ದಾವೂದ್‌ ಆಸ್ತಿ ಜಪ್ತಿಗೆ ಆದೇಶ : ಎಫ್ಎಟಿಎಫ್ ಕಪ್ಪುಪಟ್ಟಿಗೆ ತಪ್ಪಿಸಿಕೊಳ್ಳಲು ಪಾಕ್‌ ಉಪಾಯ

ಇಸ್ಲಾಮಾಬಾದ್‌: ಇತ್ತೀಚೆಗೆ, ಫ್ರಾನ್ಸ್‌ ನಲ್ಲಿ ನಡೆದ ಭಯೋತ್ಪಾದನ ಧನ ಸಹಾಯ ನಿಗ್ರಹ ಪಡೆ (ಎಫ್ಎಟಿ ಎಫ್) ಸಭೆಯಲ್ಲಿ ತನ್ನನ್ನು ತಾನು ಎಫ್ಎಟಿಎಫ್ ಕಪ್ಪು ಪಟ್ಟಿಗೆ ಸೇರಿಕೊಳ್ಳುವುದನ್ನು ತಪ್ಪಿಸಿಕೊಳ್ಳಲು ಪಾಕಿಸ್ಥಾನ ಅನುಸರಿಸಿದ ತಂತ್ರಗಾರಿಕೆಯೊಂದನ್ನು ರಿಪಬ್ಲಿಕ್‌ ವರ್ಲ್ಡ್ ಡಾಟ್‌ ಕಾಮ್‌ ವೆಬ್‌ಸೈಟ್‌ ಅನಾವರಣಗೊಳಿಸಿದೆ.

ಎಫ್ಎಟಿಎಫ್ ಸಭೆ ನಡೆದಿದ್ದು ಫೆ. 25ರಂದು. ಆ ಸಭೆಯಲ್ಲೇ ಪಾಕಿಸ್ಥಾನವನ್ನು ಕಪ್ಪುಪಟ್ಟಿಗೆ ಸೇರಿಸಬೇಕೇ, ಬೇಡವೇ ಎಂಬ ಬಗ್ಗೆ ಚರ್ಚೆ ನಡೆದವು. ಆದರೆ ಆ ಸಭೆಗೂ ಹಿಂದಿನ ದಿನದಂದು ಪಾಕಿಸ್ಥಾನ, ತನ್ನ ನೆಲದಲ್ಲಿರುವ ಹಾಗೂ ವಿಶ್ವಸಂಸ್ಥೆಯಿಂದ ಉಗ್ರರೆಂದು ಪರಿಗಣಿಸಲ್ಪಟ್ಟಿರುವ ದಾವೂದ್‌ ಇಬ್ರಾಹೀಂ ಸೇರಿದಂತೆ ಅನೇಕ ಉಗ್ರ ಸಂಘಟನೆಗಳ ವ್ಯಕ್ತಿಗಳ ಆಸ್ತಿ ಜಪ್ತಿ ಮಾಡಲು ಆದೇಶ ನೀಡಿತು. ಇದಲ್ಲದೆ, ಅವರ ಸಂಸ್ಥೆಗಳಿಗೆ ಬರಬಹುದಾದ ದೇಣಿಗೆಗೆ, ಅವರ ಪ್ರಯಾಣಕ್ಕೆ, ಅವರೊಂದಿಗೆ ಇತರ ಸಾರ್ವಜನಿಕರ ನಿತ್ಯ ವ್ಯವಹಾರಗಳಿಗೆ ನಿರ್ಬಂಧ ಹಾಕಿತು.

ಆ ಮೂಲಕ ಅದು ಎಫ್ಎಟಿಎಫ್ ವಿಶ್ವಾಸಗಳಿಸುವಲ್ಲಿ ತಕ್ಕಮಟ್ಟಿಗೆ ಯಶಸ್ವಿಯಾದ ಪಾಕಿಸ್ಥಾನ, ಗ್ರೇ ಲಿಸ್ಟ್‌ನಲ್ಲೇ ಉಳಿಯುವಲ್ಲಿ ಸಫ‌ಲವಾಯಿತು. ಆದರೆ ಅತ್ತ ಎಫ್ಎಟಿಎಫ್, ಉಗ್ರರನ್ನು ಮಟ್ಟಹಾಕಲು ತಾನು ನೀಡಿರುವ 27 ಅಂಶಗಳನ್ನು ಪೂರ್ತಿಯಾಗಿ ಅನುಷ್ಠಾನಗೊಳಿಸಿದರಷ್ಟೇ ಗ್ರೇ ಲಿಸ್ಟ್‌ನಿಂದ ಪಾಕಿಸ್ಥಾನ ಹೊರಗಿಡುವುದಾಗಿ ಹೇಳಿದೆ.