ಇಂದಿನ ಗ್ರಹಬಲ: ಈ ರಾಶಿಯವರಿಗೆ ನಿರಂತರ ಆದಾಯವಿದ್ದರೂ ಋಣಭಾಧೆ ತಪ್ಪದು!

29-04-2021

ಮೇಷ: ನಿಮ್ಮ ಪ್ರಯತ್ನಬಲವಿದ್ದರೂ ಕಠಿಣ ಶ್ರಮದಿಂದಲೇ ಯಶಸ್ಸು ಸಿಗುವುದು ಎಂಬ ಅರಿವು ನಿಮಗಾದೀತು. ಆದಾಯದಲ್ಲಿ ಏರಿಳಿತ ಕಂಡುಬಂದರೂ ನಿಮ್ಮ ಕೈಗೆ ತೊಂದರೆಯಾಗದು. ವಿದ್ಯಾಭ್ಯಾಸದಲ್ಲ ಪ್ರಗತಿ ಕಂಡುಬಂದೀತು.

ವೃಷಭ: ಹೋಟೇಲ್‌ ಉದ್ದಿಮೆಯವರಿಗೆ ಕ್ಲೇಶವಿದೆ. ಕ್ರೀಡಾಪಟುಗಳಿಗೆ ಗೆಲುವಿನ ಲಕ್ಷಣವು ಕಂಡುಬಂದೀತು. ಸಾಂಸಾರಿಕವಾಗಿ ಹಿರಿಯರ ಆರೋಗ್ಯದ ಬಗ್ಗೆ ಜಾಗ್ರತೆ ಮಾಡಿರಿ. ಪ್ರವಾಸಾದಿಗಳಿಂದ ಲಾಭ ತಂದೀತು. ದಿನವೂ ಕಿರಿಕಿರಿ ಇರುತ್ತದೆ.

ಮಿಥುನ: ಸಾಂಸಾರಿಕವಾಗಿ ಆಪ್ತವರ್ಗದಲ್ಲಿ ಮನಸ್ತಾಪ ತಂದೀತು. ವರ್ತಕ ವರ್ಗಕ್ಕೆ ಸ್ವಲ್ಪ ಬಿಡುವು ದೊರಕಲಿದೆ. ಆಗಾಗ ಅನಾವಶ್ಯಕವಾಗಿ ಖರ್ಚುವೆಚ್ಚಗಳೇ ಅಧಿಕವಾಗಲಿದೆ. ಕಾರ್ಯವೈಫ‌ಲ್ಯದ ಅನುಭವವಾದರೂ ತಾಳ್ಮೆಯಿಂದ ಸಹಿಸಿರಿ.

ಕರ್ಕ: ಆರ್ಥಿಕ ಮುಗ್ಗಟ್ಟು ಕಂಡು ಬರುವುದು. ಆದರೂ ಅತಿಯಾದ ಜಾಗ್ರತೆ ಮಾಡಿದರೆ ಉತ್ತಮ. ಸ್ವತಂತ್ರ ವೃತ್ತಿಯವರಿಗೆ ನಿರಂತರ ಆದಾಯವಿದ್ದರೂ ಋಣಭಾಧೆ ತಪ್ಪದು. ಶೈಕ್ಷಣಿಕ ಕ್ಷೇತ್ರದವರಿಗೆ ಅಭಿವೃದ್ಧಿ ಕಂಡುಬರುವುದು.

ಸಿಂಹ: ವಿದ್ಯಾರ್ಥಿಗಳ ಅಭ್ಯಾಸ ಬಲಕ್ಕೆ ನಿರೀಕ್ಷಿತ ಯಶಸ್ಸು ಕಂಡುಬರುವುದು. ಮಂಗಲಕಾರ್ಯದ ಚಿಂತನೆಯು ಕಾರ್ಯಗತವಾಗಿ ಸಂಭ್ರಮದ ವಾತಾವರಣವಿರುತ್ತದೆ. ಪ್ರವಾಸಾದಿಗಳಿಂದ ಹರುಷವು ಇರುವುದು. ಶುಭವಿದೆ.

ಕನ್ಯಾ: ವೃತ್ತಿರಂಗದಲ್ಲಿ ಸುದಾರಿಸಿಕೊಂಡು ಹೋಗಬೇಕಾದ ಅನಿವಾರ್ಯತೆ ಕಂಡು ಬರುವುದು. ಅಗತ್ಯಕಾರ್ಯಗಳಿಗೆ ವಿಳಂಬ ತೋರಿಬರುವುದು. ಗೃಹ ಸುಖ ಶಾಂತಿ ತಕ್ಕಮಟ್ಟಿಗೆ ಕಂಡು ಬರುವುದು. ಆದಾಯ ಮಾರ್ಗಗಳೂ ಕಂಡುಬಂದಾವು.

