ಬೆಮೆಲ್‌ ಜತೆಗೆ ಕೈ ಜೋಡಿಸಿದ ರಕ್ಷಣ ಇಲಾಖೆ

ಹೊಸದಿಲ್ಲಿ: ಮೇಕ್‌ ಇನ್‌ ಇಂಡಿಯಾ ಯೋಜನೆಗೆ ಇಂಬು ನೀಡುವಲ್ಲಿ ಮತ್ತೂಂದು ಹೆಜ್ಜೆಯನ್ನಿಟ್ಟಿರುವ ರಕ್ಷಣ ಇಲಾಖೆ, ಬೆಂಗಳೂರಿನ ಭಾರತ್‌ ಅರ್ತ್‌ ಮೂವರ್ಸ್‌ ಸಂಸ್ಥೆಯ (ಬೆಮೆಲ್‌) ಜತೆಗೆ ಒಪ್ಪಂದ ಮಾಡಿಕೊಂಡಿದೆ.

ಇತ್ತೀಚೆಗೆ ಗಾಲ್ವಾನ್‌ ಕಣಿವೆಯಲ್ಲಿ ಚೀನದೊಂದಿಗೆ ಮುಖಾಮುಖಿಯಾದಾಗ ಅಲ್ಲಿನ ದುರ್ಗಮ ಹಾದಿಯಲ್ಲಿ ಮುಂದುವರಿಯಲು ಟ್ಯಾಂಕರ್‌ಗಳಿಗೆ ಅಡಚಣೆಯಾಗಿದ್ದರಿಂದ ನೇಗಿಲು ಮಾದರಿಯ ಸಲಕರಣೆಯನ್ನು ಜೋಡಿಸಲು ನಿರ್ಧರಿಸಿದ್ದು, ಅದರಂತೆ ಸೇನೆಯ ಇಂಡಿಯನ್‌ ಆರ್ಮ್ಡ್ ಕಾರ್ಪ್ಸ್ ತುಕಡಿ ಬಳಸುವ ಟಿ-90 ಎಸ್‌/ಎಸ್‌ಕೆ ಮಾದರಿಯ ಟ್ಯಾಂಕರ್‌ ಗಳಿಗೆ 1,512 ಕಬ್ಬಿಣದ ನೇಗಿಲುಗಳ ಮಾದರಿಯ ಸಾಮಗ್ರಿಗಳನ್ನು ತಯಾರಿಸಿಕೊಡುವಂತೆ ಬೆಮೆಲ್‌ಗೆ ಸೂಚಿಸಿದೆ.

557 ಕೋ.ರೂ. ಮೊತ್ತದ ಒಪ್ಪಂದಕ್ಕೆ ರಕ್ಷಣ ಇಲಾಖೆ ಸಹಿ ಹಾಕಿದೆ. 2027ರ ವೇಳೆಗೆ ಈ ಉಪಕರಣಗಳನ್ನು ಬೆಮೆಲ್‌ ಸಂಸ್ಥೆಯು ತಯಾರಿಸಿಕೊಡಲಿದ್ದು, ಅವು ಕಡಿದಾದ ಪರ್ವತ ಶ್ರೇಣಿಗಳಲ್ಲಿ ಉರುಳಿ ಬೀಳುವ ಅಪಾಯವಿಲ್ಲದೆ ಟ್ಯಾಂಕರ್‌ಗಳು ಸಾಗಲು ಸಹಕಾರಿಯಾಗಲಿವೆ.