ಬೆಳಗಾವಿ ಮಾರುಕಟ್ಟೆಯಲ್ಲಿ ಏಡಿ ಮಾರಾಟ ಭರ್ಜರಿ

ಬೆಳಗಾವಿ: ಮಳೆಗಾಲ ಶುರುವಾಯಿತೆಂದರೆ ನಗರದಲ್ಲಿ ಏಡಿಗಳ ಮಾರಾಟ ಭರ್ಜರಿ ಆಗಿರುತ್ತದೆ. ಕಳೆದ ಒಂದು ತಿಂಗಳಿಂದ ನಗರದ ಕ್ಯಾಂಪ್‌ ಪ್ರದೇಶದಲ್ಲಿ ಏಡಿ ಖರೀದಿಗಾಗಿ ಮಾರುಕಟ್ಟೆಯಲ್ಲಿ ಗ್ರಾಹಕರ ಜನಜಂಗುಳಿ ಇದ್ದು, ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ನೆಗಡಿ, ಕೆಮ್ಮು ವಾಸಿ ಮಾಡುವ ಏಡಿಗಳಿಗೆ ಕೊರೊನಾ ಮಹಾಮಾರಿಯಲ್ಲಿ ಬೇಡಿಕೆ ಹೆಚ್ಚಾಗಿದೆ.

ಕೊರೊನಾ ಸಂಕಷ್ಟದಲ್ಲಿ ಪೌಷ್ಟಿಕಾಂಶವುಳ್ಳ ಏಡಿಗಳ ಖರೀದಿಗೆ ಜನ ಮುಗಿಬಿದ್ದಿದ್ದಾರೆ. ಹಿಡಕಲ್‌ ಡ್ಯಾಂ ಸೇರಿದಂತೆ ವಿವಿಧ ಕಡೆಗಳಿಂದ ಏಡಿ ಮಾರಾಟಗಾರರು ಬಂದಿದ್ದಾರೆ. ಮಳೆ ಹೆಚ್ಚಾಯಿತೆಂದರೆ ಏಡಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಬರುತ್ತವೆ. ಇತ್ತ ಪಶ್ಚಿಮ ಭಾಗದ ಮಹಾರಾಷ್ಟ್ರದ ಚಂದಗಡ ತಾಲೂಕಿನ ಹಳ್ಳಿಗಳಿಂದಲೂ ಏಡಿಗಳು ಬೆಳಗಾವಿ ಮಾರುಕಟ್ಟೆ ಬರುತ್ತಿವೆ.

ಜೋಡಿ ಏಡಿಗೆ 100-120 ರೂ. ದರ ಇದೆ. ಜನ ಹೆಚ್ಚಾಗಿ ಏಡಿಗಳನ್ನು ಖರೀದಿಸುತ್ತಿದ್ದಾರೆ. ಗೋಣಿ ಚೀಲದಲ್ಲಿ ಏಡಿ ಹಿಡಿದುಕೊಂಡು ಬಂದವರು ಭರ್ಜರಿ ವ್ಯಾಪಾರ ಮಾಡುತ್ತಿದ್ದಾರೆ. ಬೆಳಗಾವಿ ನಗರ ಮತ್ತು ತಾಲೂಕಿನ ವಿವಿಧ ಹಳ್ಳಿಗಳಿಂದ ಗ್ರಾಹಕರು ಏಡಿ ಖರೀದಿಗೆ ಬರುತ್ತಿದ್ದಾರೆ. ಕೋವಿಡ್‌ ಸಂಕಷ್ಟದಲ್ಲಿ ಏಡಿ ರಾಮಬಾಣ ಇದ್ದಂತೆ. ಹೀಗಾಗಿ ತುಂತುರು ಮಳೆಯಲ್ಲಿ ಏಡಿ ಸವಿಯಲು ಮಾಂಸ ಪ್ರಿಯರು ಮಾರುಕಟ್ಟೆಯತ್ತ ಧಾವಿಸುತ್ತಿದ್ದಾರೆ.