ರತಿಭಟನೆಯನ್ನು ನಡೆಸಿ ರಸ್ತೆ ದುರಸ್ತಿಗಾಗಿ ಆಗ್ರಹಿಸಿದ್ದರು. ಆದರೆ ಇದು ಪರಿಗಣನೆಗೆ ಬರದಿರುವುದರಿಂದ ರಸ್ತೆ ಮತ್ತೆ ಮತ್ತೆ ಹದಗೆಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಮೌಳಂಗಿ ಇಕೋ ಪಾರ್ಕ್ ನೋಡಲು ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಬರುತ್ತಿದ್ದು, ಬರುವಾಗ ಹೊಂಡ ಗುಂಡಿಗಳಿಂದ ಕೂಡಿದ ಈ ರಸ್ತೆಯನ್ನು ನೋಡಿ ಹಿಡಿಶಾಪ ಹಾಕುತ್ತಿರುವುದು ಮಾಮುಲಿ ಎಂಬಂತಾಗಿದೆ. ಈ ರಸ್ತೆ ನೋಡಿ ಇಕೋ ಪಾರ್ಕಿಗೆ ಯಾಕೆ ಹೋಗಬೇಕೆಂಬ ಮಾತು ಕೇಳಿ ಬರತೊಡಗಿದೆ. ಈ ರಸ್ತೆ ದುರಸ್ತಿಗೆ ಇನ್ನಾದರೂ ಕ್ರಮ ಕೈಗೊಂಡು ಸ್ಥಳೀಯರ ನೋವಿಗೆ ಸ್ಪಂದಿಸಬೇಕೆಂಬ ಆಗ್ರಹ ಕೇಳಿಬರುತ್ತಿದೆ.