ಯಾವುದೇ ಒಂದು ಚಿತ್ರದ ಪಾತ್ರ ಅಥವಾ ಹಾಡು ಇಷ್ಟವಾದರೆ ಅದನ್ನೇ ಟೈಟಲ್‌ ಇಟ್ಟುಕೊಂಡು ಸಿನಿಮಾಗಳು ಬರೋದು ನಿಮಗೆ ಗೊತ್ತಿರಬಹುದು. ಈಗಾಗಲೇ ಆ ತರಹದ ಅನೇಕ ಉದಾಹರಣೆಗಳು ಕನ್ನಡ ಚಿತ್ರರಂಗದಲ್ಲಿ ಸಿಗುತ್ತವೆ. ಈಗ ಅದಕ್ಕೆ ಹೊಸ ಸೇರ್ಪಡೆ ಶಿವಣ್ಣನ ಸಿನಿಮಾವೊಂದರ ಪಾತ್ರ. ಹೌದು, ಶಿವರಾಜಕುಮಾರ್‌ ಅವರು “ಮಫ್ತಿ’ ಚಿತ್ರದಲ್ಲಿ ನಿರ್ವಹಿಸಿರುವ ಪಾತ್ರಕ್ಕೆ ಎಲ್ಲಾ ಕಡೆಯಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಅವರ ಗೆಟಪ್‌, ಸ್ಟೈಲ್‌, ಪಾತ್ರದ ಹೆಸರು …. ಎಲ್ಲವನ್ನೂ ಅಭಿಮಾನಿಗಳು ಇಷ್ಟಪಟ್ಟಿದ್ದಾರೆ. ಶಿವರಾಜಕುಮಾರ್‌ ಅವರು “ಮಫ್ತಿ’ ಚಿತ್ರದಲ್ಲಿ ಭೈರತಿ ರಣಗಲ್ಲು ಎಂಬ ಡಾನ್‌ ಪಾತ್ರ ಮಾಡಿದ್ದರು. ಈಗ ಅವರ ಪಾತ್ರದ ಹೆಸರೇ ಚಿತ್ರಕ್ಕೆ ಟೈಟಲ್‌ ಆಗಿದೆ. ಹೌದು, “ಭೈರತಿ ರಣಗಲ್ಲು’ ಎಂಬ ಶೀರ್ಷಿಕೆಯನ್ನು ಮಂಡಳಿಯಲ್ಲಿ ನೋಂದಣಿ ಮಾಡಲಾಗಿದೆ. ಮೂಲಗಳ ಪ್ರಕಾರ, ಈ ಟೈಟಲ್‌ ಕೆ.ಪಿ.ಶ್ರೀಕಾಂತ್‌ ಅವರ ಬ್ಯಾನರ್‌ನಲ್ಲಿ ನೋಂದಣಿಯಾಗಿದೆ.
ಹಾಗಾದರೆ ಕೆ.ಪಿ.ಶ್ರೀಕಾಂತ್‌ “ಭೈರತಿ ರಣಗಲ್ಲು’ ಸಿನಿಮಾ ನಿರ್ಮಿಸುತಾರಾ? ಎಂಬ ಪ್ರಶ್ನೆ ಸಹಜವಾಗಿಯೇ ಬರುತ್ತದೆ. ಸದ್ಯಕ್ಕೆ ಆ ಪ್ರಶ್ನೆಗೆ ಉತ್ತರವಿಲ್ಲ. ಆದರೆ, ಆ ಹೆಸರು ಶಿವಣ್ಣನಿಗೂ ತುಂಬಾ ಇಷ್ಟವಾಗಿದೆಯಂತೆ. ಮುಂದೆ ಆ ಟೈಟಲ್‌ನಡಿ ಸಿನಿಮಾ ಮಾಡುವ ಆಸೆಯೂ ಅವರಿಗಿದೆ ಎಂಬ ಮಾತು ಕೇಳಿಬರುತ್ತಿದೆ. ಸದ್ಯ ಶಿವರಾಜಕುಮಾರ್‌ ಕೈಯಲ್ಲಿ ಸಾಲು ಸಾಲು ಚಿತ್ರಗಳಿದ್ದು, ಆ ಚಿತ್ರಗಳನ್ನು ಮುಗಿಸಿದ ಬಳಿಕ “ಭೈರತಿ ರಣಗಲ್ಲು’ ಆರಂಭವಾಗಬಹುದು ಎಂಬ ಸುದ್ದಿಯೂ ಇದೆ.
ಇನ್ನು, ನಿರ್ಮಾಪಕ ಕೆ.ಪಿ.ಶ್ರೀಕಾಂತ್‌ ಸದ್ಯ ಶಿವರಾಜಕುಮಾರ್‌ಗೆ “ಟಗರು’ ಸಿನಿಮಾ ಮಾಡುತ್ತಿದ್ದು, ಈ ಚಿತ್ರ ಸಂಕ್ರಾಂತಿಗೆ ಬಿಡುಗಡೆಯಾಗಲಿದೆ. ಮುಂದೆ “ಭೈರತಿ ರಣಗಲ್ಲು’ ಚಿತ್ರವನ್ನು ಶಿವಣ್ಣನಿಗೆ ಮಾಡುತ್ತಾರಾ ಎಂಬುದನ್ನು ಕಾದು ನೋಡಬೇಕಿದೆ. ಇದರ ನಡುವೆಯೇ “ಭೈರತಿ ರಣಗಲ್ಲು’ ಚಿತ್ರಕ್ಕೆ “ಮಫ್ತಿ’ ನಿರ್ದೇಶಿಸಿದ ನರ್ತನ್‌ ಅವರೇ ನಿರ್ದೇಶನ ಮಾಡುತ್ತಾರೆನ್ನಲಾಗಿದೆ. ಅದೇನೇ ಆದರೂ ಸಿನಿಮಾ ಯಾವಾಗ ಆಗುತ್ತದೆ, ಯಾರು ಮಾಡುತ್ತಾರೆಂಬುದನ್ನು ತಿಳಿಯಲು ಇನ್ನೂ ಸಾಕಷ್ಟು ಸಮಯವಿದೆ.
