ಮಗಳ ನಾಮಕರಣಕ್ಕೆ ಹೆಲ್ಮೆಟ್‌ ವಿತರಿಸಿದ ಪೇದೆ

ಕನಕಗಿರಿ: ಸಾರಿಗೆ ನಿಯಮ ಪಾಲನೆಗೆ ದುಬಾರಿ ದಂಡ ವಿಧಿಸುತ್ತಿರುವ ಬೆನ್ನಲ್ಲೇ ಪಟ್ಟಣದ ಪೊಲೀಸ್‌ ಠಾಣೆ ಪೇದೆ ಗಂಗಾ ಧರ ನಾಯಕ ತಮ್ಮ ಮಗಳ ನಾಮಕರಣ ದಲ್ಲಿ ಅತಿಥಿಗಳಿಗೆ ಉಚಿತವಾಗಿ ಹೆಲ್ಮೆಟ್‌ ವಿತರಿಸಿ ವಿಶಿಷ್ಟತೆ ಮೆರೆದಿದ್ದಾರೆ. ಪೊಲೀಸ್‌ ಕ್ವಾರ್ಟಸ್‌ನಲ್ಲಿ ಹಮ್ಮಿಕೊಂಡಿದ್ದ ನಾಮಕರಣ ಕಾರ್ಯಕ್ರಮದಲ್ಲಿ ಚಾಲನಾ ಪರವಾನಗಿ ಹೊಂದಿರುವ ವಾಹನ ಸವಾರರಿಗೆ ಉಚಿತವಾಗಿ 20 ಹೆಲ್ಮೆಟ್‌ಗಳನ್ನು ವಿತರಿಸಿದ್ದಾರೆ.

ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಗಂಗಾಧರ, ವಾಹನ ಸವಾರರು ಹೆಲ್ಮೆಟ್‌ ಧರಿಸುವುದು ಕಡ್ಡಾಯ. ಇದರಿಂದ ಮಗಳ ನಾಮಕರಣದ ನಿಮಿತ್ತ ಹೆಲ್ಮೆಟ್‌ ವಿತರಿಸಿದ್ದೇನೆ ಎಂದರು. ಪಿಎಸ್‌ಐ ಪ್ರಶಾಂತ, ಎಎಸ್‌ಐ ಲಕ್ಕಪ್ಪ ವಾಲ್ಮೀಕಿ, ಸಿಬ್ಬಂದಿ ಸಿದ್ದಯ್ಯ ಗುರುವಿನ್‌, ಕೋಟ್ರೇಶ, ಗವಿಸಿದ್ದಯ್ಯ, ಶೇಖರ, ಸಿದ್ದರಾಮಪ್ಪ, ಪುತ್ರಪ್ಪ ಇತರರಿದ್ದರು.