ಕೆರೆಯಲ್ಲಿ ಕಾಡಾನೆ ಶವ : ಮಕಾನಾ ಜಾತಿಯ ಕಾಡಾನೆ ಸಾವು

ಮಡಿಕೇರಿ: ಇಲ್ಲಿನ ಕಳತ್ಮಾಡು-ಹೊಸಕೋಟೆ ವ್ಯಾಪ್ತಿಯ ಕೆರೆ ಯೊಂದರಲ್ಲಿ ಸುಮಾರು 20 ವರ್ಷದ ಮಕಾನಾ ಜಾತಿಯ ಕಾಡಾನೆ ಶವ ಪತ್ತೆಯಾಗಿದೆ. ಸ್ಥಳೀಯ ನಿವಾಸಿ ಜಮ್ಮಡ ಗೀತಾ ಚಂಗಪ್ಪ ಅವರಿಗೆ ಸೇರಿದ ಕಾಫಿ ತೋಟದಲ್ಲಿರುವ ಕೆರೆಯಲ್ಲಿ ಸೋಮವಾರ ಕಾಡಾನೆ ಮೃತಪಟ್ಟಿರುವುದು ಕಂಡು ಬಂದಿದೆ.

ಕಾಫಿ, ಕಾಳುಮೆಣಸು ಕೊಯ್ಲು ಮುಗಿಸಿ, ಅಲ್ಲಿನ ಕೆರೆಯಿಂದ ಕಾಫಿ ತೋಟಗಳಿಗೆ ನೀರು ಹಾಯಿಸಿದ್ದರಿಂದಾಗಿ ಕೆರೆಯಲ್ಲಿ ಅಷ್ಟಾಗಿ ನೀರಿರಲಿಲ್ಲ. ಆನೆ ಮೂರು ದಿನಗಳ ಹಿಂದೆಯೇ ಮೃತಪಟ್ಟಿರುವ ಸಾಧ್ಯತೆಯಿದೆ. ಆದರೆ ತೋಟದ ಮಾಲಕರ ಕುಟುಂಬ ಊರಿನಲ್ಲಿ ಇರದಿದ್ದ ಕಾರಣ ಅರಿವಿಗೆ ಬಂದಿರಲಿಲ್ಲ.

ನಾಗರಹೊಳೆ ವನ್ಯಜೀವಿ ವಿಭಾಗದ ಹುಣಸೂರಿನ ಪಶುವೈದ್ಯ ಮುಜೀಬ್‌ ಅವರು ಆನೆಯ ಶವ ಪರೀಕ್ಷೆ ನಡೆಸಿದ್ದು, ವರದಿಯ ಬಳಿಕವಷ್ಟೇ ಸಾವಿನ ಸತ್ಯಾಂಶ ಹೊರ ಬೀಳಲಿದೆ.