ಈ ಬಾರಿ ಕಡಿಮೆ ಆಯ್ತಲ್ಲ ಮತದಾನ

ದಾವಣಗೆರೆ: 17ನೇ ಲೋಕಸಭಾ ಸಾರ್ವತ್ರಿಕ ಚುನಾವಣೆಯಲ್ಲಿ ದಾವಣಗೆರೆ ಕ್ಷೇತ್ರದಲ್ಲಿ ಮತದಾನದ ಪ್ರಮಾಣ ಹೆಚ್ಚಿಸಲು ಏನೇಲ್ಲಾ ಸರ್ಕಸ್‌ ಮಾಡಿದರೂ ಕಳೆದ ಬಾರಿಗಿಂತ ಮತದಾನ ಕಡಿಮೆಯೇ ಆಗಿದೆ.

ಏ.23ರಂದು ಲೋಕಸಭೆಗೆ ರಾಜ್ಯದಲ್ಲಿ ನಡೆದ 2ನೇ ಹಂತದ ಮತದಾನದಲ್ಲಿ ದಾವಣಗೆರೆ ಕ್ಷೇತ್ರದಲ್ಲಿ ಒಟ್ಟು ಶೇ. 73.03 ಮತದಾರರು ತಮ್ಮ ಸಂವಿಧಾನಿಕ ಹಕ್ಕು ಚಲಾಯಿಸಿದ್ದು, ಇದು ಕಳೆದ ಬಾರಿಯ ಲೋಕಸಭಾ ಚುನಾವಣೆ ಮತದಾನಕ್ಕೆ ಹೋಲಿಸಿದರೆ .2% ಇಳಿಕೆಯಾಗಿರುವುದು ಕಂಡು ಬಂದಿದೆ.

ಕಳೆದ ಚುನಾವಣೆಯಲ್ಲಿ ದಾವಣಗೆರೆ ಲೋಕಸಭಾ ವ್ಯಾಪ್ತಿಯ 8 ವಿಧಾನ ಸಭಾ ಕ್ಷೇತ್ರಗಳಿಂದ 7,71,821 ಪುರುಷರು, 7,50,411 ಮಹಿಳೆಯರು ಹಾಗೂ ಇತರೆ 106 ಸೇರಿ ಒಟ್ಟು 15,22,338 ಮತದಾರರಿದ್ದರು. ಆ ಚುನಾವಣೆಯಲ್ಲಿ ಒಟ್ಟು 11,14.385 ಮಂದಿ ತಮ್ಮ ಹಕ್ಕು ಚಲಾಯಿಸಿದ್ದು, ಶೇ. 73.23ರಷ್ಟು ಮತ ಚಲಾವಣೆ ಆಗಿದ್ದವು. 5,80,146 ಪುರುಷರು ಹಾಗೂ 5,33,438 ಮಹಿಳೆಯರು ಮತದಾನ ಮಾಡಿದ್ದರು.

ಈ ಚುನಾವಣೆಯಲ್ಲಿ 8,22,593 ಪುರುಷರು, 8,09,744 ಮಹಿಳೆಯರು, ಇತರರು 129 ಸೇರಿ ಒಟ್ಟು 16,32,466 ಮತದಾರರಿದ್ದು, ಇವರಲ್ಲಿ 11,92,162 ಮಂದಿ ಮತದಾನ ಮಾಡಿದ್ದಾರೆ. ಇವರಲ್ಲಿ 6,17,298 ಪುರುಷರು, 5,74,856 ಮಹಿಳೆಯರು ಹಾಗೂ ಇತರೆ 8 ಮಂದಿ ಸೇರಿದ್ದಾರೆ ಎಂದು ಪ್ರಕಟಣೆ ತಿಳಿಸಿದೆ.

2014ರ ಚುನಾವಣೆಯಲ್ಲಿ ದಾವಣಗೆರೆ ಉತ್ತರ-ಶೇ. 65.13, ದಾವಣಗೆರೆ ದಕ್ಷಿಣ-ಶೇ. 65.60, ಹೊನ್ನಾಳಿ- ಶೇ. 78.82, ಜಗಳೂರು-ಶೇ. 74.67, ಹರಪನಹಳ್ಳಿ- ಶೇ. 75.8, ಚನ್ನಗಿರಿ- ಶೇ. 77.17, ಹರಿಹರ-ಶೇ. 72.73 ಹಾಗೂ ಮಾಯಕೊಂಡ ಶೇ. 78.06 ಮತ ಚಲಾವಣೆ ಆಗಿದ್ದವು. ಹೊನ್ನಾಳಿ ವಿಧಾನಸಭಾ ಕ್ಷೇತ್ರದಲ್ಲಿ ಬಾಕಿ ಕ್ಷೇತ್ರಗಳಿಗಿಂತ ಹೆಚ್ಚಿನ ಪ್ರಮಾಣದಲ್ಲಿ ಮತದಾನ ನಡೆದಿತ್ತು.

