ನೀವು 45 ವರ್ಷ ಮೇಲ್ಪಟ್ಟವರೇ? ಹಾಗಾದರೆ ತಡ ಮಾಡದೇ ಹೋಗಿ ಕೋವಿಡ್ ಲಸಿಕೆ ಪಡೆಯಿರಿ

ಬೆಂಗಳೂರು: ದೇಶದಾದ್ಯಂತ ಇಂದಿನಿಂದ (ಏ.1) 45 ವರ್ಷ ಮೇಲ್ಪಟ್ಟ ಎಲ್ಲರಿಗೂ ಕೋವಿಡ್ ಲಸಿಕೆ ನೀಡಲಾಗುತ್ತಿದೆ‌. ಇದಕ್ಕಾಗಿ ರಾಜ್ಯ ಆರೋಗ್ಯ ಇಲಾಖೆಯು ಅಗತ್ಯ ಸಿದ್ಧತೆ ಮಾಡಿಕೊಂಡಿದೆ.

ರಾಜ್ಯದ್ಯಾಂತ ಜಿಲ್ಲಾ, ತಾಲೂಕು ಮತ್ತು ಪ್ರಾಥಮಿಕ ಆರೋಗ್ಯ ಕೇಂದ್ರ, ವೈದ್ಯಕೀಯ ಕಾಲೇಜು, ಖಾಸಗಿ ಆಸ್ಪತ್ರೆ ಸೇರಿ 5,500 ಕ್ಕೂ ಹೆಚ್ಚು ಕಡೆಗಳಲ್ಲಿ ಕೊರೊನಾ ಲಸಿಕೆ ನೀಡಲಾಗುತ್ತದೆ. ಈ ಹಿಂದೆ 60 ವರ್ಷ ಮೇಲ್ಪಟ್ಟವರು ಮತ್ತು 45 – 59 ವರ್ಷ ಆರೋಗ್ಯ ಸಮಸ್ಯೆಯೊಂದಿರುವರಿಗೆ ಮಾತ್ರ ಕೊರೊನಾ ಲಸಿಕೆ ನೀಡಲಾಗುತ್ತಿತ್ತು. ಮುಂದುವರೆದ ಭಾಗವಾಗಿ ಕೇಂದ್ರ ಸರ್ಕಾರವು 45 ವರ್ಷ ಮೇಲ್ಪಟ್ಟ ಎಲ್ಲರಿಗೂ ಲಸಿಕೆ ನೀಡಲು ಸೂಚನೆ ನೀಡಿದೆ.

1.66 ಕೋಟಿ ಮಂದಿ

ರಾಜ್ಯದಲ್ಲಿ 45 ವರ್ಷ ಮೇಲ್ಟಟ್ಟವರು 1.66 ಕೋಟಿ ಮಂದಿ ಇದ್ದಾರೆ. ಈಗಾಗಲೇ ಅನಾರೋಗ್ಯ ಸಮಸ್ಯೆ ಹಿನ್ನೆಲೆ 6 ಲಕ್ಷ ಮಂದಿ‌, 19 ಲಕ್ಷ ಹಿರಿಯ ನಾಗರಿಕರು ಲಸಿಕೆ ಪಡೆದುಕೊಂಡಿದ್ದಾರೆ.  ಉಳಿದ 1.41 ಕೋಟಿ ಮಂದಿ ಲಸಿಕೆ ಪಡೆಯಬೇಕಿದೆ.

ನೋಂದಣಿ ಹೇಗೆ?

ಕೋವಿನ್ ಆ್ಯಪ್ ಮೂಲಕ ಆನ್ ಲೈನ್ ನೋಂದಣಿ‌ ಆಥವಾ ಸಮೀಪದ ಆಸ್ಪತ್ರೆಗೆ ತೆರಳಿ ಸ್ಥಳದಲ್ಲಿ ನೇರವಾಗಿ ನೋಂದಣಿ ಮಾಡಿಕೊಂಡು ಲಸಿಕೆ ಪಡೆಯ ಬಹುದಾಗಿದೆ.  ನೋಂದಣಿ ಮತ್ತು ಲಸಿಕೆ ಸಮಯದಲ್ಲಿ ಕಡ್ಡಾಯವಾಗಿ ಗುರುತಿನ ಚೀಟಿ ಅವಶ್ಯಕವಾಗಿದೆ.  ಸರ್ಕಾರಿ ಆಸ್ಪತ್ರೆಯಲ್ಲಿ ಉಚಿತವಾಗಿ, ಖಾಸಗಿಯಲ್ಲಿ 250 ರೂ. ದರವಿದೆ.