ತುಲಾ: ವೃತ್ತಿ ನಿರತರಿಗೆ ಅನಿರೀಕ್ಷಿತ ರೀತಿಯಲ್ಲಿ, ಹೇರಳ ಸಂಪಾದನೆ ಇದ್ದೀತು. ಆಗಾಗ ಸರಕಾರಿ ಸಹಾಯದ ವಿನಾಯಿತಿಯನ್ನು ತೋರಿಸೀತು. ಕೃಷಿ, ಬೇಸಾಯ ಕಾರ್ಯಗಳಲ್ಲಿ ಚಟುವಟಿಕೆ ಕಂಡುಬರುವುದು. ಬಂದ ಅವಕಾಶಕ್ಕೆ ಹೊಂದಿಕೊಳ್ಳಿರಿ.

ವೃಶ್ಚಿಕ: ಸಾಂಸಾರಿಕವಾಗಿ ಪತ್ನಿ, ಮಕ್ಕಳ ಸಹಕಾರವಿದ್ದರೂ ಸದಾ ಉದ್ವೇಗಕ್ಕೆ ಒಳಗಾಗುವ ಪರಿಸ್ಥಿಯು ನಿಮ್ಮದಾಗಲಿದೆ. ವೃತ್ತಿರಂಗದಲ್ಲಿ ಸ್ಥಾನ- ಉದ್ಯೋಗ ಬದಲಾವಣೆಯ ಕನಸು ನನಸಾಗಲಿದೆ. ಖರ್ಚಿನ ಬಾಬ್ತುಗಳು ಹಲವು ಅನಾವಶ್ಯಕಗಳೇ.

ಧನು: ಗೃಹದಲ್ಲಿ ಬಂಧುಗಳ ಆಗಮನದಿಂದ ಹರುಷವಾದೀತು. ಹಿತಮಿತ್ರರ ಮಾತುಗಳಿಂದ ಸಮಾಧಾನವಾಗಲಿದೆ. ನಿರುದ್ಯೋಗಿಗಳಿಗೆ ಇದು ಉದ್ಯೋಗಾರಂಭದ ಭರವಸೆಯ ಕಾಲ. ಸದುಪಯೋಗಿಸಿಕೊಳ್ಳಿರಿ. ವಿವಾಹ ಪ್ರಸ್ತಾಪ ಬಂದೀತು.

ಮಕರ: ಉದ್ಯೋಗರಂಗದಲ್ಲಿ ನಿಮ್ಮ ದುಡಿಮೆ, ಸಲಹೆ ಸೂಚನೆಗಳಿಗೆ ಭಂಗ ಬಂದೀತು. ಯೋಗ್ಯ ವಯಸ್ಕರಿಗೆ ವೈವಾಹಿಕ ಭಾಗ್ಯ ಕಂಡು ಬಂದೀತು. ದಾಂಪತ್ಯ ಜೀವನದಲ್ಲಿ ಕೆಲವೊಂದು ಬದಲಾವಣೆಗಳಿಗೆ ಹೊಂದಿಕೊಳ್ಳಬೇಕಾದೀತು.

ಕುಂಭ: ಆರ್ಥಿಕವಾಗಿ ಹಣಕಾಸಿನ ಪರಿಸ್ಥಿತಿಯಲ್ಲಿ ಏರುಪೇರು ಕಂಡುಬಂದೀತು. ಅನಿರೀಕ್ಷಿತ ಕಾರ್ಯಸಾಧನೆ ನಿಮಗೇ ಅಚ್ಚರಿ ತಂದೀತು. ದೈಹಿಕವಾಗಿ, ಮಾನಸಿಕವಾಗಿ ಆಗಾಗ ವ್ಯಾಕುಲ ಹಾಗೂ ಉದ್ವೇಗದಿಂದ ಮನಸ್ಸು ಸಮಾಧಾನಗೊಂಡೀತು.

ಮೀನ: ವಿದ್ಯಾರ್ಥಿಗಳ ಮನೋಕಾಮನೆಗಳು ಪೂರ್ಣಗೊಳ್ಳಲಿದೆ. ಆರ್ಥಿಕವಾಗಿ ಎಷ್ಟು ಖರ್ಚುಗಳಿದ್ದರೂ ಆದಾಯವು ಅಷ್ಟೇ ಕಂಡು ಬರುವುದು. ಹಿತಶತ್ರುಗಳ ಸಮಯ ಸಾಧಕತನ ಆಗಾಗ ಘಾಸಿಗೊಳ್ಳಲಿದೆ. ತಾಳ್ಮೆ, ಸಹನೆ ಇರಲಿ.

 

ಎನ್‌.ಎಸ್‌. ಭಟ್‌