ಈ ಬಾರಿ ಜಗಳೂರು- ಶೇ. 73.36, ಹರಪನಹಳ್ಳಿ-ಶೇ. 75.78, ಹರಿಹರ- ಶೇ. 74.41, ದಾವಣಗೆರೆ ಉತ್ತರ- ಶೇ. 65.71, ದಾವಣಗೆರೆ ದಕ್ಷಿಣ- ಶೇ. 65.93, ಮಾಯಕೊಂಡ- ಶೇ. 77.61, ಚನ್ನಗಿರಿ-ಶೇ. 73.73 ಹಾಗೂ ಹೊನ್ನಾಳಿ ಕ್ಷೇತ್ರದಲ್ಲಿ ಶೇ. 80.01 ಮತದಾನ ಆಗಿದೆ. ಈ ಚುನಾವಣೆಯಲ್ಲೂ ಹೊನ್ನಾಳಿ ವಿಧಾನ ಸಭಾ ಕ್ಷೇತ್ರದಲ್ಲಿ ಹೆಚ್ಚು ಮತದಾನ ಆಗಿರುವುದು ಅಂಕಿ-ಅಂಶಗಳಿಂದ ತಿಳಿದು ಬಂದಿದೆ.

ಈ ಚುನಾವಣೆಯಲ್ಲಿ ಮಹಾನಗರ ಪಾಲಿಕೆ ಒಳಗೊಂಡ, ಸುಶಿಕ್ಷಿತರು, ಪ್ರಜ್ಞಾವಂತರು, ವಿದ್ಯಾವಂತರು, ದಾವಣಗೆರೆ ಉತ್ತರ ಹಾಗೂ ದಕ್ಷಿಣ ಎರಡೂ ವಿಧಾನ ಸಭಾ ಕ್ಷೇತ್ರಗಳಲ್ಲೂ ಕಡಿಮೆ ಮತದಾನ ಆಗಿರುವುದು ವಿಪರ್ಯಾಸ ಎನಿಸಿದೆ. ದಾವಣಗೆರೆ ಉತ್ತರ- ಶೇ. 65.71 ಹಾಗೂ ದಕ್ಷಿಣ-ಶೇ| 65.93 ಮತ ಚಲಾವಣೆ ಆಗಿವೆ.

2009ರಲ್ಲಿ ನಡೆದ ಲೋಕಸಭಾ ಚುನಾವಣೆಯಲ್ಲಿ 13,07,583 ಮತದಾರರ ಪೈಕಿ 9,07,727 ಮಂದಿ ತಮ್ಮ ಹಕ್ಕು ಚಲಾಯಿಸಿದ್ದರು. ಆ ಚುನಾವಣೆಯಲ್ಲಿ ಶೇ. 69.41ರಷ್ಟು ಮತದಾನ ಆಗಿತ್ತು.

ಕಳೆದ ಚುನಾವಣೆಯಲ್ಲಿ ದಾವಣಗೆರೆ ಲೋಕಸಭಾ ವ್ಯಾಪ್ತಿಯ 8 ವಿಧಾನ ಸಭಾ ಕ್ಷೇತ್ರಗಳಿಂದ ಒಟ್ಟು 15,22,338 ಮತದಾರರಿದ್ದರು. ಆ ಚುನಾವಣೆಯಲ್ಲಿ ಒಟ್ಟು 11,14.385 ಮಂದಿ ತಮ್ಮ ಹಕ್ಕು ಚಲಾಯಿಸಿದ್ದು, ಶೇ. 73.23ರಷ್ಟು ಮತ ಚಲಾವಣೆ ಆಗಿದ್ದವು. 2014ರಲ್ಲಿ 5,80,146 ಪುರುಷರು ಹಾಗೂ 5,33,438 ಮಹಿಳೆಯರು ಮತದಾನ ಪ್ರಕ್ರಿಯೆಯಲ್ಲಿ ಪಾಲ್ಗೊಂಡಿದ್ದರು.

•ಎನ್‌.ಆರ್‌. ನಟರಾಜ್‌