ಸರ್ಟಿಫಿಕೇಟ್‌ ಪಡೆಯದೆ ಕಾರ್ಯಕ್ರಮ ಪ್ರಸಾರ ಕೂಡದು: ನಮೋ ಟಿವಿಗೆ ದಿಲ್ಲಿ ಸಿಇಓ

ಹೊಸದಿಲ್ಲಿ : ನಮೋ ಟಿವಿಯಲ್ಲಿ ಪ್ರಸಾರವಾಗುವ ಎಲ್ಲ ಮುದ್ರಿತ ಕಾರ್ಯಕ್ರಮಗಳ ಪ್ರಸಾರಕ್ಕೆ ಮೊದಲು ಅವುಗಳಿಗೆ ಸರ್ಟಿಫಿಕೇಟ್‌ ಪಡೆಯತಕ್ಕದ್ದು ಎಂದು ಚುನಾವಣಾ ಆಯೋಗ ಅಪ್ಪಣೆ ಕೊಡಿಸಿರುವ ಎರಡು ದಿನಗಳ ತರುವಾಯ ದಿಲ್ಲಿ ಚುನಾವಣಾ ಸಂಸ್ಥೆ ನಮೋ ಟಿವಿಯಲ್ಲಿ ಯಾವುದೇ ಮುದ್ರಿತ ಕಾರ್ಯಕ್ರಮಗಳನ್ನು ಪ್ರಸಾರಿಸುವ ಮುನ್ನ ತನ್ನ ಸರ್ಟಿಫಿಕೇಟನ್ನು ಕಡ್ಡಾಯವಾಗಿ ಪಡೆದುಕೊಳ್ಳುವಂತೆ ಬಿಜೆಪಿಗೆ ಆದೇಶಿಸಿದೆ.

ದಿಲ್ಲಿಯ ಚುನಾವಣಾ ವಿಚಕ್ಷಣ ಸಮಿತಿಯಿಂದ ಈ ವರೆಗೆ ಸರ್ಟಿಫಿಕೇಟ್‌ ಪಡೆಯದಿರುವ ಎಲ್ಲ ಮುದ್ರಿತ ಕಾರ್ಯಕ್ರಮಗಳನ್ನು ತತ್‌ಕ್ಷಣವೇ ತೆಗೆದುಹಾಕಬೇಕು ಎಂದು ದಿಲ್ಲಿ ಚುನಾವಣಾ ಸಂಸ್ಥೆ ಬಿಜೆಪಿಗೆ ಕಟ್ಟುನಿಟ್ಟಾಗಿ ಹೇಳಿದೆ. ನಮೋ ಟಿವಿಯನ್ನು ಬಿಜೆಪಿ ಪ್ರವರ್ತಿಸುತ್ತಿರುವುದರಿಂದ ದಿಲ್ಲಿ ಸಿಇಓ ಆದೇಶಕ್ಕೆ ಅದು ಬದ್ಧವಾಗಿರಬೇಕಾಗಿದೆ.

ಚುನಾವಣಾ ಆಯೋಗದ ನಿರ್ದೇಶದ ಪ್ರಕಾರ ದಿಲ್ಲಿಯ ಮುಖ್ಯ ಚುನಾವಣಾಧಿಕಾರಿ ಬಿಜೆಪಿಗೆ ಪತ್ರ ಬರೆದು ಸರ್ಟಿಫಿಕೇಟ್‌ ಪಡೆದಿರದ ಎಲ್ಲ ಮುದ್ರಿತ ಕಾರ್ಯಕ್ರಮಗಳನ್ನು ತೆಗೆದು ಹಾಕಬೇಕೆಂದೂ ಇನ್ನು ಮುಂದೆ ಪ್ರಸಾರಿಸಲಾಗುವ ಎಲ್ಲ ಕಾರ್ಯಕ್ರಮಗಳಿಗೆ ಮುಂಚಿತವಾಗಿಯೇ ಸರ್ಟಿಫಿಕೇಟ್‌ ಪಡೆದುಕೊಳ್ಳಬೇಕೆಂದೂ ಸ್ಪಷ್ಟಪಡಿಸಿದೆ.