ಕೊರೋನಾ ಮಹಾಮಾರಿ: ಮೃತರ ಸಂಖ್ಯೆ 425ಕ್ಕೆ ಏರಿಕೆ, ಅಮೆರಿಕಾದ ನೆರವು ಪಡೆಯಲು ಒಪ್ಪಿದ ಚೀನಾ

ವುಹಾನ್: ಮಾರಾಣಾಂತಿಕ ಕೊರೋನಾ ವೈರಸ್ ನಿಂದ ಸಾವನ್ನಪ್ಪುವವರ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದ್ದು ಚೀನಾ ಸರ್ಕಾರ ಅಮೆರಿಕಾದ ನೆರವನ್ನು ಪಡೆಯಲು ಒಪ್ಪಿದೆ. ಸೋಮವಾರ ಒಂದೇ ದಿನ 64 ಜನರು ಬಲಿಯಾಗಿದ್ದು ಮೃತರ ಸಂಖ್ಯೆ 425ಕ್ಕೆ ಏರಿದೆ.

ಮೃತರಾದ 64 ಜನರು ಹುಬೈ ಪ್ರಾಂತ್ಯದವರು ಎಂದು ತಿಳಿದುಬಂದಿದ್ದು ವುಹಾನ್ ನಗರ ಅಕ್ಷರಶಃ ನಲುಗಿಹೋಗಿದೆ. ಈಗಾಗಲೇ ವಿಶ್ವ ಆರೋಗ್ಯ ಸಂಸ್ಥೆ ಜಾಗತಿಕ ತುರ್ತು ಪರಿಸ್ಥಿತಿ ಘೋಷಿಸಿದ್ದು, ಸೋಂಕು ಒಬ್ಬರಿಂದ ಮತ್ತೊಬ್ಬರಿಗೆ ಹರಡುವ ಪ್ರಮಾಣ ಮತ್ತಷ್ಟು ಹೆಚ್ಚಾಗಲಿರುವ ಅಪಾಯವಿದೆ ಎಂದು ಅಮೆರಿಕಾದ ವೈದ್ಯಾಧಿಕಾರಿ ಡಾ. ನ್ಯಾನ್ಸಿ ಮೆಶನೇರ್ ತಿಳಿಸಿದ್ದಾರೆ.

ಸೋಮವಾರ ಒಂದೇ ದಿನ 3,235 ಜನರಿಗೆ ಸೋಂಕು ತಗಲಿರುವ ಶಂಕೆ ವ್ಯಕ್ತಪಡಿಸಲಾಗಿದ್ದು ಒಟ್ಟು ಪ್ರಮಾಣ 20,438ಕ್ಕೆ ಏರಿದೆ. ಇತರ 23 ದೇಶಗಳಲ್ಲಿ 151 ಕೊರೋನಾ ಸೋಂಕು ಪ್ರಕರಣ ದಾಖಲಾಗಿದ್ದು, ಅಮೆರಿಕಾ, ಜಪಾನ್, ಥೈಲ್ಯಾಂಡ್, ಭಾರತ. ಹಾಂಕ್ ಕಾಂಗ್ , ಬ್ರಿಟನ್ ಮುಂತಾದ ದೇಶಗಳಲ್ಲಿ ಭಾರೀ ಮುನ್ನೆಚ್ಚರಿಕೆ ವಹಿಸಲಾಗಿದೆ.ಅಮೇರಿಕಾದಲ್ಲಿ ಈಗಾಗಲೇ 11 ಪ್ರಕರಣಗಳು ಪತ್ತೆಯಾಗಿದೆ.

ಕೊರೋನಾ ಪರಿಣಾಮದಿಂದ ಚೀನಾದಲ್ಲಿ ಶೇರು ಮಾರುಕಟ್ಟೆ 8% ಕುಸಿದಿದೆ.