Chinese masters  ಬ್ಯಾಡ್ಮಿಂಟನ್‌ ಕೂಟ: ಸಾತ್ವಿಕ್‌-ಚಿರಾಗ್‌ ಸೆಮಿಫೈನಲಿಗೆ

ಶೆಂಝೆನ್‌: ಏಷ್ಯನ್‌ ಗೇಮ್ಸ್‌ ಚಾಂಪಿಯನ್ಸ್‌ ಸಾತ್ವಿಕ್‌ಸಾಯಿರಾಜ್‌ ರಾಂಕಿರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ ಅವರು ಅಮೋಘ ಗೆಲುವು ಸಾಧಿಸಿ ಚೀನ ಮಾಸ್ಟರ್ ಸೂಪರ್‌ 750 ಬ್ಯಾಡ್ಮಿಂಟನ್‌ ಕೂಟದಲ್ಲಿ ಸೆಮಿಫೈನಲ್‌ ಹಂತಕ್ಕೇರಿದರು.

ಅಗ್ರ ಶ್ರೇಯಾಂಕದ ಸಾತ್ವಿಕ್‌-ಚಿರಾಗ್‌ ಅವರು ಇಂಡೊನೇಶ್ಯದ ಲಿಯೊ ರಾಲಿ ಕಾರ್ನಾಂಡೊ ಮತ್ತು ಡೇನಿಯಲ್‌ ಮಾರ್ತಿನ್‌ ಅವರನ್ನು 21-16, 21-14 ಗೇಮ್‌ಗಳಿಂದ ಉರುಳಿಸಿ ಅಂತಿಮ ನಾಲ್ಕರ ಸುತ್ತಿಗೇರಿದರು. ಈ ಹೋರಾಟ 46 ನಿಮಿಷಗಳಲ್ಲಿ ಮುಗಿದಿತ್ತು.

ಈ ವರ್ಷ ಇಂಡೋನೇಶ್ಯ ಸೂಪರ್‌ 1000, ಕೊರಿಯ ಸೂಪರ್‌ 500 ಮತ್ತು ಸ್ವಿಸ್‌ ಸೂಪರ್‌ 300 ಕೂಟದ ಪ್ರಶಸ್ತಿ ಜಯಿಸಿದ್ದ ಸಾತ್ವಿಕ್‌-ಚಿರಾಗ್‌ ಭರ್ಜರಿ ಫಾರ್ಮ್ನಲ್ಲಿದ್ದು ಇಲ್ಲಿಯೂ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ.

ಪ್ರಣಯ್‌ಗೆ ಸೋಲು
ಆದರೆ ಪುರುಷರ ಸಿಂಗಲ್ಸ್‌ನಲ್ಲಿ ಕಣದಲ್ಲಿ ಉಳಿದಿದ್ದ ಎಚ್‌. ಎಸ್‌. ಪ್ರಣಯ್‌ ಅವರ ಹೋರಾಟವು ಕ್ವಾರ್ಟರ್‌ಫೈನಲ್‌ ಹಂತದಲ್ಲಿ ಕೊನೆಗೊಂಡಿತು. ಜಪಾನಿನ ಕೊಡಾಯ್‌ ನರೋಕ ಅವರ ವಿರುದ್ಧ ನಡೆದ ಸೆಣಸಾಟದಲ್ಲಿ ಪ್ರಣಯ್‌ 9-21, 14-21 ಗೇಮ್‌ಗಳಿಂದ ಶರಣಾಗಿ ಹೊರಬಿದ್ದರು. ಪಂದ್ಯದ ಯಾವುದೇ ಹಂತದಲ್ಲೂ ಅವರು ಎದುರಾಳಿಗೆ ತಿರುಗೇಟು ನೀಡಲು ವಿಫ‌ಲರಾಗಿದ್ದರು.