ಚಿನ್ನ ಗೆದ್ದ ಚಿತ್ರಾ; ಜಿನ್ಸನ್‌ಗೆ ಬೆಳ್ಳಿ

ಹೊಸದಿಲ್ಲಿ: ಏಶ್ಯನ್‌ ಚಾಂಪಿಯನ್‌ ಪಿ.ಯು. ಚಿತ್ರಾ ಸ್ವೀಡನ್‌ನಲ್ಲಿ ನಡೆದ “ಫೋಕ್‌ಸಾಮ್‌ ಗ್ರ್ಯಾನ್‌ಪ್ರಿ’ ಆ್ಯತ್ಲೆಟಿಕ್ಸ್‌ ಕೂಟದಲ್ಲಿ ಚಿನ್ನದ ಪದಕ ಗೆದ್ದು ಸಂಭ್ರಮಿಸಿದ್ದಾರೆ. ಚಿತ್ರಾ ವನಿತೆಯರ 1,500 ಮೀ. ಓಟದಲ್ಲಿ ಮಾಜಿ ಕಾಮನ್ವೆಲ್ತ್‌ ಗೇಮ್ಸ್‌ ಚಾಂಪಿಯನ್‌ ಕೀನ್ಯಾದ ಮೆರ್ಸಿ ಚೆರೋನೊ ಅವರನ್ನು ಹಿಂದಿಕ್ಕಿದರು. 4 ನಿಮಿಷ 12.65 ಸೆಕೆಂಡ್‌ಗಳಲ್ಲಿ ಚಿತ್ರಾ ಗುರಿ ಮುಟ್ಟಿದರು. ಇದು ಪ್ರಸಕ್ತ ಋತುವಿನಲ್ಲಿ ಚಿತ್ರಾ ಅವರ ಅತ್ಯುತ್ತಮ ಸಾಧನೆಯಾಗಿದೆ.

ಐಎಎಎಫ್ ವರ್ಲ್ಡ್ ಕ್ರಾಸ್‌ ಕಂಟ್ರಿ ಚಾಂಪಿಯನ್‌ ಹಾಗೂ 2013ರ ವಿಶ್ವ ಚಾಂಪಿ ಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದ ಚೆರೋನೊ 4 ನಿಮಿಷ 13.34 ಸೆಕೆಂಡ್‌ ತೆಗೆದುಕೊಂಡರು.

ಜಿನ್ಸನ್‌ಗೆ ಬೆಳ್ಳಿ ಪದಕ
ಏಶ್ಯನ್‌ ಗೇಮ್ಸ್‌ ಚಿನ್ನದ ಪದಕ ವಿಜೇತ ಜಿನ್ಸನ್‌ ಜಾನ್ಸನ್‌ ಪುರುಷರ 1,500 ಮೀ. ಓಟದಲ್ಲಿ 3 ನಿ. 39.69 ಸೆಕೆಂಡ್‌ಗಳಲ್ಲಿ ಓಟ ಮುಗಿಸಿ ಬೆಳ್ಳಿ ಪದಕ ಜಯಿಸಿದರು. ಚಿನ್ನದ ಪದಕ ಅತಿಥೇಯ ನಾಡಿನ ಆ್ಯಂಡ್ರಿಸ್‌ ಪಾಲಾಯಿತು.

ಮುರಳಿ ಶ್ರೀಶಂಕರ್‌ಗೆ ಚಿನ್ನ
ರಾಷ್ಟ್ರೀಯ ದಾಖಲೆ ಹೊಂದಿರುವ ಮುರಳಿ ಶ್ರೀಶಂಕರ್‌ ಡೆನ್ಮಾರ್ಕ್‌ನಲ್ಲಿ ಕೊಪನ್‌ಹೆಗನ್‌ ಆ್ಯತ್ಲೆಟಿಕ್ಸ್‌ನ ಪುರುಷರ ಲಾಂಗ್‌ಜಂಪ್‌ ಸ್ಪರ್ಧೆಯಲ್ಲಿ 7. 93 ಮೀ. ಜಿಗಿದು ಚಿನ್ನದ ಪದಕಕ್ಕೆ ಕೊರಳೊಡಿದ್ದರು.