ಸರಕಾರದ ಆದೇಶ ಪಾಲಿಸಿ ಕ್ರಿಸ್ಮಸ್‌ ಆಚರಣೆ      

ಮಂಗಳೂರು: ಕ್ರಿಸ್ಮಸ್‌ ಆಚರಣೆಯ ಮೇಲೆ ಈ ವರ್ಷ ಕೂಡ ಕೊರೊನಾ ಕರಿನೆರಳು ಬಿದ್ದಿದೆ. ಅನಗತ್ಯ ಸಂಭ್ರಮವನ್ನು ಬದಿಗೊತ್ತಿ ಸರಕಾರದ ನೀಡಿರುವ ಮಾರ್ಗಸೂಚಿ ಪಾಲಿಸಿಕೊಂಡು ಏಸುಕ್ರಿಸ್ತರ ಜನನದ ಹಬ್ಬವನ್ನು ಆಚರಿಸುತ್ತೇವೆ ಎಂದು ಮಂಗಳೂರು ಧರ್ಮಪ್ರಾಂತದ ಬಿಷಪ್‌ ರೈ| ರೆ| ಡಾ| ಪೀಟರ್‌ ಪಾವ್ಲ್ ಸಲ್ಡಾನ್ಹಾ ಹೇಳಿದ್ದಾರೆ.

ಗುರುವಾರ ಬಿಷಪ್ಸ್‌ ಹೌಸ್‌ನಲ್ಲಿ ಮಾಧ್ಯಮದವರ ಜತೆ ಕ್ರಿಸ್ಮಸ್‌ ಸಹಮಿಲನದಲ್ಲಿ ಮಾತನಾಡಿ, ಸಂದೇಶ ನೀಡಿದರು. ಯಾವುದೇ ಚರ್ಚ್‌ಗಳಲ್ಲಿ ಸಾಂಸ್ಕೃತಿಕ ಕಾರ್ಯ ಕ್ರಮಗಳು ಇರುವುದಿಲ್ಲ. ಕ್ರಿಸ್ಮಸ್‌ ಹಬ್ಬದ ವಿಶೇಷ ಪೂಜೆ ಚರ್ಚ್‌ಗಳಲ್ಲಿ ಡಿ. 24ರ ಸಂಜೆ 7/ 7.30 ಗಂಟೆಗೆ ಮತ್ತು ಡಿ. 25ರಂದು ಬೆಳಗ್ಗೆ ಆಯೋಜಿಸುವ ಮೂಲಕ ಒಂದೇ ಬಾರಿಗೆ ಹೆಚ್ಚಿನ ಜನರು ಸೇರದಂತೆ ನೋಡಿಕೊಳ್ಳಲಾಗುವುದು ಎಂದರು.

ಪಾಲನಾ ಪರಿಷತ್‌ ಕಾರ್ಯದರ್ಶಿ ಪ್ರೊ| ಜಾನ್‌ ಡಿಸಿಲ್ವ , ಮಾಧ್ಯಮ ಸಲಹೆಗಾರ ಎಲಿಯಾಸ್‌ ಫೆರ್ನಾಂ ಡಿಸ್‌ ಉಪಸ್ಥಿತರಿದ್ದರು. ರೋಯ್‌ ಕ್ಯಾಸ್ಟಲಿನೋ ಕಾರ್ಯಕ್ರಮ ನಿರೂಪಿಸಿ ವಂ| ಜೆ.ಬಿ.ಸಲ್ಡಾನಾ ವಂದಿಸಿದರು.

ಗ್ರಾಮೀಣ ಭಾಗದಲ್ಲಿ ಬಿಷಪ್‌ ಬಲಿ ಪೂಜೆ
ಬಿಷಪ್‌ ರೈ| ರೆ| ಡಾ| ಪೀಟರ್‌ ಪಾವ್ಲ್ ಸಲ್ಡಾನ್ಹಾ ಅವರು ಹಬ್ಬದ ವಿಶೇಷ ಪೂಜೆಯನ್ನು ಡಿ. 24ರಂದು ನೆಲ್ಲಿಕಾರು ಚರ್ಚ್‌ ನಲ್ಲಿ, ಡಿ.25 ರಂದು ಬೆಳಗ್ಗೆ 8ಕ್ಕೆ ಮಂಗಳೂರಿನ ರೊಸಾರಿಯೋ ಕೆಥೆಡ್ರಲ್‌ನಲ್ಲಿ ನೆರವೇರಿಸುವರು.