ರವಿಚಂದ್ರನ್‌ ಹೊಸ ಚಿತ್ರ ಕನ್ನಡಿಗ

ಕ್ರೇಜಿಸ್ಟಾರ್‌ ರವಿಚಂದ್ರನ್‌ ಶೂಟಿಂಗ್‌ ಮೂಡ್‌ಗೆ ಬಂದಿದ್ದಾರೆ. ಅದು ಹೊಸ ಚಿತ್ರದ ಮೂಲಕ. ಹೌದು,”ಜಟ್ಟ’ ಗಿರಿರಾಜ್‌ ನಿರ್ದೇಶನದ ಚಿತ್ರದಲ್ಲಿ ಕ್ರೇಜಿಸ್ಟಾರ್‌ ರವಿಚಂದ್ರನ್‌ ನಟಿಸಲಿದ್ದಾರೆ ಎಂಬ ಸುದ್ದಿಯನ್ನು ನೀವು ಈ ಹಿಂದೆಯೇ ಓದಿದ್ದೀರಿ.  ಈಗ ಆ ಸಿನಿಮಾದ ಪೂರ್ವತಯಾರಿ ಜೋರಾಗಿದ್ದು, ಚಿತ್ರೀಕರಣಕ್ಕೆ ಅಣಿಯಾಗಿದೆ. ದಸರಾದಿಂದ ಚಿತ್ರೀಕರಣ ನಡೆಯಲಿದೆ.

ಇದು ಕನ್ನಡ ನಿಘಂಟು ಕುರಿತಾದ ಸಿನಿಮಾವಾಗಿದ್ದು, ಚಿತ್ರದ ಟೈಟಲ್‌ ಬಹುತೇಕ ಅಂತಿಮವಾಗಿದ್ದು, “ಕನ್ನಡಿಗ’ ಎಂದಿಡಲು ಚಿತ್ರತಂಡ ನಿರ್ಧರಿಸಿದೆ. ಇದರ ಜೊತೆಗೆ ಸೋಶಿಯಲ್‌ ಮೀಡಿಯಾ ಮೂಲಕ ಟೈಟಲ್‌ಕುರಿತಾಗಿ ಅಭಿಪ್ರಾಯ ಸಂಗ್ರಹಿಸುವ ಉದ್ದೇ ಶಕೂಡಾ ಚಿತ್ರತಂಡಕ್ಕಿದೆ. ಈ ಚಿತ್ರದಲ್ಲಿ ರವಿಚಂದ್ರನ್‌ ಅವರು ಕನ್ನಡ ವಿದ್ವಾಂಸನ ಪಾತ್ರದಲ್ಲಿ ರವಿಚಂದ್ರನ್‌ ನಟಿಸಲಿದ್ದಾರಂತೆ.

ಚಿತ್ರದಲ್ಲಿ ಬ್ರಿಟಿಷ್‌ ಮತ್ತು ಪೋರ್ಚುಗೀಸ್‌ ಆಳ್ವಿಕೆಯ ಕಾಲಘಟ್ಟದ ಕಥೆಯೂ ಇರಲಿದ್ದು,1850 ರ ದಶಕದಲ್ಲಿ ಸಾಗಲಿದೆಯಂತೆ. ಈ ಚಿತ್ರದಲ್ಲಿ ಫ‌ರ್ಡಿನೆಂಡ್‌ಕಿಟೆಲ್‌ ಪಾತ್ರವೂ ಬರಲಿದ್ದು, ಈ ಪಾತ್ರವನ್ನು ಜೇಮೀ ಆಲ್ಟರ್‌ ಮಾಡುತ್ತಿದ್ದಾರೆ. ಇವರು ಬಾಲಿವುಡ್‌ನ‌ ಖ್ಯಾತ ನಟ ಟಾಮ್‌ ಆಲ್ಟರ್‌ ಅವರ ಪುತ್ರ. ಟಾಮ್‌ ಅಲ್ಟರ್‌ ಎಂ.ಎಸ್‌. ಸತ್ಯು ನಿರ್ದೇಶನದ “ಕನ್ನೇಶ್ವರ ರಾಮ’ ಚಿತ್ರದಲ್ಲಿ ನಟಿಸಿದ್ದರು. ಈಗ ಅವರ ಪುತ್ರ ಕನ್ನಡ ಸಿನಿಮಾದಲ್ಲಿ ನಟಿಸಲು ಬರುತ್ತಿದ್ದಾರೆ. ಇದರ ಜೊತೆಗೆ ಚಿತ್ರದಲ್ಲಿ ಸಾಕಷ್ಟು ಪಾತ್ರಗಳು ಬರಲಿದ್ದು, ಆಯ್ಕೆ ನಡೆಯುತ್ತಿದೆ. ಈ ಚಿತ್ರವನ್ನು ಎನ್‌.ಎಸ್‌.ರಾಜ್‌ಕುಮಾರ್‌ ನಿರ್ಮಿಸುತ್ತಿದ್ದಾರೆ. ಇನ್ನು, ರವಿಚಂದ್ರನ್‌ ನಿರ್ದೇಶನದ “ರವಿ ಬೋಪಣ್ಣ’ ಚಿತ್ರದ ಬಹುತೇಕ ಚಿತ್ರೀಕರಣ ಅಂತಿಮ ಹಂತ ತಲುಪಿದೆ.