ಸಿಎಸ್‌ಕೆ ಜೆರ್ಸಿ ತೊಟ್ಟು  ಧೋನಿ ಪತ್ನಿಯಿಂದ ಪ್ರತೀಕಾರ!

ರಾಂಚಿ: ಕೆಲ ದಿನಗಳ ಹಿಂದಷ್ಟೇ ಎಂ.ಎಸ್‌. ಧೋನಿ ಅವರನ್ನು ಪುಣೆ ಸೂಪರ್‌ಜೈಂಟ್‌ ತಂಡದ ನಾಯಕತ್ವದಿಂದ ಕೆಳಗಿಳಿಸಲಾಗಿತ್ತು. ಆಸೀಸ್‌ನ ಸ್ಟೀವನ್‌ ಸ್ಮಿತ್‌ಗೆ ನಾಯಕತ್ವ ಪಟ್ಟ ನೀಡಲಾಗಿತ್ತು. 

ಇದಾದ ಬಳಿಕ ಧೋನಿಗೆ ಪುಣೆ ತಂಡದ ಮಾಲಕ ಸಂಜೀವ ಗೋಯೆಂಕಾ ಸಹೋದರ ಹರ್ಷ್‌ ಗೋಯೆಂಕಾ ಅವಮಾನವಾಗುವ ರೀತಿಯಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟನೆಗಳನ್ನು ಹಾಕಿದ್ದರು. ಇದು ಈಗ ಧೋನಿ ಪತ್ನಿ ಸಾಕ್ಷಿಯನ್ನು ಕೆರಳಿಸಿದೆ. ಇದಕ್ಕೆಲ್ಲ ಪ್ರತೀಕಾರ ಎನ್ನುವಂತೆ ಐಪಿಎಲ್‌ನಿಂದ ಅಮಾನತಿನಲ್ಲಿರುವ ಸಿಎಸ್‌ಕೆ ತಂಡದ ಜೆರ್ಸಿ, ಹೆಲ್ಮೆಟ್‌ ತೊಟ್ಟು ಫೋಟೋಗೆ ಸಾಕ್ಷಿ ಫೋಸ್‌ ಕೊಟ್ಟಿದ್ದಾರೆ. 

ಪುಣೆ ತಂಡ ಮುಂಬೈ ವಿರುದ್ಧ ಗೆದ್ದೊಡನೆ ಹರ್ಷ್‌ ಗೋಯೆಂಕಾ ಧೋನಿಗೆ ಅವಮಾನವಾಗುವ ರೀತಿಯಲ್ಲಿ ಟ್ವೀಟ್‌ ಮಾಡಿದ್ದರು. “ಸ್ಮಿತ್‌ ನೀವು ಕಿಂಗ್‌ ಆಫ್ ಜಂಗಲ್‌ ಯಾರು ಎನ್ನುವುದನ್ನು ನಿರೂಪಿಸಿದ್ದೀರಿ. ನಾಯಕತ್ವದಲ್ಲಿ ಧೋನಿಯ ಸಾಧನೆಗಳನ್ನು ಮಬ್ಬುಗವಿಯುಂತೆ ಮಾಡಿದ್ದೀರಿ’ ಎಂದಿದ್ದರು. ಪಂಜಾಬ್‌ ವಿರುದ್ಧ 2ನೇ ಪಂದ್ಯದಲ್ಲಿ ಪುಣೆ 6 ವಿಕೆಟ್‌ ಸೋಲು ಕಂಡಿತ್ತು. ಈ ಬೆನ್ನಲ್ಲೇ ಮತ್ತೂಮ್ಮೆ ಧೋನಿ ವಿರುದ್ಧ ಟ್ವಿಟರ್‌ನಲ್ಲಿ ಹರ್ಷ್‌ ಅವಮಾನವಾಗುವ ರೀತಿಯಲ್ಲಿ ಪ್ರಕಟನೆ ಹಾಕಿದ್ದರು. 

ಹರ್ಷ್‌ 2ನೇ ಪ್ರಕಟನೆ ಹೊರಬರುತ್ತಿದ್ದಂತೆ ಸಾಕ್ಷಿ ಕೆರಳಿದ್ದಾರೆ. ತತ್‌ಕ್ಷಣ ಅವರು ಸಿಎಸ್‌ಕೆ ತಂಡದ ಜೆರ್ಸಿ, ಹೆಲ್ಮೆಟ್‌ ತೊಟ್ಟು ತನ್ನ ಫೋಟೋವೊಂದನ್ನು ಕ್ಲಿಕ್ಕಿಸಿ ಇನ್‌ಸ್ಟಾಗ್ರಾಮ್‌ನಲ್ಲಿ ಪ್ರಕಟಿಸಿದ್ದಾರೆ.