ಲಡಾಖ್‌ ಗಡಿಯಲ್ಲಿ ಕಾವಲು ಮುಂದುವರಿಸಲು ನಿರ್ಧಾರ

ಹೊಸದಿಲ್ಲಿ: ಭಾರತ-ಚೀನ ನಡುವಿನ ಗಡಿ ಬಿಕ್ಕಟ್ಟನ್ನು ಇತ್ಯರ್ಥಗೊಳಿಸಲು ಚೀನದ ಸೇನಾಧಿಕಾರಿಗಳು ಸಲ್ಲಿಸಿದ್ದ ಹೊಸ ಸೂತ್ರದ ಪ್ರಸ್ತಾವನೆಯನ್ನು ಭಾರತೀಯ ಸೇನಾಧಿಕಾರಿಗಳು ತಳ್ಳಿಹಾಕಿದ್ದಾರೆ. ಇದರಿಂದ, ಪೂರ್ವ ಲಡಾಖ್‌ ಬಳಿಯ ಭಾರತ-ಚೀನ ಗಡಿಯ ಸುಮಾರು, 1,500 ಕಿ.ಮೀ.ವರೆಗೂ ಭಾರತ ತನ್ನ ಕಾವಲನ್ನು ಇನ್ನೂ ಕೆಲವು ದಿನಗಳ ಕಾಲ ಮುಂದುವರಿಸಲಿದೆ.

ಭಾರತ-ಚೀನ ನಡುವೆ ಈಗಾಗಲೇ ಹಲವಾರು ಸುತ್ತಿನ ಮಾತುಕತೆಗಳು ನಡೆದಿವೆ. ಪ್ರತಿ ಮಾತುಕತೆಯ ವೇಳೆಯೂ ಭಾರತ, ಚೀನಕ್ಕೆ ಗಡಿಯಲ್ಲಿ ಏಪ್ರಿಲ್‌ 20ಕ್ಕೂ ಮೊದಲು ಇದ್ದ ಪರಿಸ್ಥಿತಿಯನ್ನೇ ಪುನಃ ನಿರ್ಮಾಣ ಮಾಡಲು ಸಹಕರಿಸುವಂತೆ ತಾಕೀತು ಮಾಡುತ್ತಾ ಬಂದಿದ್ದಾರೆ. ಇದರ ನಡುವೆಯೇ ಚೀನ, ಗಡಿ ರೇಖೆಯ ಬಳಿಯ ಪ್ರದೇಶಗಳ ಪುನರ್‌ ವಿಂಗಡಿಸುವ ಪ್ರಸ್ತಾವನೆಯನ್ನಿಟ್ಟಿದೆ. ಈ ಪ್ರಸ್ತಾವನೆಯನ್ನು ಭಾರತೀಯ ಸೇನಾಧಿಕಾರಿಗಳು ಸಾರಾಸಗಟಾಗಿ ತಳ್ಳಿಹಾಕಿದ್ದು, ಬಿಕ್ಕಟ್ಟಿಗೂ ಮೊದಲು ಇದ್ದ ಗಡಿ ಪರಿಸ್ಥಿತಿಯೇ ಮುಂದುವರಿಯಬೇಕು ಎಂದಿದ್ದಾರೆ. ಆದರೆ, ಭಾರತದ ತಾಕೀತನ್ನು ಚೀನ ಒಪ್ಪುತ್ತಿಲ್ಲ. ಹಾಗಾಗಿ, ಗಡಿ ರೇಖೆ ಬಳಿ ಭಾರತೀಯ ಸೈನಿಕರ ಜಮಾವಣೆಯನ್ನು ಇನ್ನಷ್ಟು ದಿನ ಮುಂದುವರಿಸಲು ನಿರ್ಧರಿಸಲಾಗಿದೆ.