ಬೀದಿಜಗಳ: ಇಂಗ್ಲೆಂಡ್‌ನಿಂದ ಮತ್ತೆ ಹೊರಬಿದ್ದ ಬೆನ್‌ಸ್ಟೋಕ್ಸ್‌

ಲಂಡನ್‌: ಆಸ್ಟ್ರೇಲಿಯಾ ವಿರುದ್ಧ ನಡೆಯಲಿರುವ 5 ಪಂದ್ಯಗಳ ಏಕದಿನ ಸರಣಿಗೆ ಇಂಗ್ಲೆಂಡ್‌ ತಂಡದಿಂದ ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ ಮತ್ತೆ ಹೊರಬಿದ್ದಿದ್ದಾರೆ.

ಬದಲಿ ಆಟಗಾರನಾಗಿ ಡೇವಿಡ್‌ ಮಲಾನ್‌ ಸ್ಥಾನ ಪಡೆದಿದ್ದಾರೆ. ಕಳೆದ ಸೆಪ್ಟೆಂಬರ್‌ನಲ್ಲಿ ನೈಟ್‌ ಕ್ಲಬ್‌ವೊಂದರಲ್ಲಿ ಹಲ್ಲೆ ಮಾಡಿದ ಪ್ರಕರಣ ಸ್ಟೋಕ್ಸ್‌ ಮೇಲೆ ದಾಖಲಾಗಿತ್ತು. ಆ ನಂತರ ಸ್ಟೋಕ್ಸ್‌ ಜೈಲಿಗೆ ಹೋಗಿ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದರು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸ್ಟೋಕ್ಸ್‌ ತಪ್ಪಿತಸ್ಥ ಹೌದೋ? ಅಲ್ಲವೋ? ಅನ್ನುವುದು ಶೀಘ್ರವೇ ತಿಳಿದುಬರಲಿದೆ.

ಹೀಗಾಗಿ ಸ್ಟೋಕ್ಸ್‌ ಅವರನ್ನು ಆಸ್ಟ್ರೇಲಿಯಾ ವಿರುದ್ಧದ ಸರಣಿಗೆ ಆಯ್ಕೆ ಮಾಡಿಲ್ಲ. ಆದರೆ ಈಗಾಗಲೇ ಇಂಗ್ಲೆಂಡ್‌ ಕ್ರಿಕೆಟ್‌ ಮಂಡಳಿ ಇಂಡಿಯಾನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌)ನಲ್ಲಿ ಸ್ಟೋಕ್ಸ್‌ ಆಡಲು ಒಪ್ಪಿಗೆ ನೀಡಿದೆ.

ಶೀಘ್ರವೇ ನಿರ್ಧಾರ: ಈ ಬಗ್ಗೆ ಪ್ರತಿಕ್ರಿಯಿಸಿದ ಇಂಗ್ಲೆಂಡ್‌ ಕ್ರಿಕೆಟ್‌ ಮಂಡಳಿ, ಸ್ಟೋಕ್ಸ್‌ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಿರ್ಧಾರ ಹೊರಬೀಳಲಿದೆ. ಹೀಗಾಗಿ ಆಸ್ಟ್ರೇಲಿಯಾ ಸರಣಿಗೆ ಸ್ಟೋಕ್ಸ್‌ ಆಯ್ಕೆ ಬಗ್ಗೆ ಶೀಘ್ರದಲ್ಲಿಯೇ ನಿರ್ಧಾರ ಕೈಗೊಳ್ಳುತ್ತೇವೆ ಎಂದು ತಿಳಿಸಿದೆ. ಇದರಿಂದ ಸ್ಟೋಕ್ಸ್‌ ಆಯ್ಕೆಗೆ ಇನ್ನೂ ಅವಕಾಶವಿದೆ ಎಂಬ ಮಾಹಿತಿಯನ್ನು ಕ್ರಿಕೆಟ್‌ ಮಂಡಳಿ ತಿಳಿಸಿದೆ.