ಮತ್ತೊಮ್ಮೆ ಗಡಿಯಾರ ಕಂಬ ತೆರವು; ಕಾಂಗ್ರೆಸ್‌ ಸದಸ್ಯರ ವಿರೋಧ

ಬಳ್ಳಾರಿ: ಗಡಗಿ ಚನ್ನಪ್ಪ ವೃತ್ತದಲ್ಲಿನ “ಗಡಿಯಾರ ಗೋಪುರ’ ಮತ್ತೂಮ್ಮೆ ವಿವಾದಕ್ಕೀಡಾಗಿದೆ. ದಶಕದ ಹಿಂದೆ ವೃತ್ತದಲ್ಲಿದ್ದ ಹಿಂದಿನ ಹಳೆಯ ಗಡಿಯಾರ ಗೋಪುರವನ್ನು ರಾತ್ರೋರಾತ್ರಿ ಧ್ವಂಸಗೊಳಿಸಿದ್ದು, ಇದೀಗ ಆ ಸ್ಥಳದಲ್ಲಿ ಹೊಸದಾಗಿ ನಿರ್ಮಿಸಿದ್ದ “ಗಡಿಯಾರ ಗೋಪುರ’ವನ್ನು ಸಹ ಮಂಗಳವಾರ ರಾತ್ರಿ ತೆರವುಗೊಳಿಸಲಾಗಿದೆ. ಲೆಬನಾನ್‌ ಮಾದರಿಯಲ್ಲಿ 140 ಅಡಿ ಎತ್ತರದ ಗಡಿಯಾರ ಗೋಪುರವನ್ನು ಪುನಃ ಹೊಸದಾಗಿ ನಿರ್ಮಾಣಕ್ಕೆ ಮುಂದಾಗಿರುವುದು ಈ ವಿವಾದಕ್ಕೆ ಕಾರಣವಾಗಿದ್ದು, ಪಾಲಿಕೆ ಸದಸ್ಯರಿಂದ ವಿರೋಧ ವ್ಯಕ್ತವಾಗಿದೆ.

ಸಾರಿಗೆ, ಜಿಲ್ಲಾ ಉಸ್ತುವಾರಿ ಸಚಿವ ಬಿ. ಶ್ರೀರಾಮುಲು, ನಗರ ಶಾಸಕ ಜಿ.ಸೋಮಶೇಖರರೆಡ್ಡಿಯವರು ಈಗಾಗಲೇ ಘೋಷಿಸಿದಂತೆ ಗಡಗಿ ಚನ್ನಪ್ಪ ವೃತ್ತದಲ್ಲಿ 7
ಕೋಟಿ ರೂ. ವೆಚ್ಚದಲ್ಲಿ 140 ಅಡಿ ಎತ್ತರದ ಅತ್ಯಾಧುನಿಕ ಗಡಿಯಾರ ಗೋಪುರ ನಿರ್ಮಾಣಕ್ಕೆ ಕಳೆದ ಆ.15ರಂದು ಭೂಮಿಪೂಜೆ ನೆರವೇರಿಸಿದ್ದು, ಮಂಗಳವಾರ ರಾತ್ರಿ ವೃತ್ತದಲ್ಲಿದ್ದ ಗಡಿಯಾರ ಗೋಪುರವನ್ನು ತೆರವುಗೊಳಿಸುವ ಮೂಲಕ ಕಾಮಗಾರಿಗೆ ಚಾಲನೆ ನೀಡಲಾಗಿದೆ. ಆದರೆ, ಈ ಕುರಿತು ಪಾಲಿಕೆ ಅನುಮತಿ ಪಡೆದಿಲ್ಲ ಎಂದು ಆರೋಪಿಸಿರುವ ಪಾಲಿಕೆ ಸದಸ್ಯರು, ಮಂಗಳವಾರ ಮಧ್ಯರಾತ್ರಿಯಿಂದ ವೃತ್ತದಲ್ಲಿ ಬೆಳಗ್ಗೆವರೆಗೆ ಧರಣಿ ನಡೆಸಿದರು. ಗಡಗಿ ಚನ್ನಪ್ಪ
ವೃತ್ತದಲ್ಲಿ 1964ರಲ್ಲಿ ನಿರ್ಮಿಸಿದ್ದ ಹಿಂದಿನ ಹಳೆಯ ಗಡಿಯಾರ ಗೋಪುರ ತನ್ನದೇ ಆದ ಹಿನ್ನೆಲೆ ಹೊಂದಿತ್ತು.

ಅಂಥ ಗಡಿಯಾರ ಗೋಪುರವನ್ನು ಮಾಜಿ ಸಚಿವ ಜಿ.ಜನಾರ್ದನರೆಡ್ಡಿ ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದಾಗ 2009, ಜೂನ್‌ 21ರಂದು ರಾತ್ರೋರಾತ್ರಿ ಧ್ವಂಸಗೊಳಿಸಿ ಮಾಯ ಮಾಡಲಾಗಿತ್ತು. ಅಂದು ಈ ಕುರಿತು ಗಾಂಧಿ ನಗರ ಠಾಣೆಯಲ್ಲಿ ಸುಮೋಟೊ ಪ್ರಕರಣ ದಾಖಲಾಗಿತ್ತಾದರೂ, ಧ್ವಂಸಗೊಳಿಸಿದವರು ಯಾರು? ಏತಕ್ಕೆ ಧ್ವಂಸಗೊಳಿಸಿದ್ದಾರೆ? ಎಂಬುದು ತನಿಖೆಯಾಗಿಲ್ಲ.

