ಮಣಿಪಾಲ: ಮಣಿಪಾಲ ಸೆಂಟ್ರಲ್‌ ಪಾರ್ಕ್‌ ಹೊಟೇಲ್‌ ಇಳಿಜಾರು ರಸ್ತೆಯಲ್ಲಿ ಶನಿವಾರ ತಡರಾತ್ರಿ ಕಾರೊಂದು ಅತೀ ವೇಗದಿಂದ ಬಂದು ಪಾದಚಾರಿಗಳಿಗೆ ಢಿಕ್ಕಿ ಹೊಡೆದಿದೆ. ಪರಿಣಾಮ ಹಲವಾರು ಮಂದಿ ಗಾಯಗೊಂಡು, ಓರ್ವ ಯುವಕ ಮೃತಪಟ್ಟಿದ್ದಾನೆ.
ಮಣಿಪಾಲ ಐನಾಕ್ಸ್‌ ಸಮೀಪ ಹೊಟೇಲ್‌ ಒಂದರಲ್ಲಿ ತಡರಾತ್ರಿ ಕೆಲಸ ಮುಗಿಸಿ ಬರುತ್ತಿದ್ದ ಪಶ್ಚಿಮ ಬಂಗಾಲದ ನಿವಾಸಿ ಸಾಹಿನ್‌ ಎಸ್‌.ಕೆ. (18) ಮೃತಪಟ್ಟ ಯುವಕ. ಸುಮಿತ್‌ ಜಸ್ವಾಲ್ , ಸಂಸುಲ್‌ ಆರೀಫ್ ಹೋಕ್ಯೂ, ಲತೀಪುಲ್‌ ಚೌದುರಿ, ಸುಕ್ದೇಬ್ ಕರ್ಮಾಕರ್‌ ಮತ್ತು ಸಾಹಿನ್‌ ಎಸ್‌.ಕೆ. ಅವರಿಗೆ ಕಾರು ಢಿಕ್ಕಿ ಹೊಡೆದಿದೆ.
ಎಲ್ಲರೂ ಗಾಯಾಳುಗಳಾಗಿದ್ದು, ಮಣಿಪಾಲ ಆಸ್ಪತ್ರೆಯಲ್ಲಿ ಚಿಕಿತ್ಸೆಯಲ್ಲಿದ್ದಾರೆ.
ಗಂಭೀರವಾಗಿ ಗಾಯಗೊಂಡಿದ್ದ ಸಾಹಿನ್‌ ಚಿಕಿತ್ಸೆಗೆ ಸ್ಪಂದಿಸದೆ ಮೃತಪಟ್ಟಿದ್ದಾರೆ. ಅಪಘಾತ ವೇಳೆ ಸಮೀಪದಲ್ಲಿ ನಿಲ್ಲಿಸಿದ್ದ ಪೆರ್ಡೂರಿನ ಸಂತೋಷ್‌ ಕುಲಾಲ್‌ ಅವರ ಆಟೋ ರಿಕ್ಷಾಕ್ಕೂ ಕಾರು ಢಿಕ್ಕಿಯಾಗಿ ಹಾನಿ ಸಂಭವಿಸಿದೆ.
ಕಾರಿನ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದು, ಮಣಿಪಾಲ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ರವಿವಾರ ಪೊಲೀಸರು ಕಾರು ಚಾಲಕ ದೀಕ್ಷಿತ್‌ ರಾಜ್‌ನನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.
