Surathkal ಕೊಟ್ಟಾರ ಚೌಕಿ ಸರ್ಕಲ್‌ಗೆ ಕ್ಯಾ| ಪ್ರಾಂಜಲ್‌ ಹೆಸರು ?

ಸುರತ್ಕಲ್‌: ಕಾಶ್ಮೀರದ ರಜೌರಿಯಲ್ಲಿ ಉಗ್ರರೊಂದಿಗೆ ಹೋರಾಡಿ ದೇಶಕ್ಕಾಗಿ ಪ್ರಾಣವನ್ನೇ ಬಲಿದಾನಗೈದ ಕರುನಾಡಿನ ವೀರಯೋಧ ಕ್ಯಾಪ್ಟನ್‌ ಪ್ರಾಂಜಲ್‌ ಅವರ ಹೆಸರನ್ನು ಹೆದ್ದಾರಿ ಮತ್ತು ನಗರ ಸಂಪರ್ಕಿಸುವ ಪ್ರಮುಖವಾದ ಕೊಟ್ಟಾರ ಚೌಕಿ ಜಂಕ್ಷನ್‌ ಸರ್ಕಲ್‌ ಗೆ ಹೆಸರು ಇಡಲಾಗುವುದು ಎಂದು ಶಾಸಕ ಡಾ| ಭರತ್‌ ಶೆಟ್ಟಿ ವೈ. ಹೇಳಿದ್ದಾರೆ.

ಕೊಟ್ಟಾರಚೌಕಿಯಲ್ಲಿ ಅಮರ್‌ ಜವಾನ್‌ ಥೀಮ್‌ ಪಾರ್ಕ್‌ ನಿರ್ಮಾಣವಾಗಲಿದೆ. ಇದರ ಜತೆಗೆ ಸರ್ಕಲ್‌ಗೆ ಮಂಗಳೂರಿನಲ್ಲಿ ಕಲಿತು, ಬೆಳೆದು ಅವಿನಾಭಾವ ಸಂಬಂಧ ಹೊಂದಿರುವ ಕ್ಯಾ| ಪ್ರಾಂಜಲ್‌ ಹೆಸರಿಡುವುದು ಸೂಕ್ತವಾಗಿದೆ. ಈ ಬಗ್ಗೆ ಮಂಗಳೂರು ಪಾಲಿಕೆ ಕ್ರಮ ಕೈಗೊಳ್ಳುವಂತೆ ಪತ್ರ ಬರೆದು ಸೂಚನೆ ನೀಡಲಾಗುವುದು ಎಂದು ತಿಳಿಸಿದ್ದಾರೆ.

ಉತ್ತಮ ಜೀವನಕ್ಕಾಗಿ ಲಕ್ಷಾಂತರ ವೇತನ ಬರುವ ಬೇರೆ ಉದ್ಯೋಗವನ್ನು ಆರಿಸುವ ಬದಲು ಬಾಲ್ಯದಿಂದಲೇ ಸೈನ್ಯ ಸೇರಿ ದೇಶ ಸೇವೆ ಮಾಡುವ ಕ್ಯಾ| ಪ್ರಾಂಜಲ್‌ ಅವರ ನಿರ್ಧಾರ, ಅವರ ಸಾಹಸಗಾಥೆ ಯುವಶಕ್ತಿಗೆ ಪ್ರೇರಣೆಯಾಗಿದೆ. ಕುಟುಂಬಕ್ಕೆ ಅನಿರೀಕ್ಷಿತ ಆಘಾತವನ್ನು ಸಹಿಸುವ ಶಕ್ತಿ ದೇವರು ನೀಡಲಿ ಎಂದು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ವಿದಾಯಕ್ಕೆ ಜನಸಾಗರ
ಕುಟುಂಬದಿಂದ ಕೃತಜ್ಞತೆ
ಸುರತ್ಕಲ್‌: ಕಾಶ್ಮೀರದ ರಜೌರಿಯಲ್ಲಿ ನಡೆದ ಉಗ್ರರೊಂದಿಗಿನ ಕಾಳಗದಲ್ಲಿ ಕ್ಯಾ|ಪ್ರಾಂಜಲ್‌ ಅವರು ಹುತಾತ್ಮರಾಗಿದ್ದು, ಅವರ ಭಾವಪೂರ್ಣ ವಿದಾಯದ ವೇಳೆ ಭಾರೀ ಜನಸ್ತೋಮ ಸೇರಿ ಪ್ರೀತಿ ಅಭಿಮಾನ, ಗೌರವ ತೋರಿದ್ದು, ಮನತುಂಬಿ ಬಂದಿದೆ. ಪ್ರಾಂಜಲ್‌ ಕುಟುಂಬವು ಪ್ರತೀ ಭಾರತೀಯರಿಗೂ ಆಭಾರಿಯಾಗಿದೆ ಪ್ರಾಂಜಲ್‌ ಅವರ ತಂದೆ ಎಂ. ವೆಂಕಟೇಶ್‌ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.