ಈವರೆಗೂ ಪತ್ತೆಯಾಗದೆ ನಿಗೂಢವಾಗಿದೆ. ಆ ಕುರಿತು ಮೊದಲು ಕ್ಲಿಯರೆನ್ಸ್‌ ಪಡೆಯಬೇಕು ಎಂದು ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ಚರ್ಚಿಸಿ, ಪ್ರೊಸಿಡಿಂಗ್ಸ್‌ನಲ್ಲೂ ಸೇರಿಸಲಾಗಿದೆ. ನಂತರ ಹಾಲಿ ಇರುವ ಗಡಿಯಾರ ಕಂಬವನ್ನು ತೆರವುಗೊಳಿಸುವಂತೆ ಸೂಚಿಸಲಾಗಿದೆ.

ಆದರೆ, ಇದ್ಯಾವುದನ್ನೂ ಮಾಡದೆ, ಪಾಲಿಕೆ ಮೇಯರ್‌, ಉಪಮೇಯರ್‌, 26 ಸದಸ್ಯರಿಗೆ ಯಾವುದೇ ಮಾಹಿತಿ ನೀಡದೆ, ಸಚಿವ, ಶಾಸಕರು ಗಡಿಯಾರ ಗೋಪುರವನ್ನು ತೆರವುಗೊಳಿಸಿದ್ದಾರೆ ಎಂದು ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷ ಜಿ.ಎಸ್‌.ಮಹ್ಮದ್‌ ರಫೀಕ್‌, ಪ್ರಚಾರ ಸಮಿತಿ ಅಧ್ಯಕ್ಷ ಜೆ.ಎಸ್‌. ಆಂಜನೇಯಲು, ಪಾಲಿಕೆ ಸಭಾ ಮುಖ್ಯಸ್ಥ ಆರೋಪಿಸಿದ್ದಾರೆ. ನಗರದ ಅಭಿವೃದ್ಧಿಗೆ ನಮ್ಮ ವಿರೋಧವಿಲ್ಲ.

ಹೊಸದಾಗಿ ಗಡಿಯಾರ ಗೋಪುರವನ್ನು ನಿರ್ಮಿಸುವುದಾದರೆ ಪಾಲಿಕೆಯ ಎಲ್ಲ ಸದಸ್ಯರಿಗೂ ಮಾಹಿತಿ ನೀಡಿ ಎಂದು ಅಸಮಧಾನ ವ್ಯಕ್ತಪಡಿಸಿದ ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷ ಜಿ.ಎಸ್‌.ಮಹ್ಮದ್‌ ರಫೀಕ್‌, ಚೆನ್ನಾಗಿ ಸುಸಜ್ಜಿತವಾಗಿರುವ ಗಡಿಯಾರ ಕಂಬವನ್ನು ಬೇರೆ ವೃತ್ತಕ್ಕಾದರೂ ಸ್ಥಳಾಂತರಿಸಬಹುದಿತ್ತು. ಅದನ್ನು ಮಾಡಿಲ್ಲ. ಗಡಿಯಾರದಲ್ಲಿ ಸುಮಾರು 3 ಲಕ್ಷ ರೂ. ಮೌಲ್ಯದ ನಾಲ್ಕು ಗಡಿಯಾರಗಳು ಇದ್ದವು. ಅವೆಲ್ಲವನ್ನೂ ಧ್ವಂಸಗೊಳಿಸಲಾಗಿದೆ ಎಂದು ಆರೋಪಿಸಿದರು.

ಬಳಿಕ 11.30ಗಂಟೆ ಸುಮಾರಿಗೆ ನಗರದ ಡಿಸಿ ಕಚೇರಿ ಆವರಣದಲ್ಲಿ ಜಮಾಯಿಸಿದ ಕಾಂಗ್ರೆಸ್‌ ಮುಖಂಡರು, ಕಾರ್ಯಕರ್ತರು, ಜಿಲ್ಲಾಧಿಕಾರಿ ಪವನ್‌ಕುಮಾರ್‌ ಮಾಲಪಾಟಿ ಅವರಿಗೆ ಮನವಿ ಸಲ್ಲಿಸಿದ್ದಾರೆ. ಧರಣಿ ಯಲ್ಲಿ ಪಾಲಿಕೆ ಸದಸ್ಯರಾದ ಎಂ. ಪ್ರಭಂಜನ್‌ ಕುಮಾರ್‌, ಮುಲ್ಲಂಗಿ ನಂದೀಶ್‌, ಮಿಂಚು ಶ್ರೀನಿವಾಸ್‌, ರಾಜಶೇಖರ್‌, ಮುಖಂಡರಾದ ಜಗನ್ನಾಥ, ಡಿ. ಸೂರಿ, ಶಿವರಾಜ್‌, ಮಾಜಿ ಸದಸ್ಯೆ ಪರ್ವಿನ್‌ ಬಾನು, ಕುಮಾರಮ್ಮ ಇದ್ದರು. ಪಾಲಿಕೆ ಸದಸ್ಯ ಇಬ್ರಾಹಿಂ ಬಾಬು, ಮೋತ್ಕರ್‌ ಶ್ರೀನಿವಾಸ್‌, ವೀರಶೇಖರರೆಡ್ಡಿ ಇದ್ದರು.