ಇದನ್ನೂ ಓದಿ:45+ ಇಂದಿನಿಂದ ಲಸಿಕೆ

ಲಸಿಕೆ ಲಭ್ಯವಿದೆಯೇ?

ಈವರೆಗೂ ರಾಜ್ಯದಲ್ಲಿ 52 ಲಕ್ಷಕ್ಕೂ ಅಧಿಕ ಡೋಸ್ ಕೊರೊನಾ ಲಸಿಕೆ ಕೇಂದ್ರ ಸರ್ಕಾರದಿಂದ ಬಂದಿದೆ. ಸದ್ಯ 37.5 ಲಕ್ಷ ಲಸಿಕೆ ವಿತರಿಸಲಾಗಿದೆ. ಬಾಕಿ 15 ಲಕ್ಷ ಡೋಸ್ ಲಸಿಕೆ ಲಭ್ಯವಿದೆ. ಈ ಪೈಕಿ 13.5 ಲಕ್ಷ ಡೋಸ್ ಕೋವಿಶೀಲ್ಡ್, 1.5 ಲಕ್ಷ ಡೋಸ್ ಕೋವ್ಯಾಕ್ಸಿನ್ ಇದೆ. ಜಿಲ್ಲಾ ಉಗ್ರಾಣಗಳಲ್ಲಿ ಶೇಖರಿಸಿಡಲಾಗಿದೆ.  ಶೀಘ್ರದಲ್ಲೇ ಇನ್ನಷ್ಟು ಲಸಿಕೆ ರಾಜ್ಯಕ್ಕೆ ಬರಲಿದೆ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.

ಈವರೆಗೂ ರಾಜ್ಯದಲ್ಲಿ ಲಸಿಕೆ ಪಡೆದವರು

ಆರೋಗ್ಯ ಕಾರ್ಯಕರ್ತರು – 5.6 ಲಕ್ಷ

ಮುಂಚೂಣಿ ಕಾರ್ಯಕರ್ತರು – 2.3 ಲಕ್ಷ

45 ವರ್ಷ ಮೇಲ್ಪಟ್ಟವರು – 6 ಲಕ್ಷ

60 ವರ್ಷ ಮೇಲ್ಪಟ್ಟವರು – 19 ಲಕ್ಷ

ಒಟ್ಟು – 33 ಲಕ್ಷ

ಆನ್‌ಲೈನ್ ನೋಂದಣಿಗೆ:  https://www.cowin.gov.in  ಅಥವಾ ಆರೋಗ್ಯ ಸೇತು ಆ್ಯಪ್.

ನೇರ ನೋಂದಣಿಗೆ: ಪ್ರಾಥಮಿಕ ಆರೋಗ್ಯ ಕೇಂದ್ರ, ಸಮುದಾಯ ಆರೋಗ್ಯ ಕೇಂದ್ರ, ಜಿಲ್ಲಾ, ತಾಲೂಕು ಆಸ್ಪತ್ರೆಗಳು, ವೈದ್ಯಕೀಯ ಕಾಲೇಜುಗಳು, ಖಾಸಗಿ ಆಸ್ಪತ್ರೆ. (ಒಟ್ಟು 5500+ ಕಡೆಗಳಲ್ಲಿ)

ಇದನ್ನೂ ಓದಿ: ಕಂಟೈನ್‌ಮೆಂಟ್‌ ವಲಯದಲ್ಲಿ ಕಠಿನ ನಿರ್ಬಂಧ : ಅಗತ್ಯ ಸೇವೆಗಳಿಗಷ್ಟೇ ಅವಕಾಶ

ಬೇಕಿರುವ ದಾಖಲಾತಿಗಳು: ಆಧಾರ್ ಕಾರ್ಡ್, ಚುನಾವಣಾ ಮತದಾರರ ಗುರುತಿನ ಚೀಟಿ, ಚಾಲನಾ ಪರವಾನಗಿ, ಪಾನ್‌ಕಾರ್ಡ್, ಪಾಸ್‌ಪೋರ್ಟ್. (ಇವುಗಳಲ್ಲಿ ಯಾವುದಾದರೂ ಒಂದು)

ದರ ಎಷ್ಟು?

ಸರ್ಕಾರಿ ಆರೋಗ್ಯಕೇಂದ್ರ – ಉಚಿತ.

ಖಾಸಗಿ ಆರೋಗ್ಯ ಕೇಂದ್ರ – ಪ್ರತಿ ಡೋಸ್ 250 ರೂ. (ಒಟ್ಟು 500 ರೂ)