ಸೋಂಕಿತರ ಅಂಕಿ ಅಂಶ ಪ್ರಕಟನೆ ಮತ್ತೆ ಶುರುಮಾಡಿದ ಬ್ರೆಜಿಲ್‌

ರಿಯೋ ಡಿ ಜನೈರೋ: ಕೋವಿಡ್‌ ಸೋಂಕು ಪೀಡಿತರು, ಮರಣ ಹೊಂದಿದವರ ಅಂಕಿ ಅಂಶ ಪ್ರಕಟನೆಯನ್ನು ಬ್ರೆಜಿಲ್‌ ಸರಕಾರ ಸ್ಥಗಿತಗೊಳಿಸಿದ ಬೆನ್ನಲ್ಲೇ ಈಗ ಮತ್ತೆ ಪುನರಾರಂಭಿಸಿದೆ.

ಇದಕ್ಕೆ ಕಾರಣವಾಗಿದ್ದು, ಅಲ್ಲಿನ ಸುಪ್ರೀಂಕೋರ್ಟ್‌ ಆದೇಶ. ಸರಕಾರ ಕೋವಿಡ್‌ ಸೋಂಕು ತೀವ್ರವಾಗಿರುವುದನ್ನು ಮುಚ್ಚಿ ಹಾಕಲು ಅಂಕಿ ಅಂಶ ಪ್ರಕಟನೆಯನ್ನು ಸ್ಥಗಿತಗೊಳಿಸಲು ತೀರ್ಮಾನಿಸಲಾಗಿದೆ ಎಂದು ದೂರಲಾಗಿತ್ತು. ಈ ಬಗ್ಗೆ ಅಲ್ಲಿನ ಪ್ರಧಾನಿ ಜೈರ್‌ ಬೊಲ್ಸೊನಾರೋ ಘೋಷಿಸಿದ್ದರು. ಆದರೆ ಇದರ ವಿರುದ್ಧ ಸುಪ್ರೀಂ ಕೋರ್ಟಿಗೆ ಅರ್ಜಿ ಸಲ್ಲಿಸಿದ್ದರಿಂದ ನ್ಯಾಯಾಲಯ ಈ ಆದಶ ನೀಡಿದೆ.

ಅಲ್ಲದೇ ಈ ಮಾಹಿತಿಯನ್ನು ಬ್ರೆಜಿಲ್‌ ಜನರಿಗೆ ನೀಡುವುದು ಕರ್ತವ್ಯ ಎಂದು ಹೇಳಿದೆ. ಅಲ್ಲದೇ ಈ ಕುರಿತ ದತ್ತಾಂಶಗಳನ್ನು ತಿರುಚುವುದು, ತಿಳಿಸದೇ ಇರುವುದು ಮಾಡಕೂಡದು ಎಂದು ಹೇಳಿದೆ. ಸುಪ್ರೀಂ ಕೋರ್ಟ್‌ ತೀರ್ಪು ಮತ್ತು ಜನರಿಂದ ವ್ಯಾಪಕ ಟೀಕೆಯ ಬಳಿಕ ಸೋಮವಾರ ರಾತ್ರಿ ವೇಳೆಗೆ ಅಂಕಿ ಅಂಶ ಪ್ರಕಟವಾಗಿದೆ.