ಮಣಿಪಾಲ: ಕೋವಿಡ್-19 ವೈರಸ್‌ ಗೆ ಏನು ಕಾರಣ? ಹೇಗೆ ಹರಡಿತು ? ಎಂದು ನಾವು ಅಂತರ್ಜಾಲದಲ್ಲಿ ಜಾಲಾಡಿದರೆ 5ಜಿ ಕಾರಣ ಎಂಬ ಉತ್ತರ ಬರುತ್ತದೆ. ಹೊಸ 5 ಜಿ ನೆಟ್‌ವರ್ಕ್‌ಗಳು ರೋಗಕ್ಕೆ ಕಾರಣವಾಗಿವೆ ಎಂಬ ಸಂದೇಶಗಳು ಸಾಮಾಜಿಕ ಜಾಲತಾಣಗಳಲ್ಲಿ ಕಂಡುಬರುತ್ತಿದೆ. ಇಂತಹ ಊಹಾಪೋಹಗಳನ್ನು ಅಮೆರಿಕ ಸೇರಿದಂತೆ ಇತರ ದೇಶಗಳ ಜನರು ಹಬ್ಬಿಸಿದ್ದಾರೆ. ವಿಪರ್ಯಾಸ ಎಂದರೆ ಕೆಲವು ದೇಶಗಳಲ್ಲಿ ಸೆಲೆಬ್ರಿಟಿಗಳೇ ಇಂತಹ ಹೇಳಿಕೆಗಳ‌ನ್ನು ನೀಡುತ್ತಿದ್ದಾರೆ. ಟ್ವಿಟರ್‌ಗಳಲ್ಲಿ 3 ಲಕ್ಷ ಫಾಲೋವರ್‌ಗಳನ್ನು ಹೊಂದಿರುವ ನಟರೊಬ್ಬರು ಇಂತಹ ಅನುಮಾನವನ್ನು ವ್ಯಕ್ತಪಡಿಸಿದ್ದು, ಅವರನ್ನು ಬೆಂಬಲಿಸಿ ಲಕ್ಷಾಂತರ ಪ್ರತಿಕ್ರಿಯೆಗಳು ಬಂದಿವೆ. ಆದರೆ ವಿಜ್ಞಾನಿಗಳ ಪ್ರಕಾರ 5ಜಿ ಮತ್ತು ಕೊರೊನಾ ವೈರಸ್‌ ಗೆ ಯಾವುದೇ ಸಂಬಂಧ ಇಲ್ಲ. ಈ ಕುರಿತಂತಹ ಚರ್ಚೆಗಳೇ ಹಾಸ್ಯಾಸ್ಪದ.
5 ಜಿಯನ್ನು ವಿರೋಧಿಸುತ್ತಿರುವ ಗುಂಪು ಇಂತಹ ಸುಳ್ಳು ಸುದ್ದಿಯನ್ನು ಹರಡಿಸುತ್ತಿವೆ. ಫೇಸ್ಬುಕ್ ಗುಂಪು ಸೇರಿದಂತೆ ಯೂಟ್ಯೂಬ್‌ ನಲ್ಲಿ ಇದನ್ನು ಹಂಚಿಕೊಳ್ಳಲಾಗಿದೆ. ಮಾರ್ಚ್‌ ತಿಂಗಳಿನಲ್ಲಿ ಬೆನ್‌ ಮ್ಯಾಕಿ ಎಂಬವರು ಫೇಸ್ಬುಕ್ ನಲ್ಲಿ 5ಜಿಯನ್ನು ಕೊರೊನಾ ವೈರಸ್‌ ಗೆ ಲಿಂಕ್‌ ಮಾಡಿದ್ದರು. “ಪ್ರಪಂಚದಾದ್ಯಂತ 5 ಜಿ ಗೋಪುರಗಳನ್ನು ನಿರ್ಮಿಸುತ್ತಿರುವುದರಿಂದ ಈ ವೈರಸ್‌ಗಳು ಹಬ್ಬುತ್ತಿವೆ. ಇದಕ್ಕೆ 5ಜಿ ತಂತ್ರಜ್ಞಾನ ಕಾರಣ ಎಂದಿದ್ದರು. ಇದು ಜಗತ್ತಿನ ಜನ ಸಂಖ್ಯೆಯನ್ನು ಕಡಿಮೆ ಮಾಡುವ ಪ್ರಯತ್ನ. ಕೊರೊನಾ ವೈರಸ್‌ ನಿಗ್ರಹಿಸಲು ಅಭಿವೃದ್ಧಿಪಡಿಸುವ ಲಸಿಕೆಗಳು ನಿಜವಾಗಿಯೂ ಲಸಿಕೆಗಳಲ್ಲ; ವಾಸ್ತವವಾಗಿ ಜನರಲ್ಲಿ ಅಳವಡಿಸಲಾಗುವ ಚಿಪ್‌ಗ್ಳಾಗಿವೆ ಎಂದು ಮ್ಯಾಕಿ ಹೇಳಿದರು.
