“ಬಿಗ್‌ ಬಾಸ್’ ಮನೆಯಿಂದ ಹೊರ ಬಂದ ನಂತರ ದಯಾಳ್‌, “ಕರಾಳ ರಾತ್ರಿ’ ಎಂಬ ಚಿತ್ರವನ್ನು ನಿರ್ದೇಶಿಸುತ್ತಿರುವ ಸುದ್ದಿ ಗೊತ್ತೇ ಇದೆ. ಈಗ ಅದರ ಜೊತೆಜೊತೆಗೇ ಇನ್ನೊಂದು ಚಿತ್ರವನ್ನೂ ಶುರು ಮಾಡುವ ಉತ್ಸಾಹದಲ್ಲಿದ್ದಾರೆ. ಆ ಚಿತ್ರದ ಹೆಸರೇನು ಗೊತ್ತಾ? “ಪುಟ ನಂಬರ್‌ 109′.
ಹೌದು, ದಯಾಳ್‌ ಬ್ಯಾಕ್‌ ಟು ಬ್ಯಾಕ್‌ ಎರಡು ಚಿತ್ರಗಳನ್ನು ನಿರ್ದೇಶಿಸುವುದಕ್ಕೆ ಸಜ್ಜಾಗಿದ್ದಾರೆ.
ಇದೇ ತಿಂಗಳ 19ರಂದು ಎರಡೂ ಚಿತ್ರಗಳ ಮುಹೂರ್ತ ಒಟ್ಟಿಗೇ ನಡೆಯಲಿದೆ. ಆ ನಂತರ 35 ದಿನಗಳ ಅಂತರದಲ್ಲಿ ಎರಡೂ ಚಿತ್ರಗಳ ಮಾತಿನ ಭಾಗದ ಚಿತ್ರೀಕರಣವನ್ನು ಮುಗಿಸುವುದಕ್ಕೆ ಅವರು ಯೋಚಿಸುತ್ತಿದ್ದಾರೆ. ಈ ಪೈಕಿ ಮೊದಲನೆಯದು ಮೋಹನ್‌ ಹಬ್ಬು ಅವರು ಬರೆದಿರುವ “ಕರಾಳ ರಾತ್ರಿ’ ಎಂಬ ನಾಟಕವನ್ನಾಧರಿಸಿದ ಸಿನಿಮಾ. “ಬಿಗ್‌ಬಾಸ್‌’ ಮನೆಗೆ ಹೋಗಿದ್ದ ಸಂದರ್ಭದಲ್ಲೇ ದಯಾಳ್‌ ನಾಯಕ, ನಾಯಕಿಯನ್ನು ತಮ್ಮ ಚಿತ್ರಕ್ಕೆ ಆಯ್ಕೆ ಮಾಡಿದ್ದರು.
ಆ ಮನೆಗೆ ಸ್ಪರ್ಧಿಯಾಗಿ ಬಂದಿದ್ದ ಜೆಕೆ ಮತ್ತು ಅನುಪಮ ಗೌಡ ಅವರನ್ನೇ ನಾಯಕ-ನಾಯಕಿಯನ್ನಾಗಿ ಫೈನಲ್‌ ಮಾಡಿದ್ದರು. ಇನ್ನು ಎರಡನೆಯ ಚಿತ್ರ “ಪುಟ ನಂ 109′ ಒಂದು ಕ್ರೈಮ್‌ ಥ್ರಿಲ್ಲರ್‌ ಕಥೆಯಂತೆ. ಈ ಚಿತ್ರದ ವಿಶೇಷತೆಯೆಂದರೆ, ಚಿತ್ರದ ಶೇ 90ರಷ್ಟು ಭಾಗದಲ್ಲಿ ಎರಡೇ ಎರಡು ಪಾತ್ರಗಳಿರುವುದು ಮತ್ತು ಕೊನೆಯ ಕೆಲವು ನಿಮಿಷಗಳಲ್ಲಿ ಇನ್ನೊಂದಿಷ್ಟು ಪಾತ್ರಗಳು ಸೇರಿಕೊಳ್ಳುತ್ತವಂತೆ.
ಈ ಚಿತ್ರದಲ್ಲಿ ಜೆಕೆ ಮತ್ತು ನವೀನ್‌ ಕೃಷ್ಣ ಜೊತೆಯಾಗಿ ನಟಿಸುತ್ತಿದ್ದಾರೆ. “ಕರಾಳ ರಾತ್ರಿ’ ಚಿತ್ರಕ್ಕೆ ಗಣೇಶ್‌ ನಾರಾಯಣ್‌ ಸಂಗೀತ ಸಂಯೋಜಿಸಿದರೆ, “ಪುಟ ನಂಬರ್‌ 109′ ಚಿತ್ರಕ್ಕೆ ಗೌತಮ್‌ ಶ್ರೀವತ್ಸ ಸಂಗೀತ ಸಂಯೋಜಿಸುತ್ತಿದ್ದಾರೆ. ಇನ್ನು ಎರಡೂ ಚಿತ್ರಗಳಿಗೆ ನವೀನ್‌ ಕೃಷ್ಣ ಸಂಭಾಷಣೆ ಬರೆದರೆ, ಸಬಾ ಕುಮಾರ್‌ ಛಾಯಾಗ್ರಹಣ ಮಾಡಲಿದ್ದಾರೆ.
