ದಕ್ಷಿಣ ಕನ್ನಡ: 82 ಸಾವಿರ ಅರ್ಜಿ ವಿಲೇ ಗುರಿ: ಜಿಲ್ಲಾಧಿಕಾರಿ

ಪುತ್ತೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಫೆ. 28ರೊಳಗೆ 82 ಸಾವಿರ ಅರ್ಜಿಗಳನ್ನು ವಿಲೇವಾರಿ ಮಾಡುವ ಗುರಿ ಇರಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಡಾ| ರಾಜೇಂದ್ರ ಕೆ.ವಿ. ಹೇಳಿದರು.

ಕಡತ ವಿಲೇವಾರಿ ಸಂಬಂಧ ಮಂಗಳೂರು, ಬಂಟ್ವಾಳ ತಾಲೂಕುಗಳ ಪ್ರಗತಿ ಪರಿಶೀಲನೆ ಮಾಡಿದ ಬಳಿಕ ಬುಧವಾರ ಸಂಜೆ ಪುತ್ತೂರಿಗೆ ಆಗಮಿಸಿ ಪರಿಶೀಲನೆ ಮಾಡಿದ ಅವರು ಬಳಿಕ ಪತ್ರಕರ್ತರ ಜತೆ ಮಾತನಾಡಿದರು.

ಫೆ. 19ರಂದು ಉದ್ಘಾಟನೆಗೊಂಡ ಕಡತ ವಿಲೇವಾರಿ ಕಾರ್ಯಕ್ರಮ ವೇಗವಾಗಿ ನಡೆಯುತ್ತಿದೆ. ಅಧಿಕಾರಿ, ಸಿಬಂದಿ ಹೆಚ್ಚುವರಿ ಕೆಲಸ ಮಾಡುತ್ತಿದ್ದಾರೆ. ಮೂರು ತಾಲೂಕುಗಳ ಪ್ರಗತಿ ಪರಿಶೀಲಿಸಿದ್ದೇನೆ. 82,000 ಕಡತಗಳನ್ನು ಗುರುತಿಸಿದ್ದು ಇದರಲ್ಲಿ 50 ಸಾವಿರ ಕಡತಗಳು ಹಳೆಯದಲ್ಲ. ಅವು ಪ್ರತೀ ವಾರ ಸಲ್ಲಿಕೆಯಾಗುತ್ತಿರುವವುಗಳು. ಇದರಲ್ಲಿ ಪಿಂಚಣಿ, ಚುನಾವಣ ಗುರುತುಪತ್ರ, ಕನ್ವರ್ಷನ್‌ ಮೊದಲಾದ ಅರ್ಜಿಗಳಿವೆ. ಇವುಗಳ ಪೈಕಿ ಅತ್ಯಂತ ಹಳೆಯ ಕಡತಗಳನ್ನು ಪಟ್ಟಿ ಮಾಡಲು ಸೂಚಿಸಲಾಗಿದೆ. ಕ್ಲೋಸ್‌ ಮಾಡಲಾಗದೇ ಇರುವ ಕಡತಗಳಿದ್ದರೆ ಮಾಹಿತಿ ನೀಡುವಂತೆ ಸೂಚಿಸಲಾಗಿದೆ ಎಂದರು.

ಆಸ್ಪತ್ರೆ ಪರಿಶೀಲನೆ: ತಾಲೂಕು ಸರಕಾರಿ ಆಸ್ಪತ್ರೆಗೆ ಭೇಟಿ ನೀಡಿ ಯೂನಿಕ್‌ ಡಿಸೆಬಲಿಟಿ ಐಡಿ ಕೊಡುವ ವಿಚಾರದಲ್ಲಿರುವ ತಾಂತ್ರಿಕ ಅಡಚಣೆಗಳ ಬಗ್ಗೆ ಮಾಹಿತಿ ಪಡೆದುಕೊಂಡಿದ್ದೇನೆ ಎಂದರು.