England: ಇಂಗ್ಲೆಂಡ್‌ನ‌ಲ್ಲಿ ಶಿಶು ಜನನ ಪ್ರಮಾಣ ಇಳಿಕೆ

ಲಂಡನ್‌: ಇಂಗ್ಲೆಂಡ್‌ ಮತ್ತು ವೇಲ್ಸ್‌ನಲ್ಲಿ ನವಜಾತ ಶಿಶುಗಳ ಜನನ ಪ್ರಮಾಣ ಕಳೆದ ಎರಡು ದಶಕಗಳಲ್ಲೇ ಅತ್ಯಂತ ಕಡಿಮೆಯಾಗಿದೆ. ಇನ್ನೊಂದೆಡೆ, 2022ರಲ್ಲಿ ಬ್ರಿಟನ್‌ ಹೊರತುಪಡಿಸಿದ ಪೋಷಕರಿಗೆ ಜನಸಿದ ಮಕ್ಕಳ ಸಂಖ್ಯೆ ಶೇ.23.1ಕ್ಕೆ ಏರಿಕೆಯಾಗಿದೆ. ಈ ಪೈಕಿ ಭಾರತ ಮೂಲದ ಪೋಷಕರಿಂದ ಜನಸಿದ ಮಕ್ಕಳ ಸಂಖ್ಯೆ ಅತ್ಯಧಿಕವಾಗಿದೆ. ಬ್ರಿಟನ್‌ ರಾಷ್ಟ್ರೀಯ ಅಂಕಿಅಂಶಗಳ ಇಲಾಖೆಯ ವರದಿ ಪ್ರಕಾರ, ಪೋಷಕರಿಗೆ ಜನಸಿದ ಮಕ್ಕಳ ಸಂಖ್ಯೆ 2008ರಲ್ಲಿ ಶೇ.16.7ರಷ್ಟಿತ್ತು ಹಾಗೂ 2021ರಲ್ಲಿ ಈ ಸಂಖ್ಯೆ ಶೇ.21.5ರಷ್ಟಿತ್ತು.

ಮತ್ತೂಂದೆಡೆ, ಬ್ರಿಟಿಷ್‌ ಪೋಷಕರಿಗೆ ಜನಸಿದ ಮಕ್ಕಳ ಸಂಖ್ಯೆ 2021ರಲ್ಲಿ ಶೇ.62ರಷ್ಟು ಇದ್ದದ್ದು, 2022ರಲ್ಲಿ ಶೇ.60.3ಕ್ಕೆ ಕುಸಿದಿದೆ. 2022ರಲ್ಲಿ ಬ್ರಿಟಿಷ್‌ ಪೋಷಕರಿಗೆ ಜನಿಸಿದ ಒಟ್ಟು ಮಕ್ಕಳ ಸಂಖ್ಯೆ 6,05,479 ಆಗಿದೆ. ಇದು 2002ರಿಂದ ಇಲ್ಲಿಯವರೆಗಿನ ಅತ್ಯಂತ ಕಡಿಮೆ ಸಂಖ್ಯೆಯಾಗಿದೆ.

ಇದೇ ರೀತಿ 2022ರಲ್ಲಿ ಬ್ರಿಟನ್‌ಯೇತರ ಪೋಷಕರಿಂದ ಜನಸಿದ ಶಿಶುಗಳ ಒಟ್ಟು ಸಂಖ್ಯೆ 1,39,953 ಆಗಿದೆ. ಈ ಸಂಖ್ಯೆ 2021ರಲ್ಲಿ 1,34,308 ಆಗಿತ್ತು. ಈ ಪೈಕಿ ಭಾರತ ಮೂಲದ ಪೋಷಕರಿಂದ ಜನಸಿದ ಶಿಶುಗಳ ಸಂಖ್ಯೆ ಅತ್ಯಧಿಕವಾಗಿದೆ. ನಂತರದ ಸ್ಥಾನದಲ್ಲಿ ರೊಮೇನಿಯಾ ಇದೆ ಎಂದು ವರದಿ ತಿಳಿಸಿದೆ.