ನೇಪಾಲ ಟಿ20 ಲೀಗ್‌ ಆಡಲಿರುವ ಕ್ರಿಸ್‌ ಗೇಲ್‌

ಕಾಠ್ಮಂಡು: ಯುನಿವರ್ಸಲ್‌ ಬಾಸ್‌ ಎಂದೇ ಖ್ಯಾತಿ ಪಡೆದಿರುವ ಕೆರಿಬಿಯನ್‌ ಬಿಗ್‌ ಹಿಟ್ಟರ್‌ ಕ್ರಿಸ್‌ ಗೇಲ್‌ ನೇಪಾಲದ ಟಿ20 ಕ್ರಿಕೆಟ್‌ ಲೀಗ್‌ನಲ್ಲಿ ಆಡಲಿದ್ದಾರೆ. ಗೇಲ್‌ ಈ ಲೀಗ್‌ನಲ್ಲಿ ಪಾಲ್ಗೊಳ್ಳುವ ವಿಶ್ವದ ಮೊದಲ ಸ್ಟಾರ್‌ ಅಂತಾರಾಷ್ಟ್ರೀಯ ಆಟಗಾರ ಎನಿಸಿಕೊಂಡಿದ್ದಾರೆ.

ನೇಪಾಲದ ಸ್ವಯಂ ಘೋಷಿತ ರಾಜ ನಡೆಸುತ್ತಿರುವ ಎವರೆಸ್ಟ್‌ ಪ್ರೀಮಿಯರ್‌ ಲೀಗ್‌ ಹೆಸರಿನ ಟಿ20 ಪಂದ್ಯಾವಳಿ ಇದಾಗಿದೆ. ಗೇಲ್‌ ಪೋಖರ ರಿನೋಸ್‌ ತಂಡದ ಪರ ಆಡಲಿದ್ದಾರೆ.

“ನೇಪಾಲದ ಜನತೆಗೆ ಗೇಲ್‌ ಎಂಬ ಬಿರುಗಾಳಿ ಶೀಘ್ರವೇ ಎದುರಾಗಲಿದೆ. ಎಲ್ಲರೂ ಸಜ್ಜಾಗಿ’ ಎಂದು ರಿನೋಸ್‌ ತಂಡ ಟ್ವೀಟ್‌ ಮಾಡಿದೆ.

6 ತಂಡಗಳ ನಡುವಿನ ಈ ಪಂದ್ಯಾವಳಿ ಮಾ. 14ರಿಂದ ಆರಂಭವಾಗಲಿದೆ. ಅಫ್ಘಾನಿಸ್ಥಾನದ ಮೊಹಮ್ಮದ್‌ ಶಾಜಾದ್‌, ಲಂಕಾದ ಉಪುಲ್‌ ತರಂಗ ಕೂಡ ಈ ಕೂಟದಲ್ಲಿ ಆಡಲಿದ್ದಾರೆ.