COVID-19 ರೇಡಿಯೊ ತರಂಗಗಳಿಂದೆ‌ಲ್ಲ ಹರಡುವುದಿಲ್ಲ. ವ್ಯಕ್ತಿಯಿಂದ ವ್ಯಕ್ತಿಗೆ ಹರಡುವ ವೈರಸ್‌ನಿಂದ ಹರಡುತ್ತದೆ ಎಂದು ಎಫ್‌ಸಿಸಿ, ಫುಡ್‌ ಅಂಡ್‌ ಡ್ರಗ್‌ ಅಡ್ಮಿನಿಸ್ಟ್ರೇಷನ್‌ ಮತ್ತು ಪರಿಸರ ಸಂರಕ್ಷಣಾ ಸಂಸ್ಥೆ ಮಾಹಿತಿ ನೀಡಿದೆ. ಇವೆಲ್ಲರೂ 5 ಜಿ ಸುರಕ್ಷಿತವೆಂದು ಹೇಳಿದ್ದಾರೆ.
5 ಜಿ ಎಂಬುದು ಹೊಸ ಸೂಪರ್‌-ಫಾಸ್ಟ್‌ ವೈರ್‌ಲೆಸ್‌ ತಂತ್ರಜ್ಞಾನವಾಗಿದೆ. ಅಮೆರಿಕದಲ್ಲಿ ಪ್ರಮುಖ ನಗರಗಳು ಲೈವ್‌ 5 ಜಿ ಸಂಪರ್ಕ ಹೊಂದಿವೆ. ಚೀನ, ದಕ್ಷಿಣ ಕೊರಿಯಾ, ಜರ್ಮನಿ ಮತ್ತು ಯುಕೆ ಮುಂತಾದ ಹಲವು ದೇಶಗಳಲ್ಲಿ 5 ಜಿ ಸೇವೆಗಳಿವೆ. ಇದು ತಂತ್ರಜ್ಞಾನ ಕ್ಷೇತ್ರಗಳಿಗೆ ತುಂಬಾ ನೆರವಾಗಲಿದೆ. ನಾವು ವಾಸಿಸುವ ವಿಧಾನವನ್ನು ಬದಲಾಯಿಸಲು ಈ ತಂತ್ರಜ್ಞಾನವು ಸಜ್ಜಾಗಿದೆ. ಸ್ವಯಂ ಚಾಲನಾ ಕಾರುಗಳಿಂದ ಹಿಡಿದು ಸುಧಾರಿತ ತಂತ್ರಜ್ಞಾನಗಳು ಈ ಸೇವೆ ಆರಂಭಗೊಂಡ ಬಳಿಕ ಜೀವ ಪಡೆಯಲಿವೆೆ. 5ಜಿ ಸೇವೆಗಳನನು ಹೊಂದಿರುವ ದೇಶಗಳು ಈ ದಶಕವನ್ನು ಆಳಲಿವೆ ಎಂದು ಹೇಳಲಾಗುತ್ತಿದೆ.
5 ಜಿ ಆರೋಗ್ಯ ಕಾಳಜಿ?
ಕಂಪನಿಗಳು 5 ಜಿ ಬಗ್ಗೆ ಮಾತನಾಡಲು ಪ್ರಾರಂಭಿಸಿದಾಗಿನಿಂದ, ಆರೋಗ್ಯದ ಮೇಲೆ ತಂತ್ರಜ್ಞಾನದ ಪ್ರಭಾವದ ಬಗ್ಗೆ ಕೆಲವರು ಕಳವಳ ವ್ಯಕ್ತಪಡಿಸಿದ್ದಾರೆ. 5 ಜಿ ಯ ಒಂದು ಆವೃತ್ತಿಯನ್ನು ಮಿಲಿ ಮೀಟರ್‌ ತರಂಗ ಎಂದು ಕರೆಯಲಾಗುತ್ತದೆ. ಇದು ಹೆಚ್ಚಿನ ಆವರ್ತನದ ರೇಡಿಯೊ ತರಂಗಗಳಲ್ಲಿ ಚಲಿಸುತ್ತದೆ. ಆ ಸಂಕೇತಗಳು ಹೆಚ್ಚು ದೂರ ಪ್ರಯಾಣಿಸಲು ಸಾಧ್ಯವಿಲ್ಲ, ಇದಕ್ಕೆ ಗೋಪುರಗಳನ್ನು ಹೆಚ್ಚಿನ ಸ್ಥಳಗಳಲ್ಲಿ ಸ್ಥಾಪಿಸಬೇಕು. ರೇಡಿಯೊ ತರಂಗಗಳು ಮಿದುಳಿನ ಕ್ಯಾನ್ಸರ್‌, ತಲೆನೋವು ಮತ್ತು ಇತರ ಕಾಯಿಲೆಗಳಿಗೆ ಕಾರಣವಾಗುವ ಹಾನಿಕಾರಕ ವಿಕಿರಣ ಹೆಚ್ಚಾಗಬಹುದು ಎಂಬ ಆತಂಕ ವ್ಯಕ್ತವಾಗಿದೆ. ಈ ಕುರಿತು ಇನ್ನಷ್ಟು ಸಂಶೋಧನೆ ನಡೆಯಬೇಕಿದೆ.
